Joel 1 - Kashibo-Kakataibo Biblia

ꞌAisamaira champun ñu ꞌapákëkama këñukin pia ñuikë bana

¹ ꞌËnë banax ka Joel Petuel kakë uni aín bakë bëchikë Diosan ká ꞌikën.

² Kamabi uni ꞌain tukurikubu ꞌimainun axa ënë menu tsókë unikama mitsun kamina ënë bana ꞌupiokin kuati ꞌain. ¿Mitsun kaina ësaia ñu ꞌia isan? ¿Mitsun papan kara tsókë ꞌixun a nëtëkaman ësaia ñu ꞌia isakët? ka isama ꞌikën.

³ Usa ꞌain kamina mitsun bakë bëchikëkama ꞌa bana ñuixunti ꞌain, ñuixunkëxun ka atúnribi atun bëchikëkama ñuixunti ꞌikën, ñuixunkëxun ka atúnribi bakëntankëxa kanirukë aribi ñuixunti ꞌikën.

⁴ Kamabi ñu ka champun piakëxa, usakin ꞌakëbë ukin ka bëtsían pikin ënkë akama këñukin bëtsi champu kamanribi piakëxa. Pikë ꞌaínbi ka amiribishi utëkënkin raírinënribi piakëxa, pianbi ka axa utëkënkë ainra kamabi ñu këñukin piakëxa.

⁵ ¡Axa paë́nkë unikama mitsux kamina bësukanti ꞌain! ¡An uvas baka vino ꞌakë xëakë unikama mitsux kamina inkanti ꞌain, ꞌami mitsun ꞌain baka xëakë uvakama ka champun këñúaxa!

⁶ Usa ꞌain ka champu ꞌitsaira ax achúshi suntárukama kushiira ꞌianan ꞌitsaira usaribi ꞌianan, paru ꞌinuánën xëtasa ꞌianan paru ꞌinúanën xanun pakasa ꞌixun nun mekama tsitsiruaxa.

⁷ Usai ꞌikin ka unin uvas ꞌapákëkama ꞌanan, nun higuera ꞌapákëkama këñukin piaxa, usakin ꞌakin ka ꞌain xo këñukin ꞌain xaká pianan, ꞌain pëñankamaribi uxubu kuaintanun ꞌain xaká piaxa.

⁸ Achúshi xanux ꞌain mërati an biti uni ñukë ꞌain, inkin uni ñukëbëtan pañuti chupa pañuax inkë,

⁹ usaribiti ka sacerdote unikamax inia, anuxun Dios rabiti xubunu ka añu ñubi ꞌaíma ꞌianan, a xëati uvas baka ꞌakë ꞌimainun a Dios ꞌinaínshiti ñukamaribi ꞌaíma ꞌikën.

¹⁰ Naëkamanu ka añu ñubi koima, mekamax ka uni ꞌain ꞌaintsi ñukë ꞌain masá nuitukë usaribi ꞌikën. Usa ꞌain ka trigo ꞌapákë ꞌimainun uvas ꞌianan, olivos akamax ka ëski chushiaxa.

¹¹ Axa naënu ñu mëi tëkë unikama ꞌimainun axa uvas ꞌapákënu tëkë unikama mitsux kamina masá nuituti inkanti ꞌain, ami ꞌapákë ñukama ka kamaxi nëtë́axa, ꞌimainun ka anun biti ꞌurama ꞌaínbi trigo ꞌimainun cebada akamabi këñúaxa.

¹² ꞌIanan ka uvas ꞌapákëkama ꞌimainun higuera ꞌapakëkamaribi chushiaxa. Usai ꞌimainun ka kaxori, xëbin, manzana akama ꞌianan, kamabi naënu ꞌikë i kamaribi chushi ëskiaxa. ¡Usai ꞌia isi ka ꞌupiokin sinani kuëënkë a ëni kamabi unikama nitë́xëaxa!

¹³ Usa ꞌain kamina sacerdotekama anuxun ñuina xarotinu tëkë, ꞌain kushibu mitsux chupa xëni pañutankëx paëi masá sinani inkanti ꞌain, anuxun Dios rabiti xubunu ka ñu bimikama ꞌimainun a Dios ꞌinaínshiti uvas baka vino ꞌakë abi ꞌaíma ꞌikën.

¹⁴ Usa ꞌain kamina kamabi unikama pima samákanun kati ꞌain; usai ꞌixun kamina anuxun Dios rabiti xubunu uni aín tukurikubu ꞌimainun kamabi unikama a menu ꞌikë timë́ti ꞌikën, anuxun ka Dios atun ꞌuchakëkama ñuixunti ꞌikën.

¹⁵ ¡Bërí karanuna añu ꞌati ꞌain, anúan Dios kushiñuira an nun tënëtisamaira ñu ꞌatimaira ꞌimiti nëtë ka ꞌurama kuatsinia!

¹⁶ Nukaman ismainunbi ka nun bërunuxunbi a piti ꞌapákë ñukama champun këñukin piakëxa, usa ꞌain ka unikaman anuxun Dios rabi xubunuax kuëënkë akama nëtë́akëxa.

¹⁷ Usa ꞌain ka ñu bëru ꞌapákëkama ax ꞌuí ꞌibúkëbëma koima ëski chushiakëxa, usa ꞌain ka trigoribi ꞌain bimi bisama ꞌinun nëtë́axa, usa ꞌain ka anu trigo bukunkëkama anuaxribi këñuaxa.

¹⁸ ¡Vacakama ka mankia! Ñankáishibi ka vacakaman pasto bari ꞌia, ꞌimainun ka oveja ꞌarakakëkama a piti ꞌaíma ꞌain numin bamaia.

¹⁹ ¡Usa ꞌain kananuna mixmi Dios ꞌikë ꞌakinun mi ñukatin, barin xanan ka anu uni ꞌikëma menua ꞌikë xubi ꞌimainun naënu ꞌikë ikama chushimiaxa!

²⁰ Usa ꞌain ka ñuina raëkëmakamaxribi tëmërai banaia, atúan xëakë xëxakamaribi ëskimainun, ka tsin pastokamaribi nënkin xaroxa.