Josué 1 - Kashibo-Kakataibo Biblia

Diosan Josué usakian ñu ꞌanun ka bana

¹ Usa ꞌain ka Moisés Nukën ꞌIbun uni ax ñukë ꞌain, Josué an Moisés ꞌakinkë Nunnën bëchikë a Nukën ꞌIbun ësokin kakëxa:

² ꞌËn kaisa uni Moisés ka ñuaxa, usa ꞌain kamina bërí min Jordán kakë baka kamabi Israel unikama shitákinbiani, a ꞌinánuxun ꞌën ká me a mitsu ꞌinánun kuanti ꞌain.

³ ꞌËn Moisés kásabiokin kana anu mi kuankë mekama a ꞌën mitsu ꞌinánti ꞌain.

⁴ ꞌËn mitsu ꞌinánti me ax ka anu uni ꞌikëma me anua ꞌikë aín bashikama Líbano kakë anuaxbi kuantankëx anua baka rara Éufrates ꞌikë akama këñunbi kana anua hititas unikama tsókë parúmpapa anu sënë́nbi mitsunan ꞌinun ꞌinánti ꞌain.

⁵ Uínbi ka uisaxunbi mibë ꞌakanankin mitsu kanantima ꞌikën, ꞌën kana Moisés ꞌasaribiokin, ꞌën kushínbi ꞌakianan uínsarabi ënkinma mi ꞌakinti ꞌain.

⁶ Usa ꞌain kamina rakuë́ti sinanima kushikanti ꞌain, min kamina ënë unikama me ꞌinánti ꞌain, a me ꞌinánuxun kana ꞌën mitsun chaitiokëkama kakën.

⁷ Usa ꞌain kamina ꞌën kakësabi oí rakuë́ti sinanima kushiti ꞌain, ꞌimainun kamina ꞌën uni Moisésnëan ꞌën kakëxun mitsu kuënëoxuan bana ashi tanti ꞌain. A banakama kikësokinbi ꞌakëbë ka kamabi min ꞌakë ñukamax upí ꞌiti ꞌikën.

⁸ ꞌImainun kamina uinsaranbi ënkinma a tanti bana ꞌën ꞌamikëxun Moisésnën kuënëo bana nëtën isanan imë́ribi isti ꞌain, usakin ꞌakin kamina ënkinma ënë bana kikësabiokin ꞌati ꞌain. Usakin mi ꞌakëbë ka kamabi ñu mitsun ꞌakë ñukamax upí ꞌiti ꞌikën.

⁹ ꞌËn kana mi kain usa ꞌain kamina kushi sinani rakuë́tima ꞌain. Usa ꞌain kamina rakuë́kin kana ꞌaíma kixun sinántima ꞌain, min ꞌIbu Dios ꞌëx kana mibë uinu karamina kuani anubi ꞌiti ꞌain.

Josué ꞌimainun Israel unibu Canaán kakë menu kuanux mënio ka bana

¹⁰ Usa ꞌain ka Josuénën Israel uni aín kushibu ësokin kakëxa:

¹¹ Anua ꞌikankë atun xubu kamanubi kuankin kamina kamaxunbia atun pibianti ñu mëníonun kati ꞌain, ënuax rabë́ ꞌimainun achúshi nëtë ꞌikëbë kananuna Jordán kakë baka sikakiani kuanxun Nukën ꞌIbu Diosan nu ꞌinánti me a bitsi kuanti ꞌain.

¹² Usokin atu katankëxun ka Josuénën Rubén ꞌimainun Gadnën rëbúnkikama kanan Manasésnën rëbúnkiribi kamaira kakimabi ꞌitsamashi, akama ësokin kakëxa:

¹³ Mikaman kamina sinánti ꞌain, Nukën ꞌIbun uni Moisés ax ka ësai kia bana a nun ꞌIbu Dios an ka anumi upitax bukukanti ënë me ꞌinánti ꞌikë kixun nun chaitiokama kakëxa.

¹⁴ Usa ꞌain kamina mitsun xanu min bakë bëchikë ꞌimainun ami ꞌarakakë ñuinakama këñunbi Moisésnën mitsu ꞌinan me Jordán kakë baka nëkë manan ënubi ëbianti ꞌain. Ëbiani kamina ax ꞌakanainsa unikamaxëshi aín manë xëtokë bibiani mitsun xukë́nkama ka ꞌakanania ꞌakini kuanti ꞌain,

¹⁵ Nukën ꞌIbun ꞌakinkëxuan atúnribi ainanbi ꞌitanun ꞌibuakin me binun atu pain ꞌakinti ꞌain. Usakin atu pain ꞌakintankëx kamina amiribishi Moisés Nukën ꞌIbun uni an mitsu ꞌinan mekama baka nëkë manan ꞌikë ënubi utankëxun mitsunanbi ꞌinun biti ꞌain.

¹⁶ Ësokin kakëxun ka atúnribi Josué kakëxa: —Asabi ka min nu kakësabiokin ꞌai kananuna uinu karamina nu xuti anubi kuanti ꞌain.

¹⁷ Usa ꞌain kananuna min kakëxun min bana tankin ꞌanan, Moisésnën kakëxun ꞌásabiokin ꞌati ꞌain. Usa ꞌain kananuna nukaman kuëënin Diosan ka Moisés ꞌakiansaribi okin miribi ꞌakinti ꞌikën.

¹⁸ Usa ꞌain ka uin kara min kakësabiokin ꞌaisamatani kërutia a unix ꞌakë ꞌiti ꞌikën. Usa ꞌain kananuna nun mi kain uisai kara uni ꞌikëbëbimi rakuëaxma kushinun.