Job 3 - Kashibo-Kakataibo Biblia

Job tëmërai anuan bakë́an nëtë ñui kia bana

^1-2 Usai ꞌitsaira paë tani tëmërai nuibakati ka uisa bananbi banaima ꞌitankëx ka Job, anúan bakë́an nëtë ñui ꞌatimati banai ësai kiakëxa.

Job

³ ¡ꞌAtima okë ka anun ꞌën titanuax tuá ꞌinux ꞌëx unikë a imë́ ꞌiti ꞌiakëxa! ¡ꞌAtima okë ka anúan ꞌën titan ꞌë bëbu tuá okë nëtë axribi ꞌiti ꞌiakëxa!

⁴ ¡ꞌUisati kara ꞌën titan ꞌë tuá imë́ Diosan nëtë xabá a ꞌinun pë́karatima ꞌimë́ ꞌinun ꞌimiama ꞌikën!

⁵ ¡Uisati kara bëánkibukë këxtuira an ꞌibúkin a nëtë mapumainun, kuin tunan ꞌibúkin anribi mapukë ꞌinun ꞌimianan, ꞌimëa nëtë bëankikëbë ami rakuë́kë usaribi ꞌitánun maputi ꞌiakëxa!

⁶ ¡Uisati kara anúan ꞌën tita ꞌë tuá imë́ ax bëánkibukëmi ꞌi nëtë́ama ꞌikën, usai ꞌia ꞌain ka uínbi nëtë ꞌuxë baritia akama tupuntima ꞌiakëxa!

⁷ ¡ꞌUisati kara a imë́ ꞌën titax tuakëma xanusa ꞌiama ꞌikën, usa ꞌain ka uíxbi a imë́ishi an ka tuaia kixun ꞌunani munuma sharáma ꞌitsíanxa!

⁸ ¡Uisati kara ñubë́ unikaman ax kushiñu ꞌixuan Leviatán kakë ñuina an kushi ꞌinánkëxun an imë́ a ꞌatima okin sinánxuanma ꞌikën!

⁹ ¡ꞌUisati kara pë́karakuatsinkëbë ꞌispónkama ax pëkima ꞌianan, nëtëribi xabá kuatsinkëbëtan barin urukin pë́kabëtsinkëbë xabá ꞌitima ka ꞌiakëxa, usa ꞌain ka unin pë́karatia nëtë upíira ꞌikë isama ꞌitsíanxa!

¹⁰ ¡ꞌAtima okë ka ën titan anun ꞌë tuá imë́ ax ꞌiti ꞌiakëxa, usa ꞌain kana ënë menuax tëmëranux bakë́ama ꞌitsían!

¹¹ ¿Uisa ꞌaish karana ꞌën titan puku mëuküax bamanan ꞌën titan naachi kikin ꞌë rëmumëkëishi chikíama ꞌik?

¹² ¿Uisati kara ꞌën titan aín kisinu rakanxun kaniokin ꞌë ain xuma ꞌamikin kaniokëx?

¹³ Usokin ꞌakëx ñua ꞌaish kana ꞌëx, bëríbi upitax tsóti tëmëraima asábi ꞌitsían,

¹⁴ usai ꞌi kana ꞌëx ꞌapukama ꞌimainun an ñu ꞌaxunkë aín kushikamabëtan xubu chaiirabu ꞌikëbia an rurupa ꞌikëa ꞌatëkënkë unikamabë ꞌitsían,

¹⁵ ꞌimainun kana bana mëníokë ꞌapukama aín xubunu kuri ꞌimainun kuríki bukúnkë anu ꞌitsían.

¹⁶ ¿Uisoti kara xanu aín nachikiti ꞌuxë sënë́nkë ꞌaímabi aín tuá nanipakëkë usaribi okin ꞌanan, aín titan pukumëuküaxbi tuá ñukë ꞌakësaribi okin ꞌë mainkama ꞌik?

¹⁷ Ñukë mainkëxun ka an ñu ꞌatima ꞌakë unikaman ñu ꞌatima ꞌatëkëanan bëtsi unikamaribi ꞌatima otëkënima, ꞌimainun ka axa tëmërai tsóti atsánkë unikamax ñutankëx atsanx ꞌianan tëmërai ꞌitëkënima asábi tani tsotia;

¹⁸ usaribiti ka bëtsi unikama ñatanxun tëmëramikë unikaman ñukin anuxun chuámarua tani kuëënia, usai ꞌikin ka an ñu mëëia bërúankë unikaman munuma banakin kakëxun kuati atsánkë akama nëtëtia;

¹⁹ anu ka uni ñu ꞌunanbu ꞌimainun uni ñu ꞌunánkëmabu akamaxbi sënën ꞌikën, ꞌimainun ka an ñu tëmërakin mëëkë unikama anbi an ñu mëëxunkë unikama ñu mëëxuntëkënima.

²⁰ ¿Uisa ꞌixun kara Diosan ënë nëtënu tsotia tëmëranux bakënun uni ꞌimin? ¿Uisa ꞌixun kara Diosan axa ꞌitsaira tëmërakë uni a basi pain tsónun ꞌimia,

²¹ usa ꞌain ka an ñuti barikë uni ax bënëtishi ñuima, usa ꞌain ka ñu upíira ꞌaish kupíikëira ꞌakësaribi okin aín ñuti baribi uni ax ꞌishtun ñutima ꞌik?

²² Usa ꞌain ka unix aín ñuti nëtë ꞌikëbë ñuia maínkëx kuni kuëënti ꞌikën.

²³ Usa ꞌain ka Diosan uni bëxuñusa ꞌaish uisa ñu kara ꞌiti ꞌikë kixunbi ꞌunánimabi ꞌinun ꞌimia, usakin ka amia kuainti ꞌaimasa ꞌitánun unin niti bëarakësa ꞌinun ꞌimia.

²⁴ ꞌIanan kana ꞌën pitimibi sinanima ꞌëx masá nuituti inin; usai ꞌikana ñu xëaima ꞌëx tëmërai bënëtin.

²⁵ Kamabi ñumi ꞌëx rakuëa an ka ꞌitsaira rakuënun ꞌë ꞌimiakëxa, a ñukama kana bërí inutin.

²⁶ Usa ꞌain ka añu ñunbi ꞌë tantinun ꞌimiman; ꞌëx kana bërí upíma ꞌain, ꞌitsaira bënëtin kiax ka Job kiakëxa.