Job 5 - Kashibo-Kakataibo Biblia

¹ Job uin kara munuma kuënkëni banaia kuakin mi kaia ꞌunánti kamina kiti ꞌain. ¿Uinu ꞌikë ángel a kaina mia ꞌakinun kixun ñukáti ꞌain?

² An ꞌunántisa ꞌikëbi ñu ꞌunánkëma uni ax ka Diosmi ꞌatimati sinánkë kupí ñuia, ꞌimainun ka bëtsi unin paránkin kakëxunbia an usama ka kixun kakinma asábi ka kixun kakë axribi bamaia.

³ ꞌËn kana ñu ꞌunántisa ꞌikëbi ꞌunánkëma uníxa bënëtishi ñuñuira ꞌia isan, ꞌaínbi ka bënëtishi aín xubunu ꞌikë ñukama ꞌatimakëbë ñuñuma ꞌiaxa.

⁴ Usa ꞌain ka aín bakë bëchikëkama an ꞌakinti ꞌaíma ꞌikën; usa ꞌikë ka anuxun bana mëníokë anuxuan ñu ꞌatima ꞌakëmabi atun kuëënkësa okin ꞌakania, usa ꞌaínbi ka axa anun rabanan në́ti banati ꞌaíma ꞌikën.

⁵ ꞌImainun ka atun ñu ꞌapakëkamaribi pitiñuma axa numin ꞌi bukukë unikaman aín inuabi bixun pikania, usakin ꞌamainun ka an bëtsin ñuishi kuëënkë unikama atux ñuñuira ꞌikëbë ami nutsia.

⁶ Unixa ꞌatima onanti sinánkë ax ka menuax ñu ꞌapákë ꞌikësai koima; uníxa uisa ñubi kara inuti tëmërakë ax ka menuax xubi ꞌikësai unikëma ꞌikën:

⁷ kamabi tsi rëkirukënuax ka aín ëxku saraki abisi ꞌia, usaribiti ka an uni tëmëramiti ꞌatima ñukama axribi aín sinánnuaxbi chikitia.

⁸ Mix ꞌikësai tëmërai ꞌikë ꞌixun kana ꞌën ira Diosan ꞌëx tëmërakë ꞌë ꞌakinun min ꞌakëbëtanmabi ñukátsian.

⁹ ¡An ka ꞌitsaira ñu ꞌakin unin iskëma chaiirabu ñu ꞌaia, usakin ꞌaia ka uínbi a ñukama uisakin kara ꞌaia kixun ꞌunántima ꞌikën!

¹⁰ An ka ꞌuí ꞌibúkin me chabónun ꞌimia, usakin ꞌimikëx ꞌibúkin ka menu ñu ꞌapákë koonun chabóia.

¹¹ An ka mënin sinánñu unikama atúxribia raíri unikamasaribi ꞌinun ꞌimia, ꞌimianan ka axa tëmërai masá sinani bukukë akamaribi upí ꞌinun ꞌimia;

¹² ꞌimianan ka an uni paránti ꞌunairakë uni an usakin uni ꞌati sinánkë ꞌikëbi an sinánkësa okían ꞌanun ꞌamima.

¹³ Usa ꞌixun ka an bëtsi ꞌatimoti sinánxun ꞌaisataniabi uni Diosan atun sinánkëa ꞌaxuma ꞌanun ꞌamima, usakin ꞌakin ka atun ñu ꞌatima ꞌati sinánxua ꞌakë ax ñankáishi ꞌinun ꞌimia:

¹⁴ ¡usa ꞌaish ka uin kara bëtsi unikama ꞌatima oti sinania a unikamax nëtë xabánu nitsibi imë́ bëánkibukënu nikësa ꞌikën!

¹⁵ Diosan ka ñuñuma uni ꞌimainun bëtsi unikaman ꞌatimaira okë abi ië́miti ꞌikën;

¹⁶ ax ka an uni ñuumara ka kixun bëtsi unin iskëkama a ꞌakinkë a ꞌikën, ¡ꞌianan ka uni ꞌatima sinánñuirakama bëtsi ꞌatima onux bananun ꞌimima!

¹⁷ Usa ꞌain ka chuámarua ꞌiti ꞌikë ui uni kara Diosan ꞌunánmisatankin ꞌatima ñu inúnun ꞌimia ax; usai ꞌikinbi ka Dios kushiira ꞌixuan usai ꞌiti ꞌimikëxunbi ami ꞌatimakin sinánkinma abi tënëkë uni ax ꞌiti ꞌikën.

¹⁸ An mi ꞌinsinun ꞌimitankëxunbi ka amiribishi anbi mi pëxkutëkënti ꞌikën; ꞌimianan ka tëmëranun ꞌimitankëxunbi anbi mi kuëëmitëkënti ꞌikën.

¹⁹ Uínsaran kaina ñu ꞌatima inuti ꞌai anun ka achúshira okin ꞌakintankëxun ënkinma mi ꞌakinti ꞌikën, ꞌianan ka uisa ñu inuti kaina tëmërati ꞌai usabi mi tsónun mi ꞌimitima ꞌikën.

²⁰ Anuan numi ꞌiti nëtë ꞌikëbëtanbi ka numin bamanun mi ëntima ꞌikën, ꞌianan ka anúan ꞌakánanti nëtë ꞌikëbë ꞌakanankinbia suntárukaman ꞌanun mi ëntima ꞌikën.

²¹ Uin kara mi ꞌatimakin ñui këmëi banaia anuabi ka mi ënkinma ꞌakinti ꞌikën, usakin ꞌakëxbi kamina rakuë́tima ꞌain, an ka uin kara mi ñuia ax këmëi banai kikëbëtanbi anuabi mi ꞌakinti ꞌikën.

²² Usa ꞌain kamina numi ꞌianan bëtsi bëtsi ñu inuti tëmëraibi ami kuai kuëënti ꞌain, ꞌianan kamina raëkëma ñuina kamami rakuë́tima ꞌain.

²³ Min naëoti menu ka mënioisama ꞌitánun ꞌitsaira maxá ꞌitima ꞌikën, ꞌimainun ka raëkëma pianankë ñuinakama ax min ꞌunánkë unisa ꞌixun mi uisabi otima ꞌikën.

²⁴ Usa ꞌain ka min xubunua mibë ꞌikë min aintsikamax ñuñuira ꞌiti ꞌikën, ꞌimainun ka min ꞌarakakë vacakama ꞌuakamë ꞌëoi kamabi kara kixun tupúnkëx bëtsix nëtë́këma ꞌiti ꞌikën.

²⁵ ꞌImainun ka min rëbúnki kamaxribi bakë bëchipati ꞌuakamë ꞌëoi ꞌaisamaira ꞌaish naënua xubi kókësaira ꞌiti ꞌikën.

²⁶ ꞌIanan kamina min kaniakëti nëtë ꞌikëbë xënibutibi samabuirakëma kushi pain ꞌiti ꞌain, usai ꞌi kamina ñu bimi ꞌapá pëkëtia bikëxa upí ꞌikë usaribi ꞌiti ꞌain.

²⁷ Nux bëtsi bëtsi ñu inúkë an ka nu ꞌunánmia usa ꞌain kamina ënë bana kuakin usa ka kixun sinánti ꞌain; usa ꞌain kamina ënë bana kuakin minbi uisaira kara kixun mix inúkë ñukama tanti ꞌain, kixun ka Elifaznën Job kakëxa.