Job 31 - Kashibo-Kakataibo Biblia

Job kana uisa ñubi ꞌai ꞌuchakëma ꞌai kia bana

¹ Usakin pain an ꞌunánkë uni rabë́ ꞌimainun achúshi a katankëx sënë́an ka Job axribi banai ësai kiakëxa. ꞌËnbi kana sinánkë bënëñu xanukama ꞌimainun kana bënëñuma xanu uisa ꞌixunbi kuëëanma ꞌain kixun kana sinánkën.

² ¿Uisa ñuira kara kamabi kushiñuira Dios an naí mananxunbi, achúshi achúshi uni ñu ꞌinánti ax ꞌiti ꞌik?

³ ¿An ꞌatima ñu ꞌai ꞌuchakë unikama ꞌimainun ꞌatima unikama ainama kara ꞌatimañu inuti tëmërati ꞌax ꞌik?

⁴ ¿ꞌIanan kara Diosan ꞌën ꞌakë ñukama iskin ꞌunanima ꞌianan, ꞌëx nikë kamabi ꞌunanima ꞌiti ꞌik?

⁵ ꞌËx kana asérabi kian uínsaranbi kana ñu ꞌatima ꞌanan uni kana, paránti ꞌai kixun sinánxun paránkëma ꞌain.

⁶ ¡Usama ꞌikë ka Diosan anun unin ñu ꞌëñë tupúnti ꞌakë anu ꞌën ꞌatima ñu ꞌakëkama tupunkin uisa kara oisatania usokin ꞌati ꞌikën, usakin ꞌaxun ka ꞌën karana ñu ꞌatima ꞌakë ꞌai kixun ꞌunánti ꞌikën!

⁷ ꞌËn karana ñu upí ꞌati ꞌunanxunbi a ënkin ñu ꞌatima ꞌan, ꞌanan karana usai ꞌikin bëtsi unin ñu kuëëan, ꞌianan kara bëtsi unin aín ñu mëkamakë ꞌënua mëraxa,

⁸ usakin ꞌën ꞌakë ꞌikë ka bëtsi unikaman ꞌën ꞌapákë ñukama bixun piínun Diosan ꞌamiti ꞌikën, ꞌimainun ka ꞌën ꞌapá ñukamaribi aín tapun këñunbia bëtsi unikaman ëchinun ꞌamiti ꞌikën.

⁹ ꞌËn karana xanu bënuñu ꞌën xanu ꞌikëmabi këmëkësakin uisai kara ꞌia kixun isanan, ꞌë rapasu ꞌikë unin xanu aratsushi ꞌikë ꞌutunkin isan,

¹⁰ usakin ꞌën ꞌakë ꞌain ka ꞌën xanu bëtsi uni ñu mëëxunkë ꞌianan, uni ꞌunánkëma kamanribi aín nami ꞌati ꞌikën.

¹¹ Usakin ꞌën xanu ꞌakë ka rabintanun; uisai kara uni ꞌia an mëníokë ꞌapukaman ꞌë ꞌatima okë ꞌitsíanxa.

¹² Usa ꞌain ka ꞌën ñu ꞌatima ꞌakë ꞌain tsi rëkirukin ñu nënkësokëx, kamabi ꞌën ñukamax këñutsianxa.

¹³ An ꞌë ñu mëëxunkë unikama ꞌimainun xanukamañu pain ꞌixun kana añu ꞌaxúnun kara ꞌë kaia, usakinbi ꞌaxuankën.

¹⁴ ¿Uisokinra karana ꞌën Dios ꞌëa ꞌatima oisatankëxun kati ꞌain? ¿Uisokin karana usakin ꞌën ꞌakë ñukama ñukákëxun asérabi këmëkinma kati ꞌain?

¹⁵ An nukama nun titan puku ꞌukëmëu uninun ꞌimia Dios anbi ka aturibi ꞌë ꞌakësaribiokin anun tsóti ꞌinánkëxa.

¹⁶ Uisaxunbi kana ꞌën uni ñuñuma an kuëënkë ñu ꞌinanima ꞌiama ꞌain, ꞌimainun kana kasunamëkë xanukamaribi pitiñuma ꞌaísh numin ꞌi tsotia isëshiama ꞌain.

¹⁷ Uinsaranbi kana ꞌën pikë ñu a papañuma ꞌimainun titañuma tuákama ꞌinánkinma ꞌëbi piama ꞌain.

¹⁸ Usa ꞌixun kana ꞌibuñumakë tuákama unían aín bakë bëchikë ꞌibu ꞌakësokin nuibakën; ꞌimainun kana kasunamëkë xanukamaribi ꞌitsaira ꞌakiankën.

¹⁹ ꞌËn kana uix kara chupañuma ꞌikëa matsin ꞌakëx ñutisa tania iskin chupa ꞌinánkën, ñuñuma uni aribi anúan rakuti chupañuma iskin aribi nuibakin anua rakuti chupa ꞌinánkën,

²⁰ ꞌën ꞌarakakë carnero aín ranibi bitankëxun chupa ꞌaxun kana amia xananun ꞌinánkën, anun xanai ꞌikin ka ꞌën ꞌunánkë uni an asábi ka kixun ꞌë upíokin kakëxa.

²¹ Uinsaranbi kana papañuma titañuma tuákama ꞌapukamami kuaikësa ꞌinun mi kana usokin ꞌati ꞌai kixun káma ꞌain.

²² Ësokin asérabi ꞌaxmabi ꞌëx këmëi kikë ꞌain ka ꞌën pëñan rabë́ ënë tsasikanti ꞌikën; usokin ꞌanan ka ꞌën tëkënpata aribi ꞌë pë́nchicanti ꞌikën.

²³ Usa ꞌain kana Diosan ꞌë ꞌatimokin tëmëramiti anun rakuëakën; ¡usa ꞌain kana ax ꞌapu kushiira ꞌixuan uisakin kara ꞌakëxun ꞌën tënëama ꞌitsían!

²⁴ Uinsaranbi kana kuriñu ꞌianan kuríkiñu ꞌaíshbi ꞌëx ami katamëama ꞌain.

²⁵ Uinsaranbi kana kuríkiñu ꞌianan ꞌaisamaira ñuñu ꞌaishi, anun rabiakati usa kana ꞌëx ꞌai kiama ꞌain.

²⁶ ꞌËn kana barin pë́kabëtsinia isanan, ꞌuxën imë́ pë́kakë aribi isan,

²⁷ ꞌaínbi kana uínsaranbi unëxun rabianan, ꞌën mëkën bëtsuku kakin tanxuama ꞌain.

²⁸ Ësokin ꞌai ꞌëx ami ꞌuchaia ka Diosan ꞌë ꞌatimo ꞌitsíanxa; ¡usakin ꞌën ñu ꞌakë ax ka Dios ka naínuma ꞌikë kixun sinánkin ꞌën ꞌakë ꞌiti ꞌiaxa!

²⁹ Uinsaranbi kana axa ꞌëmi nishkë uníxa ñu ꞌatima inuti tëmërakëbë ami kuai kuëëni ꞌiama ꞌain; ꞌianan kana unían ꞌatima okin ñuikëbëbi a kuati kuëëanma ꞌain.

³⁰ Uinsaranbi kana axa ꞌëmi nishkë uni ka ꞌatima ñu inuti ꞌikë kixun sinánxuanan ax ka ñuti ꞌikë kiaxbi kiama ꞌain.

³¹ ꞌËx abë ꞌikë uni achúshinën bëtsi menu ꞌikë uni mërakin kuai oisatania kana,

³² ëman kamina ꞌuxti ꞌai kixun káma ꞌain. Usakin ꞌakinma kana ꞌën xubu xëókaxun bëtsi menuax ukë unikama anu atsímiakën.

³³ Uinsaranbi kana ꞌën ꞌakë ñukama bëtsi unikaman ꞌakësokin unëama ꞌain, ꞌimainun kana ꞌën ñu unëxun ꞌakëmasa ꞌinuxun ꞌama ꞌain

³⁴ unikamami rakuë́kin. ꞌIanan kana uínsaranbi banaima ꞌën xubunu xëpuax ñuitsimarua, uni këmëi banakë kamami rakuë́ti ꞌiama ꞌain.

³⁵ ¡Uin kara ꞌëx kia kuati ꞌikën! Usa ꞌain ka ꞌëx kikë bana ënë; ¡Dios kamabi kushiñuira an ꞌën bana kuakin ꞌë kati ꞌikën! Usa ꞌain ka mix kamina usai ꞌia kakin kirikanu kuënëoxun ismikin ꞌë kati ꞌikën,

³⁶ usakin ꞌakëxunbi kana mënin sinánñuishi ꞌixun ꞌën nuitunën sinánkin unia aín maiti maxkánu ꞌakësokin ꞌën ꞌimiti ꞌain.

³⁷ Usa ꞌain kana uisai karana ꞌia a kamabi ñuikin Dios kati ꞌain, usakin kai kana ñu ꞌatima ꞌakëma ꞌë isnun uinu kara Dios ꞌikë anuaxbi abë banati ꞌain.

³⁸ Usa ꞌain kana, ꞌën mekamax ka ꞌëmi ꞌatimai banakin naínuabi Dios kaikikëma ꞌikë, usa ꞌain axribia tantinun ëan.

³⁹ ꞌËx kana ësai asérabi kin ꞌën bëtsi unin ñu ꞌapákëkama mëkamanan, an ñu ꞌapákë unikama kupíokinma atun ñu bikë ꞌain ka

⁴⁰ ¡ꞌën menu ꞌapákëxbi trigo ꞌiruima muxa ꞌiruti ꞌikën, ꞌianan ka cebada ꞌapákëxi ꞌiruima xubi ꞌatima ꞌiruti ꞌikën! Ësai kikin ka Jobnënribi aín ꞌunánkë unikama kakin sënëonkëxa.