Job 42 - Kashibo-Kakataibo Biblia

Jobnën Diosan ka an ꞌunánkësamaira okin ñu ꞌunánxa kixun sinan ñuikë bana

^1-2 ꞌËn kana ꞌunanin mix kamina an kamabi ñu upíokin ꞌunánkë a ꞌain, ꞌimainun ka min ꞌakasmati ñukama ꞌaíma ꞌikën.

³ ¿Ui karana ꞌëx ꞌain min ꞌaisa tankin sinánkë ñukama kamina ꞌatima ꞌai kixun mi sinánxukin, ꞌëx ñu ꞌunánkëma ꞌixun kana usakin sinánti ꞌain? ꞌËx kana minmi ꞌunánkëma ñukama ñui kiakën, ꞌianan kana uínbia iskëma ñukama min kuaisama ꞌitánun ñui kian.

⁴ Min kamina ꞌë kakën: “ꞌËn mi kamainun kamina kuati ꞌain; ꞌën mi ësokin ñukákëxun kamina usabi okin ꞌë kati ꞌain.”

⁵ ꞌËn kana bëríbi kamabi unia mi ñui kikë anuishi mi ꞌunan, ꞌaínbi kana bërí ꞌën bërúnbi mi isin.

⁶ Usa ꞌain kana ꞌëx kikë banakama a sinani rabinin, chimapu kupúkënu tsóxun kana usai kiaxma ꞌinúma kana kia kixun sinan.

Diosan amiribishi Job ñuñuira ꞌinun ꞌimitëkëan bana

⁷ Ësokin pain a ñukama Job katankëxun ka Diosan Elifaz kakë uni aribi kakëxa: ꞌËx kana mi ꞌimainun min ꞌunánkë uni rabë́ amiribi ꞌitsaira nishan, mitsun kamina asérabi upiti banaima ꞌë ñui këmëi banan ꞌën uni Job ax kuni ka asérabi ꞌë ñui upiti banaxa.

⁸ Usa ꞌain kamina bërí ꞌëx mitsumi nishkë a nëtë́tanun, mapai achúshi ꞌimainun rabë́ vaca bërí kanikë këñun mapai achúshi ꞌimainun rabë́ carnero bibiani uinu kara ꞌën uni Job ꞌia anu a buani kuanti ꞌain, anuxun kamina a ñuinakama rëxun ꞌaímai këñutanun xaroti ꞌain. Usakin ꞌakëbëtan ka ꞌën uni Jobnën mitsu ꞌë ñukáxunti ꞌikën, ñukákëxun kana an ꞌë kakësabiokin, mitsu uisabi otima ꞌain, mitsun kamina asérabi ꞌë ñui upiti banaiman, ꞌën uni Job ax kikësai.

⁹ Usakin kakëx kuanxun ka Elifaz, Bildad ꞌimainun Sofar a unikaman Diosan kakësabiokin ꞌakëxa, an ka Nukën ꞌIbun Jobnën ñukësabi okin ꞌakëxa.

¹⁰ Usokian an ꞌunánkë unikama ñukáxunkëxun ka Diosan, Job bëráma ꞌiásabi ñuñuira ꞌinun ꞌimitëkëankëxa ꞌimikin ka bëráma ꞌiasamairaia ñuñuira ꞌinun a inumikin rabë́ okin ñu ꞌinantëkëankëxa.

¹¹ Usa ꞌain ka kamabi aín xukë́nkama, ꞌimainun aín chirabakëkama ꞌianan aín ꞌunánkë unikama, ꞌimainun bërámabia ꞌunan unikama atúxribi a isi, ain xubunu rikiankëxa anuxun ka abë timë́xun fiesta ꞌakin atubëtan piakëxa. Usakin ꞌakin ka Diosan ꞌimikëxa ꞌitsaira paë tani tëmërakë anun kananuna nuxribi masánuitua kixun kakankëxa, kanan ka atu achúshi achúshinën manë uxua kuríki ꞌakë a ꞌinánan, mëñusuti kuri ꞌakë aribi ꞌinankankëxa.

¹² Usa ꞌain ka Diosan upíokin Job sinánxunkin tëmërakëma ꞌaísha ꞌikësamairaia ñuñuira ꞌinun ꞌimikin. Ka catorce mil ovejakama, seis mil camellokama, mil vaca ain bënë rabë́, rabë́, ꞌimainun mil burro aín xanukamañu ꞌinun ꞌimiakëxa.

¹³ ꞌImianan ka catorce bakë bëchikë bëbuñu ꞌianan rabë́ ꞌimainun achúshi ꞌini bëchikë xanuñuribi ꞌinun ꞌimiakëxa.

¹⁴ Aín rëkuë́n ꞌini bëchikë xanu aín apan ka Jemimá kakin anëakëxa, anëanan ka ain nëbëtsi ꞌikë a Quesiá kakin anëanan ain ꞌanákaira a Queren-hapuc kakin anëakëxa.

¹⁵ Usa ꞌain ka uinu ꞌikë menubi xanu upíira Jobnën bakë bëchikë xanukamasa ꞌaíma ꞌiakëxa. Usa ꞌikë ka aín papan akama aín ñu ꞌinánkin aín bakë bëchikë bëbukamaribi atunan ꞌinun aín ñu ꞌinánkëxa.

^16-17 Usokin ꞌatankëx ka Job ciento cuarenta baritia ꞌimi tsóakëxa, usai ꞌi ka xënibuti tsótankëx ñuakëxa ꞌaínbi ka aín bakë bëchikë ñunuxun isanan aín bakë bëchikënën bakë bëchikë aín xuta, ꞌimainun aín xutan bakë bëchikë akama tsókëpain ꞌixun isakëxa.