Joel 2 - Kashibo-Kakataibo Biblia

¹ Aín bashi Sión kakë anuxun ka manë banañu banokanti ꞌikën, ꞌanan ka Nukën ꞌIbun kaisa bashi upíira anuxun uisai ñu ꞌikëbëtan a banamiti aribi banamiti ꞌikën. Kamabi unikama Judá menu tsókë akamax ka bërëti ꞌikën, Nukën ꞌIbun nëtë ka ꞌuramaxa usa ꞌain:

² a nëtëx ka imë́ ꞌianan, bëánbëankibukë ꞌiti ꞌikën, ꞌianan ka a nëtë kuinan tupë́onkë nëtë ꞌiti ꞌikën. Suntáru kushibu ꞌimainun ꞌitsaira an ka aín bashikama tsitsiruti ꞌikën, usokin ꞌakin ka barin urukin pë́kabëtsinkë usaribiokin ꞌati ꞌikën. Uinsaranbi ka usai ꞌia ñu uínbi isáma ꞌikën, usa ꞌain ka uínsaranbi bërí ꞌikë ësai ñu ꞌia uínbi istëkëntima ꞌikën.

Suntárukama champu ꞌitsa ukësa kuatsini uá ñuikë bana

³ A suntárukaman ka tsin ërë́nrukin bënë́kinshi, kamabi ñu këñukësa okin ꞌaia; usa ꞌain ka tsi rëkirukiantankëx ꞌinúkëbë ñankáishi ꞌikë usaribi ꞌiti ꞌikën. Atúxa kuankëmapain ꞌain ka me upíira ꞌaish, Edén kakë naësa ꞌiakëxa, ꞌaínbi ka atux kuankëbë anu uni ꞌikëma mesa ꞌiti ꞌikën. ¡ꞌAíma ka anuaxa abati ꞌiakëti ñu ꞌikën!

⁴ Suntárukama ax ka champu ꞌitsa iskësa ꞌianan, caballonën nikë unikamaxa bënëtishi anun abákë usa ꞌikën,

⁵ usa ꞌain ka bashikamanu abákian taë banamikë ax anun ꞌakánanti caballonën nirinkë ñu ax bana kiankësari ꞌia, ꞌianan ka tsin rëkirukin në́nkëxa pëi chushirukë banakë usaribiti ꞌia. ꞌIanan ka suntáru kushiirabukama ꞌakanantishi ꞌaish sëtë́kë usaribi ꞌikën.

⁶ Usa ꞌain ka unikamax suntárukama bëbaia isi rakuë́ti bërëi achúshi achúshi uni aín bëmánan bëpëki ꞌikanti ꞌikën.

⁷ Usa ꞌain ka suntáru rakuëma kamax ꞌikësaribiti abákianx anun ëma kënëara anun rorukiani puntëishi amo kima kuankësa usaribi kiani kuanti ꞌikën.

⁸ Usai ꞌika champukama ꞌikësai suntárukama ax bëtsibë bëtsibë bëarananima ꞌiti ꞌikën; usai ꞌika achúshi achúshitax anun kuankë anunbi kuanti ꞌikën, kuani ka atumi okin atun pia pukëbëbi anuax raíribë ënananima sënë́nbi kuanti ꞌikën.

⁹ Usai ꞌika ëmami kikiani abákianx anun ëma kënëara anun rorukiani kuani, xubukamanu atsínti ꞌikën, usai ꞌika an ñu mëkamakë unikamax xubu ꞌain xëkuë chukúmakama anun atsínkësaribi ꞌiti ꞌikën.

¹⁰ Usa ꞌain ka an ꞌimikëx me shaíkia, ꞌimainun ka naíribi shaíkiti ꞌikën, ꞌianan ka bari ꞌimainun ꞌuxë bë́ankiti ꞌikën, ꞌimainun ka ꞌispakamanribi pëkima nëtë́ti ꞌikën.

¹¹ Nukën ꞌIbux ka aín suntárukama bëtanainuax kaná banakësari banai kiti ꞌikën. Usa ꞌain ka aín suntárukama ꞌaisamaira ꞌaish uínbi tupunkin sënëoinsamaira ꞌixunbi an kakësabiokin ꞌaia. ¡Usa ꞌain ka anun Nukën ꞌIbu ꞌuti nëtë ax chaiira ami rakuë́ti nëtë ꞌikën! Usa ꞌikë ka uínbi tënëtima ꞌikën.

Nukën ꞌIbun unikamax ka amiribishi sinanatëkënti ꞌikë kixun ñuikë bana

¹² “ꞌAinbi ka —bërí asérabi Nukën ꞌIbu ësai kiaxa—, amiribishi kamina mitsun nuitunënbi ꞌëmi asérabi sinanakanti ꞌain. ¡Usai ꞌi kamina añubi piima ꞌianan munuma kuënkëni bënëti inkanti ꞌain!”

¹³ ¡Amiribishi kamina mitsun ꞌIbu Diosmi sinanatëkënti ꞌain, usai ꞌikin kamina mitsun nuitu mëníokati ꞌain, chupa mëníokë usamaira ꞌikën! Usa ꞌaish ka Nukën ꞌIbu ax munu ñu ꞌai bënëtishi nishkëma ꞌianan nuibanankë ꞌikën, usa ꞌain ka ꞌitsaira ax nuibanania, usa ꞌixun ka ꞌatima oisa tankinbi tënëkin uni nuibatia.

¹⁴ Usa ꞌain ka Diosan mitsu ꞌatima otima ꞌikën, ꞌakinma ka sinanatia okin ꞌakinkin mitsu: ñu bimikama ꞌimainun uvas chakaxun aín baka bikë ꞌianan a ꞌinaínshiti ñukama Dios ꞌinánti ꞌikën.

¹⁵ ¡Manë banañu aín bashi Sión kakë anuxun banokëbëa timëtia kamina! Ëmanu ꞌikë unikama pikëmëti samákanun kati ꞌain;

¹⁶ sacerdotekama mitsun kamina Diosan kaisa unikama timëtankëxun mëníokanun kati ꞌain; kanan kamina uni kaniakëkëkama ꞌimainun tuákama bërí kanikë ꞌianan, tuá aín titan xuma ënkëma akamabi timëti ꞌain. ¡Usai ꞌimainun ka bëría xanu bikëkama axribi anua ꞌuxkë anuax unikamabë timë́ti chikínkanti ꞌikën!

¹⁷ Sacerdotekama an Diosan ñu mëëti ꞌakë mitsuxribi kamina utankëx Dios ñukáti inti ꞌain. Usai ini ka anuxun Dios rabiti xubu a bëtanaia ꞌikë anuxun ñuina xaroti ꞌakë anu sëtëtax ësai kikanti ꞌikën: “Nukën ꞌIbu Dios min unikama kamina atun ꞌakë ñu ꞌatimakama mëníoxunti ꞌain; ꞌanan kamina ñuumara ka atux ꞌikë kiax numi uinu ꞌikë uníxbi kuainun ꞌimitima ꞌain, nux kananuna min kaískë unikama ꞌai usa ꞌain; ꞌianan kamina bëtsi ëmanu ꞌikë unikaman atun kuëënkësokin ꞌamainun an bëtsi ñu rabikë unikaman numi kuaikin: ¿Uinu kara mitsun Dios ꞌik? kixun nu kanun ꞌimitima ꞌain.

¹⁸ Usa ꞌain ka Diosan ax nuibanan irakë ꞌixun atun ꞌakë ñukama sinánkinma ꞌain unikama nuibakin ismiakëxa. Usokin aín unikama,

¹⁹ ꞌai ka kiakëxa: ꞌËnbi kana trigo bimi ꞌimainun uvas baka ꞌakë vino ꞌimainun xëni akama kuëëntanun ꞌinánti ꞌain; usokëxa numin ꞌianan, shimatëkënima ꞌikëbëtan kana; an bëtsi dioskama rabikë unikama mitsumi kuaitëkënun ꞌimitima ꞌain.

²⁰ Usa ꞌain kana aín tsipumiaxa champu ꞌitsa ukësa kuatsini mitsunu ukë suntárukama anu uni ꞌikëma menua kuantanun xuti ꞌain. Usokin ꞌakin kana anpan rëkuë́n kuatsinkëkama a parúmpapa bamakë kakë anua bakamikinun ꞌimiti ꞌain, ꞌimianan kana axa tsiankuatsini ukë akamaribi parúmpapa mediterráneo kakë anu këñunun ꞌimiti ꞌain, usokin ꞌakëx ka aín namikama chë́ki pisiti ꞌikën. ¡ꞌËn kana unin iskëma ñu chaiirabu usokin ꞌati ꞌain!”

²¹ Kamabi mex ka rakuë́tima ꞌitsaira kuëënti ꞌikën, Diosan ka chaiirabu ñu ꞌati ꞌikën.

²² ꞌImainun ka raëkëma ñuinakama axribi menu ñu kótëkënkëbë rakuë́tima ꞌikën, pastokamax ka amiribishi paxaira ꞌitánun ꞌirutëkënti ꞌikën, ꞌianan ka ikamaxribi ꞌaisamaira aín bimi ꞌiti ꞌikën, ꞌimainun ka higo uvas akamaxribi ꞌaisamaira aín bimi ꞌinun bimiti ꞌikën.

²³ ¡Axa Jerusalén kakë ꞌikëbi Sión kakëribi ëmanu tsókë unikama mitsux kamina kuëënkanti ꞌain, usai ꞌi kamina Diosmiribi sinani kuëënkanti ꞌain! An ka bëráma ꞌasabiokin anúan ꞌibúti nëtë ꞌikëbëtan ꞌuñe ꞌibúmiaxa, a ꞌuñe ka mitañu ꞌianan anun ñu ꞌapákëxa pëkëtia biti ꞌuxë anun ꞌasaribiokin ꞌibúmikë ꞌiti ꞌikën.

²⁴ Usa ꞌain ka ꞌitsaira bimikë trigo biti ꞌianan, uvas baka vino ꞌakë ꞌimainun ꞌitsaira xëniribi ꞌiti ꞌikën.

²⁵ “Ësai ka Dios kiaxa ꞌën kana a baritiakaman mitsun ñu ꞌapákë utabakin champun pía a pain amiribishi ꞌinántankëxun, kana amiribishi utëkëkin champun pitëkëan akamaribi inánti ꞌain, ꞌinanxunbi kana utëkënkia champun pía a ꞌinanxunbi kana anuishi sënë́nkian champun pía aribi ꞌinántëkënti ꞌain. ꞌËn kana suntárukaman ñu masókë usaribi okin ꞌanun mitsunu xuakën.

²⁶ Mitsun kamina ꞌitsaira ñuñu ꞌixun puchákin pikin mitsun ꞌIbu Dios ꞌikë ꞌë rabikanti ꞌain, ꞌën kana mitsu ñu chaiirabu ꞌaxunin. Usa ꞌain ka ꞌën unikamax katë́kë bërútëkëntima ꞌikën,

²⁷ ꞌimainun kamina Israel unikama mitsun ꞌunánti ꞌain, ꞌëx mitsun Dios ꞌaish mitsubë ꞌain, ꞌëx kana mitsun Dios a ꞌain, usa ꞌain ka bëtsi ꞌësaribi ꞌaíma ꞌikën. ¡Usa ꞌain ka ꞌën unikama uínsaranbi rabinkë bërútima ꞌikën!

Dios aín Bëru Ñunshin aín unikama ꞌinánkatsi kia bana

²⁸ Usakin ënë ñukama pain ꞌatankëxun kana ꞌën Bëru Ñunshin kamabi uninu xuti ꞌain: Usa ꞌain ka mitsun bakë bëchikë bëbukama ꞌimainun ini bëchikë xanukama atun ꞌën bana ñuiti ꞌikën, ꞌamainun ka uni xënikaman namákin isti ꞌikën, ꞌimainun ka uni bënábu atúnribi namákësa okin isti ꞌikën.

²⁹ ꞌImainun kana an mitsu ñu mëëxunkë uni ꞌimainun xanukama atunurubi ꞌën bëru ñunshin a nëtëkaman xuti ꞌain;

³⁰ Usokin ꞌakin kana ꞌën kushi ismikin ñu chaiirabu ꞌakin imi tsi rëkirukë ꞌimainun nëtë kuin tëxëkirukë akama ꞌimiti ꞌain.

³¹ Usa ꞌain ka bari pë́kaima bënamainun ꞌuxën pëkakë axribi imi ꞌiti ꞌikën, usai ka Diosan nëtë chaiira ax ami rakuë́ti ꞌiti ꞌikën.”

³² ꞌAínbi ka kamabi unikama an Nukën ꞌIbun anë rabikë atun bamatinuax ië́ti tanti ꞌikën, usa ꞌain ka aín bashi Sión kakë Jerusalénnu ꞌikë anu ka anua atux ië́ti ꞌiti ꞌikën. Nukën ꞌIbu usai ka ꞌiti ꞌikë kiax kiásabi oi. Usa ꞌain ka an kaískë unikamax bamanuxbi tsókëpan ꞌiti ꞌikën.