Job 4 - Kashibo-Kakataibo Biblia

ꞌInsíanx nuibakatia ain ꞌunánkë unikaman Job ká bana Elifaz

^1-2 Ësakin ka Elifaznën an ꞌunánkë uni ꞌikë Job kakëxa, ꞌën sinánkëx sapi kamina bëtsi unin mi nuibakin bana ñuixunti kuëënima nishti ꞌain, ꞌaínbi kana ꞌën mi bana ñuixukin kaima ꞌixun upíokin sinántima ꞌain.

³ Min kamina an bana ꞌunánkëma uni bana ñuixunkin uisai kara tsóti ꞌikë kixun ꞌunánmiakën, ꞌimainun kamina an munu sinánkë unikamaribi ꞌakiankën;

⁴ min kamina upiti tsótibia ax ꞌatimati tsókë unikama atux ꞌikësabi upiti tsónun kixun kakën, min kamina upiti tsókinbia an ꞌatimati tsóti sinánkë unikama a usai ꞌiama ꞌinun kakin sinanamiakën,

⁵ ¿usa ꞌaínbi kaina bërí ꞌinsiax tëmërai nuibakatia ꞌën ꞌakësabi okin kana, ꞌati ꞌai kixun kushiokin sinanima usai ꞌin?

⁶ Mix kamina achúshi uni an Dios kuëënkësabi okin ñu ꞌakë a ꞌain, ꞌimainun kamina mix achúshi uni an Diosan kakësabiokin ꞌakin upíokin ñu ꞌakë ꞌain, ¿usa ꞌaíshbi kaina mix Diosmi kushiti sinanima manutisa tanin?

⁷ Min kamina ꞌë katima ꞌain achúshi uni ñu ꞌatima ꞌakëma ax kara, Diosan ꞌatima okëxa ꞌikë ꞌiti ꞌikë kixun.

⁸ ꞌËn kana ꞌitsa baritia tsókë ꞌixun uisa ñukama karana ꞌakën a ꞌunan, ꞌimainun ka uin kara ꞌatima ñuira ꞌakin a tanti bana ꞌianan, ñu ꞌatimaira ñunshinakëkin ꞌai ꞌaxëkë ꞌikë, a unix ka uin kara ñu ꞌapáxun uiti ꞌitsa kara ꞌapáxa ati ꞌitsabi aín bimi bitsia usaribiti anunbi ꞌatimati tëmërai nuibakatia.

⁹ Usa ꞌain ka Diosan atún ñu ꞌatima ꞌakëbë atumi xuamati nishkin, asérabi masókin suñuanën kushiira bëëkai anu ꞌibúkin ñu masókë usaribi okin ꞌaia.

¹⁰ Usa ꞌain ka uni ꞌatimakama an bëtsi unikamami ꞌatimaira banai atumi nishi paru inuán në́ti kuëëkësari ꞌiabi Diosan, ain paka tsasipakin nëtë́miti ꞌikën.

¹¹ Usakin ꞌakëx ka uni ꞌatimakama ax paru ꞌinúanëx ain paka tsasikë ꞌixun pima chumínbuax bamakësa usaribi ꞌiti ꞌikën, usai ꞌikëbë ka atun bakë bëchikë bëbu ꞌimainun xanux, ain tita bamakëbëa paru ꞌinúanën tuákamax abisi tsuákikë usaribi ꞌiti ꞌikën.

¹² Banaimaishi uax ꞌënu bëbakin unin kakësa ꞌitánun ka ꞌë baxëxkin kakëxa, ꞌaínbi kana kuaisamara ꞌitanun munura banai kiabi aín bana kuakën.

¹³ Achúshi imë́ kana kamabi uníxa ꞌuxkënan bikëx ꞌuxan ꞌëxribi ꞌuxunbi, ꞌatimakin namáx a sinani masáti ꞌuxima ꞌiakën.

¹⁴ Usai ꞌikana ꞌë rakuëtan bikëx ꞌaisamaira rakuë́ti; ꞌën xo kamabi bërërui ꞌiakën.

¹⁵ Usai ꞌikin kana ꞌën bëmánan suñun bëkakëxun tankësa tani rakuë́ti ꞌën namikama raxuturui ꞌiakën.

¹⁶ Usai ꞌikin kana uix kara anu ꞌikë kixun sinánkën, ꞌaínbi ka aín bëmánan istisama ꞌiakëxa. Usa ꞌaish ka ui kara kixun ꞌunántisama ꞌiakëxa. Usai ꞌikëbëa kamáxbi paskësarua ꞌinun ꞌuxi nëtë́këbëtan kana ësai kia achúshi bana kuakën:

¹⁷ “¿Uix kara an upí ñuishi Diosan iskëxun akë uni ꞌiti ꞌik? ¿ꞌIanan kara an unio ꞌixuan Diosan iskëx uni an ñu ꞌatima ꞌakëma uni ꞌati ꞌik?

¹⁸ Usa ꞌain ka Diosan aín nëtënuxun ñu ꞌaxunkë aín ángel kamamibi atux ka ñu ꞌatima ꞌakëma ꞌikë kixun atumi sinanima. Usa ꞌixun ka Diosan aín ángel kamanribia ñu upiokin ñu ꞌaiama isia,

¹⁹ ¡usa ꞌain ka unix ñu ꞌatima ꞌakë anunbi kushima ꞌaish, xubu ꞌakin me bachunu nitsinkin ꞌakë usaribi ꞌikën, usa ꞌikëa suñun nipakësa usaribi ꞌaish ka bisa chakakësa okinshi chakakë ꞌiti ꞌikën!

²⁰ Usa ꞌaish ka uni ënë nëtënu tsótax uínsaran kara aín bamati nëtë ꞌikëbë bamai nëtë́tia; usai ꞌika istëkëntima oi ashiti usakin sinánkë ꞌaímabi bamaia.

²¹ Usa ꞌain ka unin tsótinëx bënëtishi nëtë́ti ñuman të́kakë usashi ꞌikën; usa ꞌain ka uni kamabi ñu ꞌunanmaxi bamaia kiax ka Elifaz kiakëxa.”