Job 41 - Kashibo-Kakataibo Biblia

¹ Usa ꞌain ka Leviatán kakë ñuina chaiira aribi ñuikin Job ësokin kakëxa ¿Min kaina achúshi mishkitinën a ñuina biti ꞌain? ¿Bianan kaina mia pitima kupín mëxin kuëëtëkërë kati ꞌain?

² ¿Min kaina mëxi aín rëkinu rëatsimianan, achúshi kuëkinan aín kuëshánu biti ꞌain?

³ ¿An kara ꞌë uisabi oxunma ka ꞌat kixun kanan ꞌë kamina nuibakin kuëmëninkin kati ꞌai kixun mi kati ꞌik?

⁴ ¿An kara mi ꞌën kana xënibua ꞌaínbi tëmërakinbi ñu mëëxunti ꞌai kixun mi kati ꞌik?

⁵ ¿Mix kaina abë kuai tuáxu ꞌisáratsubë kuaikë usaribiti ꞌiti ꞌain? ¿ꞌIanan kaina an min ꞌini bëchikë kaman ismainun tëkërëkatankëxun nikinti ꞌain?

⁶ ¿A kara an marukë unikaman maruia abë kuëbikananxun bibianxun, anuxun ñu marukë anuxun maruti ꞌik? ¿Anan kara chánkapaxun aín nami maruti ꞌik?

⁷ ¿Min kaina aín xakábi pëánkabianxa atsíntanun pian ꞌananbi chikárunënribi aín maxkánu ꞌati ꞌain?

⁸ Usokin ꞌaxunmi ꞌurama oxun bikëxa mibë ꞌitsaira tananankë a kamina min manutima ꞌain, ꞌianan kamina uínsaranbi usakin ꞌatëkënkatsi kitima ꞌain.

⁹ Uin kara Leviatán isia ax ka aín iskëinshi rakuë́tan bamai aín ñunshin nëtë́tishi menu nipakëti ꞌikën.

¹⁰ Uin kara ubioisatania ami ka Leviatán nishia, usamaira kana ꞌëx ꞌain usa ꞌikë ka uínbi kushiira ꞌikë ꞌë ubiotima ꞌikën.

¹¹ ¿Uix kara Leviatánbë ꞌakanantankëx uisaibi ꞌikëma asábi ꞌiti ꞌik? Uixi ka kamabi menu ꞌikë unikama usai ꞌitima ꞌikë ax ka ꞌën unio ꞌikën.

¹² Uisa kara Leviatán ꞌikë kianan kana añu kara ꞌaxa kiax kin, aín taë kamaxa kushiira ꞌimainun ka aín namixribi bëtsi ñuinakaman namísama ꞌikën.

¹³ ¿Uin kara aín bichi iruira ꞌianan, manë chupa pañukësa amia katamëkë a bikuananbi aín nami pëánkakin ꞌati ꞌik?

¹⁴ ¿Uin kara kushikian aín rëkin ꞌianan aín kuëbí tsënkaiabi anchatia aín xëta xënxëira akamax mëratanun aín kuëbí bákati ꞌik?

¹⁵ Aín kaxukamax ka biranani manë parókë takáshkikësa ꞌimainun maxá iru usaribi ꞌikën.

¹⁶ Usa ꞌain ka aín xaká upiti aín namimi takáshkikë aín, anu uisa suñuratsubi aín naminu atsinima.

¹⁷ Usa ꞌaish ka aín namikama ax biranani tsënkanankë ꞌaish, uínbi chánkapakinbi raskapatisama ꞌikën.

¹⁸ ꞌIanan ka ax munuma ꞌatinshón kikë ax kaná mëríkë usaribi ꞌikën; ꞌianan ka aín bërux barin urukin pë́kabëtsinkë usa ꞌaish ënxaira ꞌikën.

¹⁹ Aín kuëbínuax panpaira tsi rëkirukësa ꞌikëbë ka anuax tsi sarakikësai ꞌi abisia.

²⁰ Aín rëkinan ka unin kënti cha tsinu ꞌarukëxa, kubini kuini ꞌikë usairibi ꞌinun kuin chikitia.

²¹ Aín uinkë ax ka tsi ëxku ënxaira usa ꞌikën, ꞌimainun ka aín kuëbínuax tsi rëkirukësa usaribi chikitia.

²² Aín tëxá ax ka kushiira ꞌikën usa ꞌixun ka an kamabi uni rakuëmia.

²³ ꞌImainun ka aín nami iruira ꞌaish manë charokësa ꞌikën, usa ꞌaish ka uínbi tëatisama ꞌikën.

²⁴ ꞌIanan ka aín nuitu axribi mapara iru usa ꞌianan, anun ñu rënti maxá iru usaribi ꞌikën.

²⁵ Uínsaran kara ax niruia anun ka kamabi unin rabikë dioskama atux ami ꞌitsaira rakuë́ti abatia.

²⁶ Uínbi ka manë xëtokën ꞌanan masibu ꞌimainun, pia mëtubu ꞌianan chaxkë́bu anun ꞌakinbi uisabi oima.

²⁷ Usa ꞌaish ka manë charóxun anun ꞌati ꞌakë ax basira ꞌikësa usarishi aín namimi tsasibutia ꞌianan ka i pachi chë́kikë ꞌikësai manë axi ꞌia.

²⁸ Usa ꞌikë ka pian ꞌakinbi abámima; ꞌimainun ka maxá ami pukëxbi basi chushikë nikësa usaíshi ꞌia.

²⁹ Uin kara i tëakënën rëkatsi kixun ꞌakëxunbi ka basi xo chushikësara ꞌitánun ax kushi ꞌixun anun ꞌakaskëxunbi i ꞌimia; ꞌianan ka anun ꞌanuxun pia bikin banamia kuatíbi an ka ꞌë uisabi oima kiax rakuë́tima atumi kuaia.

³⁰ Usa ꞌixun ka nirikiani anun kuankin chua me ain shikanën; anun me tuukakë kuënukënën ꞌakësa ꞌitánun me tërëbiania.

³¹ Axa parúmpapa baka ꞌukëmëu nanë́kiani kuankëbë ka ꞌumpax; tsinu kënti chán ꞌarukëx kubini ꞌikësai mumukiabatia, usai ka ro mëskuxun kubiónkëx ꞌikësa ꞌinun ꞌia.

³² ꞌIanan ka anua rakákë anuax nirukiani kuani nanë́kiankin aín rani tiríkikë a anubi uxuira ꞌaish chabáchabá kikë a bakanubi ëbiania.

³³ Uinu ꞌikë menubi ka usaribi ñuina ꞌaíma ꞌikën; a kana ꞌën uinsaranbia raíri ñuinakama ꞌikësai rakuë ꞌinun unioma ꞌain.

³⁴ Usa ꞌixun ka kamabi ñuina raëkëmakama aín kushisamaira ꞌixun, achúshi ꞌapua raíri unikama ñusma okësa usaribi okin ꞌaia kiax ka Dios kiakëxa.