Jonás 1 - Kashibo-Kakataibo Biblia

Jonás kakë uni Diosan kakësokin ꞌaisamatani abá ñuikë bana

¹ Achúshi nëtën ka Diosan Israel menu ꞌikë uni, Amitainën bakë bëchikë Jonás a kakëxa:

² Anu kuanxun kamina, chaiira ëma Nínive kakë Asiria menua bukukë unikama ꞌëx kikë bana ñuixunkin kai kuanti ꞌain, ꞌënbi kana atun ñu ꞌatima ꞌaia isan usa ꞌain kana a ëma këñuti ꞌain.

³ Ësokin kakëxbi ka Jonás Diosan kakësabiokin ꞌaíma, uisaxira kara abáti ꞌikë kixun pain sinántankëx, anuaxa manë nunti Jope kakë ëmanu kuani chikiti anu kuankinbi ka, achúshi manë nunti ꞌuraira menu ꞌikë ëma Tarsisnu kuanti ꞌuramashi ꞌikë mërakëxa; mëraxun ka anun kuanuxun kupíokëxa, kupíotankëx ka anun kuani ꞌiruakëxa.

⁴ ꞌIrukiani kuankëbëtanbi ka Diosan suñúan kushiira bëkinun ꞌimiakëxa, usakin ꞌimikëx ꞌikuatsinkin suñuanën bëkakëxun ka parúmpapa bëchunan manë nunti kushiira bëchukin tukapatisa okin ꞌakëxa.

⁵ Usai ꞌikëbë ka an manë nunti nikinkë unikamax ꞌitsaira rakuë́akëxa, rakuëkin ka atun dios achúshi achúshixun atuisa ꞌakinun kixun ñukákankëxa. ꞌAínbi ka atun diosan ꞌakianma ꞌikën, usai ꞌurainra ꞌikëbëtan ka manë nuntisa bëspúrui urutanun kixun anua ꞌikë ñukama parúmpapanu puakëxa. Usakin ꞌakamainun ka Jonás manë nunti kataitsi ꞌukëmëu anu ñu puruti ꞌakë anu kuabúax ꞌaímai napëkëti ꞌuxkë ꞌiakëxa.

⁶ Usai ꞌikëbëtan ka manë nuntinu ꞌikë aín kushi an, anu kuanxun Jonás kakëxa: —¿ꞌUxkënan tapun min kaina añu ënuxun ꞌain? ¡Nirukin kamina min Dios munuma banakin ñukati ꞌain! Usakin mi ñukákëxun ka numi sinánkin nu ꞌakinti ꞌikën.

⁷ Usa ꞌain ka an manë nuntinuxun bërúankë unikama anua Jonás kuankë ꞌain, bëtsibë bëtsibë kánani kikankëxa: —Bërí kananuna uixira ꞌuchakë ꞌain karanuna ësa ñu inuti kixun ꞌunánti ꞌai kiax kanankëxa. Kananxun ñuratsukun tankëxbi ka anúan tankë ñura ax Jonásmi ki pakëakëxa.

⁸ Usakin ꞌakëbëtan ka kakëxa: —Nukama kamina kati ꞌain. ¿Añu ñu maruti bëi kaina ënë manë nuntin uan? ¿Uinuax kaina aín? ¿Uinu ꞌikë menu ꞌikë kaina mix ꞌain? ¿Uisa ñakánu ꞌikë uni kaina mix ꞌain?

⁹ Ësokin kakëxun ka Jonásnën atu kakëxa: —ꞌËx kana Israelkama ꞌain, usa ꞌixun kana ꞌën ꞌIbu Dios naínu ꞌikë a rabin, an ka parúmpapa ꞌimainun me uniokëxa.

^10-11 Usakin kakin ka Jonásnën manë nunti chaiira anu tëkë unikama ꞌëx kana Dios kikësokin ꞌaisama tani abati uá kixun atu kakëxa, kakëxun kuati ꞌitsaira rakuë́kin ka atun kakëxa: —¿Uisa kupín kaina min usokin ñu ꞌan? Ësokin kakëxun iskinbi parúmpapa ꞌaisamaira bëchunia isi rakuë́kin ka atun Jonás ñukákëxa: ¿Uisa karanuna mi parúmpapa ꞌain bëchunkë bukubutanun oti ꞌain?

¹² Kixuan kakankëxun ka Jonásnën —ꞌën kana asérabi upíokin ꞌunanin Diosan kakësabi oi ꞌëx ꞌikëma kupín ka nëtë masákuatsinkëbë parúmpapa ꞌaisamaira bëchunia, usa ꞌain kamina ꞌë aín bëchunkëa bukubutanun parúmpapanu niti ꞌain —kixun ka Jonásnën kakëxa.

¹³ Usai ꞌimainun ka an manë nunti nikinkë unikaman atun kushibëtanbi me ꞌurama oti sinánxun inákankëxa ꞌixunbi ka ꞌakanma ꞌikën, usakin ꞌakëbëbi ka parúmpapa atiainra aín bëchun tuki kushiakëxa.

¹⁴ Usai ꞌikëbëtan ka munuma banakin an ꞌakinun kixun ñukákin Dios ësokin kakankëxa: Dios nukamina ënë unin ꞌucha kupín bamanun ꞌimitima ꞌain. ꞌIanan kamina axa ñu ꞌatima ꞌakëma ꞌaish bamakëbëtan, nukamaxnu anun ꞌuchakësa ꞌinun ꞌimitima ꞌain, usa ꞌixun kamina mix Dios ꞌixun uisakin kaina ꞌaisatani usakin ñu ꞌain.

¹⁵ Ësai pain kitankëxun ka Jonás bitankëxun parúmpapanu nikankëxa, usokin ꞌakëbëshi ka parúmpapa aín bëchunkë nëtë́akëxa.

¹⁶ Usai ꞌia isi ka an manë nunti nikinkë unikama ꞌitsaira rakuë́ti asérabi ka Jonásnën rabikë Dios anu ꞌikë kixun sinani ꞌitsaira rakuë́kankëxa, rakuë́ti ka ñuina kananuna xaroxunti ꞌai kixun xaroxuankëxa ꞌaxuni ka ënëx kuni ka asérabi a rabiti Dios a ꞌikë kiax kikankëxa.

¹⁷ ꞌAínbi ka Diosan bakanu ꞌikë ñuina chaiira bainanmë ꞌëo achúshi an Jonás éti nankë ꞌiakëxa. Usokian ꞌakëx ka Jonás rabë́ ꞌimainun achúshi nëtë ꞌianan rabë́ ꞌimainun achúshi imë́ ñuina chaiira bainanmë ꞌëo aín pukunu ꞌiakëxa.