Job 1 - Kashibo-Kakataibo Biblia

Diosan Job kakë uni bëtsi bëtsi ñu ꞌinúti ñuñuma ꞌinun ꞌimia ñuikë bana

¹ Anu ka achúshi uni Job kakin anëkë ꞌiakëxa, ax ka Us kakë me anu tsóakëxa, usa ꞌixun ka uisa ñu ꞌatimabi ꞌati sinánkëma ꞌianan, Dios kuëënkësabi okinshi aín nuitu upí ꞌixun ñu ꞌakin bëtsi uni ꞌatima oti sinánkëma ꞌiakëxa.

² Job ax ka mapai achúshi ꞌimainun rabë́ bakë bëchikë bëbuñu ꞌianan rabë́ ꞌimainun achúshi ꞌini bëchikë xanuñu ꞌiakëxa,

³ ꞌimainun ka ax siete mil ovejakama ꞌianan tres mil camello, ꞌimainun a ñu mëëmikë vaca bënë rabë́, rabë́ ax quinientas ꞌiakëxa, ꞌimainun ka burro aín xanu kamañuribi ꞌiakëxa. ꞌIanan ka an ñu mëëxunkë unikama ꞌimainun xanukama an ñu ꞌaxunkë kamañuribi ꞌiakëxa. Usa ꞌaish ka ax ñuñuira uni a menu ꞌiakëxa.

⁴ Usa ꞌain ka Jobnën bakë bëchikëkaman fiesta ꞌakin ꞌaxëkë ꞌixun timë́xun bëtsin pain ꞌakin sënë́onkëbëtan bëtsínribi aín xubunuxun atun ꞌakësokinbi pikin ꞌaxëkë ꞌixun, atun chirabakë rabë́ ꞌimainun achúshiribi atubëtan pinux timë́nun kixun kuëankëxa.

⁵ Usakin ꞌakian anun timë́xun piti nëtë inuti sënëni sënë́nkëbëtan ka Jobnën aín bakë bëchikë bëbukama kuënxun, uinuxun kara ꞌati ꞌikë anu kuëënxun pë́karakëma ꞌaínshi nirutankëxun ñuina xarokin aín bëchikë achúshi achúshinëxa aín ꞌucha mëníokanun ꞌaxuankëxa. Ësokin ka Jobnën ꞌakëxa, ꞌën bëchikë bëbukamax sapika, ꞌatimakin Diosmi sinani ꞌuchaxa kixun sinánkin ꞌakëxa.

⁶ Achúshi nëtën ka an ñu ꞌaxunkë aín ángel kamabë usaibi ꞌikë ꞌaish Diosbë timë́ti nëtë ꞌain, axa paránankë ángel axribi atubë timë́akëxa.

⁷ Usai anu ukë ka Diosan ñukákëxa: —¿Uinuax kaina mix aín? Kixuan ñukákëxun ka axa paránankë ñunshin ꞌatimanën kakëxa: —ꞌËx kana kamabi mekama oi kuaínbëkini nitsin.

⁸ Kakëxun ka Diosan kakëxa: —¿Uisa uni kara ꞌën uni Job ꞌikë kixun kaina ꞌunan? Asaribi uni ka ënë menu ꞌaíma ꞌikën, an ka ꞌën kuëënkësabi okin ꞌakin ñu upíshi ꞌai tsókin ñu ꞌatima ꞌati sinanan, uibi ꞌatimoti sinanima upí ñuishi ꞌai tsotia.

⁹ Kixuan kakëxunbi ka ñunshin ꞌatimanënribi kakëxa: —Jobnëa min kakësabiokin ꞌakë ax ka an sinánkësokishia ꞌakë ꞌikën.

¹⁰ ¿Min kamina uínbia ꞌatima onun ënima ꞌianan aín aintsi ꞌibukamaxribia uisaibi ꞌiaxma ꞌinun ënima? Min kamina an ꞌakë ñukamaxa upí ꞌinun upíokin sinánxunin usa ꞌaish ka a unix an ꞌarakakë vaca axa kaikëbë anunbi ñuñuira ꞌi ënë menu ꞌikë bëtsi unikamasamaira ꞌikën.

¹¹ ꞌAínbi kamina usai kara mimi ꞌatimokin sinani banaia isnuxun ain ñukama bikuanti ꞌain.

¹² Ësokin kakëxun ka Diosan ñunshin ꞌatima a kakëxa: —Asabi ka. Usa ꞌain kamina uisokin kaina ꞌaisatani usakin Jobnën ñukama ꞌati ꞌain, ꞌaínbi kamina aín ꞌibu a uisabi otima ꞌain. Usakian kakëx ka ñunshin ꞌatima anuaxa Diosbë banakë anuax uinu kara Job ꞌikë anu kuankëxa.

¹³ Achúshi nëtën ka Jobnën bakë bëchikë bëbukama ꞌimainun ꞌain ꞌini bëchikëkama atun fiesta akin piti upíokin ꞌaxun pianan xëai aín xukë́n apanën xubunu timëkë ꞌiakëxa,

¹⁴ usa ꞌaínbi ka an ñu mëëmikë uni achúshinëx aín xubunu bëbakin Job usaía ñu ꞌinúkë a ñuikin ësokin kakëxa: —Nukaman kananuna naënuxun vaca bënë manë paránën me tukami ꞌian, ꞌimainun ka burro ain xanukaman pasto pí nu ꞌurama ꞌiabaxa;

¹⁵ usai ꞌiabakëbëbi ka nun usakin sinánkë ꞌaímabi sabeo unikama rikuatsinkin vaca mëkamanan unikamaribi manë sani kuënukë anun ꞌaxun rëtëaxa. Usokin ꞌakëbë kana ꞌëxëshi mi kai unux abán.

¹⁶ Ësokin kakian sënë́onkë ꞌaímabi axribi ukin ka an ñu mëëxunkë uni itsínribi anu bëbakin Job kakëxa: —Kaná anubi ꞌibúti kushiira banakin ka an ñuina bërúankë unikama ꞌimainun ovejakama këñukin rëtëaxa. Usokin atu ꞌakëbë kana ꞌëxëshi mi kai unux abán.

¹⁷ Ësokin kaia a uni sënë́nkë ꞌaímabi ukin ka bëtsi uniribi anu bëbakin kakëxa: —Rabë́ ꞌimainun achúshi caldeo unikama amami amamiax ai mërakin ka camellokama mëkamanan nubëa ꞌikë unikama raíri manë sani kuënukënën ꞌakin rëtëaxa. Usokin ꞌakëbë kana ꞌëxëshi mi kai unux abán.

¹⁸ Ësokin kaia a unix sënë́nkë ꞌaímabi axribi ukin ka an ñu mëmikë unin ami bëbakin kakëxa: —Min bakë bëchikë bëbukama ꞌimainun xanukaman ka ain xukë́n apanën xubunuxun timë́xun fiesta ꞌakin pianan xëai ꞌiaxa,

¹⁹ usakin ꞌakëbëbi anu uni ꞌikëma memiax bënëtishi anu bëëki ꞌibúkin ka suñuanën amami amamixun bëkakin xubu nipakin min bakë bëchikëkama bukukë anuabi chakamiaxa. Usokëx ka kamaxi atux bamaxa. Usokin ꞌakëbë kana ꞌëxëshi mi kai unux abán.

²⁰ Usakian kakëx ka Job anua ꞌikë anuax ratuti ꞌitsaira a bana kuati anun paëi niruakëxa, niruxun ka aín tari nitë́xëkin tukakëxa, usokin ꞌanan ka ain bu tëai maxkutankëx Dios rabia ꞌikësabi masá nuituti memi bëtiki ꞌiakëxa.

²¹ Usai ꞌika ësai kiakëxa: —Ñuñu kana ënë menu ꞌëx bakë́anma ꞌain, usa ꞌain kana ñukin ënë menu ꞌikë ꞌën ñukama uantima ꞌain, usa ꞌain kana ënë menubi ꞌën ñukama ëbiani ñuti ꞌain, Diosan ka kamabi ꞌën ñukama ꞌë ꞌinánkëxa, usa ꞌixun ka anbi ꞌën ñukama kamabi ꞌë bikuantëkëanxa; ¡Nukën ꞌIbu Dios ax ka ꞌupiokin rabikë ꞌiti ꞌikën!

²² Usa ꞌain ka usa ñukama inuti tëmëraibi Job, Diosmi ꞌatimai banai ꞌuchama ꞌikën.