Job 40 - Kashibo-Kakataibo Biblia

^1-2 Usa ꞌain ka Diosan Job kakëxa: ꞌËx kana Dios kamabi kushiñu a ꞌain; usa ꞌaínbi kamina ꞌëbë kuëbikanantisa tan. Usa ꞌain kamina ëbë kuëbikanantisa tankin min bërí ꞌë kati ꞌain.

Jobnën Dios ká bana

^3-4 ¿ꞌËx kana ñu ꞌunánma ꞌain usa ꞌixun karana uisakin mi kati ꞌain? Usa ꞌain sapi kana mi uisakinbi katima ꞌain.

⁵ ꞌËx kana ꞌitsai banan, usa ꞌain ka ꞌëx amiribishi a banatëkënti ꞌaíma ꞌikën.

Diosan ubíokin katëkënun kixun Job ka bana

⁶ Diosan ka amiribishi suñúan chaiira bëkikë anuxun Job katëkëankëxa.

⁷ Mix asérabi kushi sinánñu ꞌixun kamina rakuëkimaishi, mi ñukákë banakama ꞌë kati ꞌain.

⁸ ¿Min kaina ꞌëx isana an upíokin ñu ꞌakëma ꞌai kixun ꞌuchoisatankin, mix ismina upí sinánñu ꞌai kixun sinanin?

⁹ ¿Mix kaina ꞌësaribi kushiira kushi ꞌain? ¿Mixmi banakëx kara ꞌën banasaribi ꞌaish kanákamë ꞌëo banakë usaribi ꞌinunmi banakë ꞌiti ꞌik?

¹⁰ Usa ꞌain kamina mix kushiira ꞌianan ꞌapuira ꞌixun ꞌakësokin atun pañukë chupa pañuti ꞌain, usakinmi ꞌakëbë ka unikamax mix kamina upí uni ꞌianan bëtsi unikamasamaira ꞌai kiax kiti ꞌikën.

¹¹ Axa ꞌëx kana uni itsisamaira ꞌai kixun sinani rabiakakë unikama a kamina: mix atumi nishkin min kushínbi uisa kaina oisatani usakin ꞌati ꞌain.

¹² Usakin ꞌakin kamina mix kushi ꞌixun axa rabiakakë unikama a min kushínbi, uinu kara ꞌia anuabi barixun ꞌanan sinan ꞌatimañu unikamaribi ꞌatima okin masóti ꞌain.

¹³ Usokin ñumitankëxun kamina uni anu maínti ꞌakë anu maínti ꞌain, usokinmi ꞌakëx ka ñukë unikamaxa ñu ꞌatima ꞌakë unikama sipunu ꞌikë usaribi ꞌiti ꞌikën.

¹⁴ Usokinmi ꞌaia kana ꞌënbi mix kushiira ꞌixun, kamina usakin ꞌai kixun mi ꞌunánti ꞌain.

¹⁵ Min kamina chaiira ñuina bakainu a sinánti ꞌain, ꞌën kana mi ꞌakësaribi okin uniokën: an ka vaca bënëkaman ꞌakësaribi okin basi pia;

¹⁶ usa ꞌaish ka kamabi aín namikamanu, aín kushi ꞌianan aín kisi kamanubi aín kushi ꞌikën.

¹⁷ Aín inax ka kunxan isaribi iru ꞌikën, ꞌianan ka ain taënu ꞌikë ain punukamax bëxkuñusabu ꞌaish rëxkë rëxkëabu ꞌikën.

¹⁸ ꞌIanan ka aín xokamax manë sëbía naxabañu chabu iskësaribi ꞌikën.

¹⁹ A kana ꞌën bëtsi ñuinakama ꞌakësokinma upíira ꞌitánun uniokën; usa ꞌixun kana ꞌëx kuëënkin ꞌëinshi bamanun a ꞌimiti ꞌain.

²⁰ An ka ninua, anuaxa ñuina raëkëmakama kuaikë anua ni pëi basi akama pia.

²¹ Usa ꞌain ka taxankaru bakanu bukukë tëmú tanti rakanan, tutish noruax a mëu unëti ꞌian kiankë anu rakatia.

²² ꞌIanan ka i tapun chinan an tupë́onkë anuribi ꞌia, ꞌimainun ka i xëxá kuëbí nikë tapunakëkë an bëararakë mëu anuribi rakatia.

²³ Usa ꞌaish ka baka ꞌikuatsinkëbëbi, ami rakuë́tima; ꞌianan ka bakan mapurukin aín rëkin mapurukëxi bënëtima asábi ꞌia.

²⁴ ¿Uin kara ñatankin bixun aín bëru rabë́ ëchiananbi, mëxin tëkërëkati ꞌik?