Job 38 - Kashibo-Kakataibo Biblia

Diosan Job ká bana

¹ Usa ꞌain ka ax kikë banakama ñuikin suñúan chaiira ꞌikuatsini bëkikë anuxun Diosan Job kakëxa:

Diosan Job kakëxa

² ¿Mix añuira ꞌaish kaina ꞌën ꞌakë ñukama ñui ꞌatimatishi banai ñu ꞌunánma uníxa banakësai banai kian?

³ Bërí kamina ꞌë asérabi rakuëma ꞌixun, ꞌën mi ñukákë banakama ñuikin ꞌë kati ꞌain:

⁴ ¿Uinu kaina mix ꞌën me uniotabakëbë ꞌiakën? ¡Asérabi upíokin min ënë banakama ꞌunánkë ꞌixun kamina ꞌë kati ꞌain!

⁵ ¿Min kamina ꞌunanin uin kara uiti cha ꞌati kara kixun sinántankëxun tupuankëxa, ꞌianan kara uisakin ꞌati ꞌunánkë ira ꞌixun ꞌakëx?

⁶ ¿Añu ñuiranu nankin ꞌa kara ami birukin akama ax ꞌik? ¿Uin ira ami ꞌiti maxá chaiira namainun kara,

⁷ ángelkamax kuëënmainun ꞌispakamanribi xabá ꞌitánun pë́kakëbë kantakëx?

⁸ Parúmpapa ꞌumpax menuax chikíkëbëtan kara, ¿uin nunkurui ꞌikëbëtan an bëarati aín xëpútikama nankëx?

⁹ ꞌËn kana parúmpapa chupa achúshi ꞌinankësa okin kuin ꞌinánkën, ꞌianan kana kuru nëtë aín chupasa ꞌaísha anuax nirunun ꞌinánkën.

¹⁰ ꞌËn kana parúmpapa ꞌumpax me mapuruima uinu kara sënënia anuishi rakanun ꞌimianan, kana xëpúti chaiiran ꞌakësa okin anun xëpuakën.

¹¹ Usokin ꞌaxun kana parúmpapa kakën: Ënu sënë́inshi kuëpukan kanan kamina; urikuankin me mapurutima ꞌain; anu sënë́inshi bëchunti ꞌën kakë anuishi sënëni kamina bëchunti ꞌain.

¹² ¿Min kaina uínsaran nëtënbi nëtë ꞌixun nëtë xabatia iskin barin ka urukin upíira ꞌinun pë́kati ꞌikë káma ꞌain?

¹³ ¿ꞌIanan kaina barin urukin mekama pë́kakëbë ka uni ꞌatima sinánñukama unë́ti ꞌikë kixun kakën?

¹⁴ Usa ꞌain ka barin urukin menu pëkakë an kamabi ni pë́kabëtsinkë ax chupa pukukësa ꞌinun mërati ꞌikën;

¹⁵ usai ꞌikëbëtan ka ñu ꞌatima atishi sinánkë unikaman nëtë xabákëbëtan, uni ꞌatima oti sinánkëkama a ꞌaima.

¹⁶ ¿Min kaina nanë́kiani kuanxun anuaxira parúmpapa ꞌumpax chikíkë a isan?

¹⁷ ¿ꞌIanan kaina min uinuira kara uni ñukëkama ax kuania kixun anúan kuankë aín xëputi a isan?

¹⁸ ¿Min sinánkëx kara uiti naxbaira me ꞌikë kixun kaina sinanin? ¡Min asérabi kamabi ꞌunánkë ꞌixun kamina ꞌë kati ꞌain!

¹⁹ ¿Uinuaxira kara nëtë xabá ꞌimainun imë́ bëánkibukë ax unin ñu nankësa ꞌaish aín?

²⁰ ¿Min kaina uinu kara me sënë́ankëxa anu buánxun, nëtë xabá ꞌimainun imë́ bëánkibukë anua ꞌikë aín xubunua uni ukësa Kuatsinia anubi bëtëkënti ꞌunán?

²¹ ¡Min kamina ꞌitsa baritia tsókë ꞌixun akama ꞌunánkë ꞌiisa ꞌain, usa ꞌain sapi kamina akamax ꞌiisama pain ꞌain bakë́ama ꞌain!

²² ¿Min kaina anu kuanxun anua matsin tita ꞌikë, a ꞌimainun anua matsi bëruñu ꞌikë aribi anu kuanxun isan,

²³ ꞌën anun uni atúxbi ꞌakanankë nëtë ꞌanan anúan, tëmërakë nëtë xuti a isan?

²⁴ ¿Min kaina uimiu kikiani kara kaná mëriti ichukë ax kuania kixun ꞌunanin? ¿Uisai ꞌikiani kara amiaxa bari urukëmiaxa bëkikë suñu ax mekama oi bëkin?

²⁵ ¿Uin kara uñe ꞌibútia anu ꞌumpax xururukë ax chikiti me naëkë anua ampë́nkikë, usaribi ꞌimianan, kaná mëríkëbë nëtë masá kuatsintankëx ꞌuí ꞌibúkian,

²⁶ anu uni ꞌikëma menua ꞌibúnun ꞌimianan anu uíxbi ꞌikëma me anuribi ꞌibúkian,

²⁷ me ëskikë chabókëbëa anuax ñankáishi ꞌaíshbi ñu koónun ꞌimiax?

²⁸ ¿Uix kara ꞌuí ꞌimainun kuénkuru aín papa ꞌik?

²⁹ ¿Uix kara matsi iru aín tita ꞌianan nibí ꞌibúkë aín ꞌIbu ꞌik?

³⁰ ¿Uin kara parúmpapa ꞌumpax mapara ꞌikësai iruira ꞌikëbëa ꞌumpax bërakati ꞌinun ꞌimin?

³¹ ¿Min kaina ꞌispa këñurui timë́kë axa ꞌispón Orión kakë abëira ꞌima a ꞌuri ꞌinun ꞌimin?

³² ¿Mix kaina an pëkarakuatsinia nëtë xabakuantsinkëbëa ꞌispón cha ax pëkinun ꞌimikë a ꞌain? ¿Min kaina ꞌispakama këñurukëbëtan anua Osa chakama ꞌimainun Osa chukúma anu mëranun ꞌimin?

³³ ¿Min kaina axa naínu ꞌikë ñukama an usai kamina ꞌiti ꞌai kixun ꞌunánmikë a ꞌunanin? ¿Usa ꞌixun kaina min a tanti bana ax kikësabiokin ënë menuxunribi usakinbi ꞌain?

³⁴ ¿Min kaina nëtë kuin, anuax ꞌuí ꞌitsaira ꞌibúkian ꞌumpax me mapuminun kati ꞌain?

³⁵ Minmi kaná mëríkë a amanu kamina kuanti ꞌai kixun kakëx kara, ¿an mi ënu kana ꞌai: Min kakësabi oi kana ꞌiti ꞌai kixun mi kati ꞌik?

³⁶ ¿Uin kara Ibis kakë ñuina pëchiu ꞌimainun ꞌaoripa aín bënë añu kara ꞌati ꞌikë kixun ꞌunánun ꞌimiakëx?

³⁷ ¿Uin kara ñu ꞌunánkëira ꞌixun uiti kuin kara axa kixun ꞌunánti ꞌik? ¿Uin kara nëtë kuin anuax ꞌuí ꞌibúkin,

³⁸ me kupúkë axa chabáti chua ꞌinun tsëtsërui ꞌikë axa ëski birananun ꞌimiti ꞌik?

³⁹ ¿Mix kaina an paru ꞌinúan ain titan, piti bixunkëxun puchákin pitankëxa,

⁴⁰ aín kininu unëananbi i bëukukë kamanan rakáxun ñuina aín piti aia binuxun kaínun ꞌimin?

⁴¹ ¿Uin kara nónshiansa pëchiu ñuinakama, aín tuákamaxa nánuax pikatsi sharákëbëtan abá pimiti baria na piminun ñu ꞌinanin?