Job 39 - Kashibo-Kakataibo Biblia

¹ ¿Min kaina uínsaran kara raëkëma cabrakamax aín tuá bakënia kixun ꞌunán? ¿Min kaina uisai kara carnero xanux aín tuá bakënia kixun isan?

² ¿Min kaina uiti ꞌuxë ꞌikëbë kara aín tuá bakënia kixun ꞌunanin?

³ Aín tuákën paëokëx ka anuax bakënux, rakabutankëx uisaibi ꞌima aín tuá bakënia.

⁴ Usai ꞌitankëx ka aín tuákama ax kani kushikin tankin ninua ñu pi, ꞌura kuankin aín tita ëntankëx amiribishi aín titanu utëkënima.

⁵ ¿Uin kara raëkëma ñuina asno kakë a atuxi nitsia uisaibi ꞌiaxma ꞌinun ëankëx? ¿Uin kara uinu kuani kara nisatania anu kuania ninun ëankëx?

⁶ ꞌËn kana anua atux bukunun uinu kara ꞌiti ꞌikë istankëxun, anu uni ꞌikëma me sapan bashiñu ꞌitsaira anu tashi ꞌaia anu ñu kókëma anu ꞌinun ëankën.

⁷ Usa ꞌain ka a ñuinakamax ëmanuaxa ꞌaisamaira ñu banakë ꞌain a ꞌura ꞌia, usa ꞌixun ka atun caballonuxun an ꞌarakakë ñuinakama buánkin kuënkëonkin kakë unikama aín banabi kuatima ꞌia.

⁸ Usa ꞌaish ka atun piti bari matá me anubi kuankin pasto barianan, xubi kookë a pinuxun bari nitsia.

⁹ ¿Min sinánkëx kara vaca bënë raëkëma në́kë ax mi ñu mëëxun baiti min anu ñuina ꞌuxti ꞌakë xubunu imë́ ꞌuxi kuanti ꞌik?

¹⁰ ¿Min kaina vaca bënë raëkëma anúan me tukabianti imi manë pará tëkërëkaxun ubíokin ꞌamikëxuan me, tukananbi mi kaxú kuankin i saniribi punun ꞌamiti ꞌain?

¹¹ ¿Min kaina ax kushiira ꞌixun ka ꞌën tëtikama ꞌë ꞌaxunti ꞌikë kixun sinánkin an mi ꞌaxúnun ënti ꞌain?

¹² ¿Min sinánkëxun kara an mi ꞌakinkin min ꞌapákë ñu naënua bitsia bitsínkin anuxunmi tákati me mëníokë anu bëxun mi bukunxunti ꞌik?

¹³ Anu ka avestrus kakë ñuina pëchiñu ax ꞌikën: ax ka kuëëni aín pëchi shaíkai pëpëkia, cigüeña kakë ñuina pëchiñunën pëchisa ꞌaish ꞌia,

¹⁴ ꞌimainun ka masinu batsioxun anuaxa, barin xanokëx axi uninun ain batsi ënia.

¹⁵ Usokin ënkin ka unin ka chakati ꞌikë kixun sinanan, ñuinakan ka ami kikin amáti ꞌikë kixunbi sinánkimaishi ënia.

¹⁶ Usa ꞌixun ka abia kanitanun aín tuamasa ꞌikë aín tuá rakania, ꞌimainun ka tëmërakin kana batsio kixun sinanan bërúankëxma kara ꞌën tuá uisai ꞌiti ꞌikë kixunbi sinanima.

¹⁷ Usaia ꞌikë ax ka usokin kamina ñu ꞌati ꞌai kixun sinánun ꞌën ꞌimiama ꞌikën; usakin ꞌakin kana upíokin sinánkin ñu ꞌanun ꞌamiama ꞌain.

¹⁸ Usa ꞌaíshbi ka anua tsókë anuax nirui nikiani kuankin, caballokama ꞌimainun an nikinkë unikama abi ëbiani munu kuanima kuania.

¹⁹ ¿Min kaina caballo kushi ꞌinánan, aín tëxanu an upí ꞌimiti buñu ꞌinun ꞌimiakën?

²⁰ ¿Min kaina champu ꞌikësai churuni banai aín rëkin rëshin kikin, uni rakuëminun ꞌimiakën?

²¹ Usa ꞌixun ka ain taën me basai, rakuë́timaishi anuax ꞌakanankë anu uix kara ꞌirutisa tania axa anu ꞌiruax ꞌakananun kuania.

²² Usai ka uisa ñu kara ax inutia ax ꞌaisamaira ꞌaínbi ami rakuë́ti bëruankakiani amotan kuanima, manë xëtokë unin tuinkë amibi kikiani kuania,

²³ kuani ka an caballo nikinkë unin aín manë xëtokë anu ꞌaruti aín xaká a banamianan, atun pia nikëx kukísh kikiani kuankëbë rakuë́tima.

²⁴ Usai ꞌi ka ꞌitsaira abati uínbi nitsinaisama kiani kuani, uinu kara kuainsatania anu kuania, kuani ka uin kara aín manë banañu banoia a kuati an nikinkë unin bëruainsama ꞌinun ꞌura kuani nitsia, nitsi ka ubitimama ꞌima shaíkia.

²⁵ Usa ꞌain ka ꞌakanankin pëukia manë banañu banoia kuati aribi munuma ꞌuranxunbi tani munuma banaia, usai ꞌikin ka ꞌakania kixun tania; usa ꞌain ka ꞌuranxunbi suntárukama ꞌimainun aín caballokama aín ꞌisha xëtia, xëanan ka suntárunën kushikaman aín suntáru, amia nishkë unikama ꞌakin munuma banakin kakë aribi tania.

²⁶ ¿Mix an kamabi ñu ꞌunánkë ꞌixun kaina usai kamina nuanti ꞌai kixun an tëtë ꞌunánmikë a ꞌain ꞌianan kaina, manainra kuania baka rëbumiu ki kuani nuanun ꞌunánmiakën?

²⁷ ¿Mix karamina an tëtëkamë ꞌëo in papa pëñan anu batsioxun aín na ꞌanun kakë a ꞌain?

²⁸ Ax ka nëtë ꞌimainun ꞌimë́bi bashinua ꞌikë xaxun pobu kini anu ꞌia, ꞌimainun ka anua uínbi ubiotimanu bashi rëbunu aín na ꞌaia.

²⁹ Usa ꞌain ka anuxunbi uinua kara ain piti biti ꞌikë kixun ꞌuranxunbi istankëxun bitsia.

³⁰ Usa ꞌain ka aín tuákama ñuina imi xëamia; ꞌimainun ka uinua kara ñu bamakëkama mëraia anu bukubukë unin isia.