Jonás 2 - Kashibo-Kakataibo Biblia

Jonásnën Dios ñuká ñuikë bana

¹ Usa ꞌain ka Jonásnën aín ꞌIbu Dios bainanmë ꞌëo chaiira aín puku ꞌukëmëuxunbi ñukákin,

² ësokin kakëxa: ꞌitsaira tëmërakin kana mix ꞌën Dios ꞌikë ꞌakinun mi ñukan, ñukákëxun kamina anuax bamatisa anuabi ꞌën bana kuakin ꞌë ꞌakian.

³ Min kamina an manë nunti nikinkë unikaman parúmpapa nëbëtsi aín nëminra anu ꞌë ninun ꞌamian, ꞌamikëxun nikë ka parúmpapa xobukë an ꞌë biaxa. Bitsia ka aín bëchunkë chaiirabu an ꞌë nanë́nkin mapuaxa.

⁴ Usakin ꞌakëxun kana mi ꞌura ꞌinunmi ꞌë ënkësa tankin; uínsaranbi kana anuxun mi rabiti xubunu atsíntëkëntima ꞌai kixun sinan.

⁵ Parúmpapa ꞌumpaxan ka chikítisama okin ꞌë nanë́nkin bëarakë ꞌiaxa; ꞌianan kana parúmpapa nëmin ꞌukëmëu ꞌikë ñu koókëkaman ꞌën maxká këñunbi ꞌë ranëarukësa tan.

⁶ Usai ꞌi kana me kini ꞌukëmëuira nipakëkësa ꞌixun; ¡ënuax kana uínsaranbi chikítima ꞌai kixun sinan! ꞌaínbi kamina mix ꞌën ꞌIbu Dios ꞌixun, bamatisa ꞌikëbi ꞌë ië́mian.

⁷ Usa ꞌain kana kushiñumasa tani kana bamati ꞌai kixun sinani, mimi sinan; sinánkin ñukákëxun kamina mix Dios ꞌixun anuxun, mi rabiti xubu upíira anuxun ꞌakësokin naínuxunbi ꞌën mi ñukákëxun kuan.

⁸ Uin kara unínbia a rabinuxun bëtsi ñukama ꞌakë a rabikin, Dios axa ië́mianankë a ëanxa;

⁹ ꞌaínbi kana ꞌën mi asábi ka kai kuëënkin rabiti ꞌain rabikin, kana ñuina ꞌatankëxun xaroxunti ꞌain; usakin ꞌakin kana uisokin ꞌaxunuxun karana mi ka usabi okin ꞌati ꞌain: ¡Mixëshi kamina axa ië́mianankë Dios a ꞌain!

¹⁰ Usa ꞌain ka Diosan bakanu ꞌikë bainanmë ꞌëo chaiira axa parúmpapa kuëbí me ꞌurama anu Jonás ëni anákin chikinun ꞌimiakëxa.