Job 14 - Kashibo-Kakataibo Biblia

Job ꞌitsama baritia ka uni tsotia kia ñuikë bana

¹ Kamabi uni aín tita bakënkë ax ka ꞌitsama baritia ꞌimi tsotia, usai ꞌi ka bëtsi bëtsi ñu inuti ꞌitsaira tëmëraia.

² Usai ꞌi ka ñu uá pëókintankë́xa barin ꞌakëx núkakësa usaribiti ꞌia; ꞌianan ka ñun tupënaxa bënëtishi nëtë́kësa usaribiti ꞌia.

³ ¿ꞌËmi ꞌatimakin sinánkin kaina min ꞌë ꞌuchoisa tanin, ꞌimainun kaina ꞌëmi nishkin min ꞌë ꞌatima oti kuëënin?

⁴ Uínbi ka bëtsi uni asérabi upí ꞌinun ꞌatima ñunua mënioima, usa ꞌain ka kamabi unix aín titan tuákë ꞌikën.

⁵ Min kamina an uni uiti baritia kara tsóti ꞌikë atishi tsónun ꞌimikë a ꞌain, usa ꞌixun kamina uiti bari kara tsóti ꞌikë atishia ꞌinun ꞌimin,

⁶ usa ꞌain kamina atuxia upiti bukunun ubiokinma ënti ꞌain; ¡usokëxun ka atúnbi tëxun kuríki bitankëx anun ñu maruxun upíokin pi tsóti ꞌikën!

⁷ Achúshi unían i rëraxun rakankëxi ka aín burunuax kótëkëni uínsarabi anuax i koi nëtë́tima.

⁸ Usa ꞌain ka aín tapúmiax xanankë ꞌianan aín i rakákë ax menu rakataxbi chë́kikëma ꞌaish asábi ꞌia,

⁹ usai ꞌi ka ꞌumpaxan chabókëxun amiribishi paxaira ꞌinun kótëkënia; usai ꞌi ka bërí ꞌapákëx koi i ꞌikësai pëñanakëti ꞌitëkënia.

¹⁰ Usa ꞌaínbi ka unix usai ꞌima ashiti ñuia; usai ꞌi kara ñukiani uni, ¿uinu kuanin?

¹¹ parúmpapa ꞌumpax ꞌimainun bakakamax ka kuabutibi aín ꞌumpax chitëti ë́skia;

¹² usa ꞌaínbi ka unix naíkamë ꞌëo këñutisama pan ꞌain, anu ñuia maínkë anuax nirutëkëntima pain ꞌikën, usai ꞌi ka uni ꞌuxax bësukëma usaribiti ñukë ꞌaish ꞌiti ꞌikën.

¹³ ¡ꞌËn kana kuëënti ꞌain minmi anu uni ñuia maínkë anumi ꞌë unëti mixmi ꞌëmi nishkë a sënë́ntamainun, usakin ꞌatankëxun kamina uiti nëtë karana anu ꞌiti ꞌai kixun ꞌë kati ꞌain, a nëtë sënë́nkëbë kamina ꞌëmi sinántëkënti ꞌain!

¹⁴ Usa ꞌain kara achúshi uni ñukë ax, ¿amiribishi baískitëkëntankëx tsóti ꞌik? Usai ꞌiti ꞌain kana ꞌën uiti nëtë karana anu uni ñukë anu ꞌiti ꞌai a nëtë kamabi sënë́mi anu ꞌiti ꞌain. Usa ꞌain kana anuxun uínsaran kaina ꞌëx tëmërai masá nuitukë a asábi ꞌinun ꞌimi kaínti ꞌain.

¹⁵ Min unio ꞌikëmi ꞌëbë banatisatankin kuënkëxun kana ꞌënribi kakëxun mi kati ꞌain; min iskin kamina upí ꞌikë ꞌë istsian min ꞌë unio ꞌixun.

¹⁶ Usa ꞌain kamina bërí uiti oí karana ꞌëx ꞌucha atiokinbi ꞌë ꞌatima onuxun tupuntima ꞌain, usokin ꞌakinma kamina uinu kuani karana nitsi anuabi ꞌë buánti ꞌain;

¹⁷ unin ñu pishanu ꞌaruxun nikë usaribi okin kamina min ꞌën ꞌatima ñu ꞌakëkama mëníoti ꞌain, usakin ꞌakin kamina a ñukama ꞌë manumiti ꞌain.

¹⁸ Asérabi ka ikamax usai ka ꞌiti ꞌikë kixun sinánkë ꞌaímabi me pankabuti bëukubutia, ꞌimainun ka xaxun pobu a kamaribi usai ka ꞌia kixun unin sinánkë ꞌaímabi anua rakákë anuax taramëkëti ꞌuri kuania.

¹⁹ Kamabi unix ka upitax tsóti kuëënia ꞌaínbi kamina min baka kushiira xobukian maxá këñupakësa usakin ꞌanan, ꞌuñe ꞌibúkian me putu chukakin chinankësa usaribi okin min unin tsóti ꞌaisama ꞌimin.

²⁰ Usa ꞌain kamina mix kushiira ꞌixun aín menuax chikínun ꞌimin, usakin ꞌakëx ka uni ñui ain nami chë́ki nëtë́tia.

²¹ Usa ꞌixun ka uni ñukë an uisa kara unin aín bakë bëchikëkama oia kixunbi kuatima ꞌianan; uisa ñu kara ꞌinutia kixunbi ꞌunannima;

²² usa ꞌain ka uni ñunuxun ain nami paë pain tantankëx ñuia, usai ꞌi ka aín nami paëia tani tëmërakë anunbi ñuia.