Jonás 4 - Kashibo-Kakataibo Biblia

Diosan Jonás nishiabi nuiba ñuikë bana

¹ Jonásnën iskëx ka usakin Diosan ꞌakë ax upíma ꞌiakëxa, usa ꞌain ka a kuëënima ꞌitsaira nishakëxa.

² Usa ꞌain ka abë banakin Dios ësokin kakëxa: —ꞌËn ꞌIbu Dios ësa ñu ka ꞌiti ꞌikë, kiax kana ꞌën menuaxi ꞌëx kian. Usa ꞌain kana bënëtishi Tarsis menu abáti sinánkë ꞌian, ꞌën kana mix kamina achúshi Dios nuibanairakë ꞌaish bënëtishi nishkëma a ꞌai kixun ꞌunánkë ꞌian, usa ꞌain kamina ꞌën sinánkëxun ꞌitsaira uni nuibakin ꞌatimokin tëmëramikatsi kixunbi mimia sinanatia ꞌakëma ꞌain kixun ka munuma banai ami nishkin Dios kakëxa.

³ Usa ꞌain kana ꞌëmi bamanun ꞌiminun mi ñukatin ꞌËn ꞌIbu Dios. Usa ꞌain kana ꞌuran tsókë ꞌimainun bamakë ꞌiti ꞌain.

⁴ Ësai kikian ñukákëxunbi ka Diosan Jonás kakëxa: —¿Usaími nishkë ax kara min sinánkëx asábi ꞌik?

⁵ Usokian kakëx ka a ëmanuax Jonás kuankëxa, kuani ka amiaxa bari urukë ami kikiani kuantankëx; anuxun Nínive ëma istisabi anu mapanati okin ꞌatankëx a tëmú tsóakëxa, anu ka uisa kara a ëma Diosan oia isnuxun kaini ꞌiakëxa.

⁶ Usa ꞌain ka Diosan achúshi itsi ꞌain pëchi chabu anua Jonásnën aín mapanati okin ꞌakë anu koonun ꞌimiakëxa, usokëxun aín pëi tupënkë an Jonásnëa xanaira tanima ꞌitánun tupë́onkëxa. Usakian tupëonkëx ka Jonás ꞌitsaira kuëëankëxa.

⁷ ꞌAínbi ka a ꞌiónkë bëtsi nëtë pë́karakë anun Diosanbi unimikëxun xënan aín pëi pikin aín xoribi pikëx chushiakëxa.

⁸ Usa ꞌain ka amiaxa bari urukë auküax bari urukëbëa suñu xanaira bëkinun Diosan ꞌimiakëxa, ꞌimikëbë ka ami katamëti ꞌaíma ꞌaia aín maxkámixun barin xarokëxa bënainsatankë anunbi Jonás bamatisa tankëxa. —Usai ꞌika ꞌuran tsókë ꞌimainun kana bamakë ꞌiti ꞌai —kixun sinani kiakëxa.

⁹ Usai ꞌiabi ka Diosan kakëxa: —¿Usaími an mi tupë́onkë itsi barin aín pëikëñunbi ë́skan nishkë ax kara asábi ꞌik? —¡ꞌËn sinánkëx ka asábi ꞌikën! —kixun ka Jonásnën kakëxa. ¡ꞌËn nishkënbi kana bamatisa tanin kixun ka kakëxa!

¹⁰ Usa ꞌain ka Diosan kakëxa: —Min ꞌapákëx koókëma ka a itsi ꞌiaxa; achúshi imë́ kotankëxun mi tupëonbaitibi ka a pëkaratëkënkë anun chushikë ꞌiaxa. Usa ꞌaínbi kamina min ꞌitsaira a sinanin.

¹¹ Usamaira okin kana ꞌën Nínive kakë ëma a nuibatin, a ëma chaiira anu ka ciento veinte mil unikama an uisa ñux kara upí ꞌikë kixun ꞌunánan, uisa ñux kara ꞌatima ñu ꞌikë kixun ꞌunánkëma unikama ꞌaisamaira ꞌimainun, ꞌitsaira ñuina ꞌarakakë ꞌikë kixun ka Diosan kakëxa.