Job 2 - Kashibo-Kakataibo Biblia

¹ Anuanaín ángel kamabë Dios timë́ti nëtë ꞌikëbë ka angel paránakë axribi atubë timë́akëxa.

² Usai anu ukë ka Diosan uinuax kara aia kixun ꞌunanxunbi ñukákëxa: —¿Uinuax kaina mix aín? Kixuan kakëxun ka ñunshin ꞌatimanën kakëxa: —ꞌËx kana kamabi mekama oi kuaínbëkini nitsin.

³ Usakin kakëxun ka Diosan kakëxa: —¿Uisa kara ꞌën uni Job ꞌikë kixun kaina ꞌunán? Asaribi uni ka ënë menu ꞌaíma ꞌikën, an ka ꞌën kuëënkësabi okinshi ꞌakin ñu upíshi ꞌai tsókin ñu ꞌatima ꞌati sinanan uisakinbi uni ꞌatimoti sinanima upiti bërúankatia. Usa ꞌain ka minmi uisa ñu ꞌatima ꞌakëmabi a ꞌatima oti sinánxun ꞌë karaishikin katankëxun ñu ꞌatima, ꞌamikëxunbi ka uisa ñu ꞌatimabi mi ꞌaxuntima ꞌikën.

⁴ Kixun kakëxunbi ka ñunshin ꞌatimanën Dios kakëxa: —Uínbia aín naminu ꞌatimokin paëokëma ꞌaish ka uni asábi nitsia. ꞌAínbi ka unix upí tsótisa tani uisa ñu kara inutia abi inutibi tënëax ꞌiti ꞌikën.

⁵ Usa ꞌaínbi ka minmi ꞌinsinun ꞌimikëxun tani tëmërakin min bëmánanubi ꞌatimakin mi ñui banati ꞌikën.

⁶ Ësai kia ka Diosan ñunshin ꞌatima kakëxa: —Asabi ka usa ꞌain kamina uisa kaina oisatani usakin ꞌakinbi, kamina ñutannuira ꞌatima ꞌain.

⁷ Ësokian Diosan kakëx ka anuaxa abë banakë anuax ñunshin ꞌatima kuankëxa, kuanxun ka Job aín taëmiaxi chanku ꞌinsinan ꞌia aín nami kamanubi ꞌianan aín maxkánubi ꞌirunun ꞌimiakëxa.

⁸ Usakian chanku ꞌinsinan bikëx ka Job anua nibu pukëx tsamakë anu kuanx kuanx tsóakëxa, anuax ka chumu tukikë aín paná achúshi bitankëx aín naminu ꞌikë an paëira okëxun tani anun raxuamëakëxa.

⁹ Usai anu tsotia ka aín xanun anu kuanxun kakëxa: —¿Ësai ꞌinsíanx tëmëraibi kaina mix ñunshinakëti Diosmi katamëtin? ¡Dios ꞌatimokin ñuianan kamina ñuti ꞌain!

¹⁰ Ësakian kakëxun ka Jobnën aín xanu kakëxa: —¡ꞌËn xanu usai kamina ꞌatimai banatima ꞌain! Kamabi ñunu Diosan ꞌinánkëxun bikë ax ka asábi ꞌikën, ¿usaribi okin karanuna nua kamabi ñu ꞌatima inúnun ꞌimikëx inúkin tënëtima ꞌain? Usai kamabi ñu inutibi ka Job ꞌuchanan achúshi banabi Dios ñui ꞌatimati ami banama ꞌikën.

Job an ꞌunánkë unikamax ꞌinsínkë isi kuan ñuikë bana

¹¹ Job ax ka rabë́ ꞌimainun achúshi uni an ꞌunánkëñu ꞌiakëxa: Ax ka Elifaz kakë, ꞌaish Temán, menu tsókë uni ꞌiakëxa ꞌimainun ka Bildad axribi Súah kakë menu tsókë ꞌiakëxa ꞌimainun ka Sofar axribi Naamat kakë menu tsókë uni ꞌiakëxa. A unikaman ka atun ꞌunánkë uni Job axa usai ñu ꞌatima inuti nuibakatia kuakëxa, kuabiani ka kanankiani nun ꞌunánkë uni Job ka ꞌaisamaira tëmëraia usa ꞌain kananuna aín masá nuitukë a sinanatánun kanan isi kuanti ꞌai kiax kanankëxa.

¹² Kanankiani anua ꞌikë anu bëbai kuankinbi ka ꞌuranxunshi anu Job tsókë iskinbi ax ka a ꞌikë kixun ꞌunani ka munuma kuënkëni a kamaxi iankëxa, usai ꞌi ꞌitsaira atúxribi masá nuituti atun tari tukakin a kamaxunbi manámi mësukin me putu puti anunbi matakakikankëxa.

¹³ Usai ꞌitankëx ka atúxribi menu tsóti mapai achúshi ꞌimainun rabë́ nëtë ꞌianan mapai achúshi ꞌimainun rabë́ imë́ribi uisa banabi abë kananima a ꞌurama abë ꞌiakëxa, usai ꞌia ꞌaisamaira paë tani tëmëraiabi ka atun Job uisa banabi káma ꞌikën.