Job 19 - Kashibo-Kakataibo Biblia

Jobnën aín ꞌunánkë Bildad amiribishi katëkëan ñuikë bana

^1-2 Usa ꞌain ka Jobnën aín ꞌunánkë uni Bildad a kakëxa, ¿Uínsaran ira kaina ꞌaisamaira banakinmi ꞌë atsamikë a ënti ꞌain?

³ Achúshira okin ꞌakinma kamina ꞌitsaira okin ꞌë ñuikanin; ¿usakin ꞌatimakin ꞌë ñuikë anun kaina rabinkaniman?

⁴ ꞌËx inúkë ñukama ax ꞌënanshi ꞌain ka an ꞌë ꞌatima otsianxa.

⁵ Mitsux sapi kamina ꞌësamaira ꞌiisa tankanin, usa ꞌixun kamina ꞌëx ꞌinúkë ñukama ñuikinshi mitsun ꞌë kain.

⁶ Usa ꞌaínbi kamina mitsun upíokin pain Diosan ka ꞌë tëmëramia kixun ꞌunánti ꞌain, an ka usai ꞌinun ꞌimikin ꞌë anu pakëti nankënua ñuina pakëkësaribi ꞌinun ꞌimiaxa.

⁷ ꞌËx kana munuma kuënkëni kin: “¡ꞌË ka rëtëkania!” ꞌaínbi ka uínbi ꞌë kaima; ꞌianan kana ꞌë ꞌakinun kixun ñukatin, ꞌaínbi ka uínbi ꞌënun rabanan në́kin ꞌë ꞌakinsama tania.

⁸ Diosan ka tëmëramikin ꞌën ꞌati ñukama ëmikin unin anun niti bai bëarakësa usaribi ꞌitánun ꞌën ꞌati ñukama ꞌë ëmiaxa; ꞌianan ka ꞌën ꞌati ñukama bëánkibukënën bai mapukësa ꞌinun ꞌimiaxa.

⁹ An ka kamabi ñukama ꞌë bikuanxa; ꞌën mañuti bixun nikësa ꞌitánun, ꞌë nuibakinma usakin ꞌaxa.

¹⁰ Usokin ꞌakin ka ꞌë ꞌaisamaira ñunu pakëmikin xubu ꞌibuan aín itáishi nitánun tënkapakësa usaribi ꞌitánun ꞌë ꞌimiaxa; ¡ꞌimikin ka ꞌën anua ñu bitëkënti ꞌaíma ꞌitánun i aín tapunkama këñunbi ëchikësa usaribi ꞌitánun ꞌë ꞌimiaxa!

¹¹ Usa ꞌain ka ꞌëmi ꞌitsaira nishkin, an abë nishanankë uni ꞌakësaira okin ꞌë ꞌaxa.

¹² Usa ꞌain ka ꞌë tëmëramikin suntárunën bëarabuinkësa ꞌitánun ꞌë ꞌimiakëxa; usai ꞌikin ka aín suntárukamax ꞌë ꞌanux ꞌurama, kuatsinkin bëarakësa ꞌinun ꞌiëmiakëxa.

¹³ Usa ꞌain ka Diosanbi ꞌën xukë́nkama ꞌimainun ꞌën ꞌunánkë unikamanbi, bëtsi menu ꞌikë uni ꞌakësokin ꞌë ꞌanun ꞌamiaxa.

^14-15 ꞌImainun ka ꞌën ꞌaintsikama ꞌianan ꞌën ꞌunánkë unikama ꞌëmi manuaxa; manumainun ka axa ꞌë isi kuanx ꞌën xubunu ꞌia unikamanbi ꞌë manuaxa. ꞌIanan ka an ꞌë ñu ꞌaxunkë xanukaman ꞌunánkëma uni ꞌakësa okinshi ꞌakin; ax ka an nu ñu mëëmikë uni a ꞌikë kixun sinánkin ꞌë ꞌunanima.

¹⁶ ꞌËn ñu mëmikë uni ñu ꞌaxúnun kakëxunbi ka kuashikin ꞌë ñu ꞌaxunima, ꞌimainun ka ꞌitsokin ñu ꞌaxúnun kixun karaishikëxunbi ꞌaisama tania.

¹⁷ ꞌImainun ka ꞌurama okaskëxunbi ꞌën xanun ꞌë timaia; ꞌimainun ka ꞌën xukë́n ꞌibukamanbi ꞌë istisama tania.

¹⁸ ꞌIanan ka tuáxu kamáxbi ꞌë isi ꞌëmi kuaia; usa ꞌain ka anu ꞌëx tsókë anuax nirukëma ꞌaínshi ꞌëmi ꞌatimati banaia.

¹⁹ Abë ꞌëx nuibanairakë ꞌën ꞌunánkë unikamanbi ka ꞌë istisamatankania; ꞌimainun ka ꞌëbë nuibanankëira unikama ꞌianan ꞌën aintsikamanbi ꞌë banoisama tania.

²⁰ Usa ꞌain kana ꞌën xokama mërakë ꞌitánun ꞌaímai raënkëax, nëtë́ishi kiani ñutisara ꞌaíshbi usabi masánuitutibi tsotin.

²¹ Usa ꞌain kamina ꞌën ꞌunánkë unikama mitsun ꞌë nuibati ꞌain. Diosanbia usai ꞌinun ꞌë ꞌimikëx kana ësaira ꞌi tëmërain.

²² ¿Uisakaskin kaina mitsun Diosan ꞌakësaribi okin ꞌë ꞌaisatani ꞌëmi nishkanin? ¿Mitsun kaina ꞌaisamaira ꞌëmi banakin ꞌë ꞌatimokanin?