Jeremías 9 - Kashibo-Kakataibo Biblia

¹⁰ Aín bashikama ꞌimainun anu uni ꞌikëma menu ꞌikë pastokama ax ka nëmëkë ꞌikën, usa ꞌain kamina inkanti ꞌain, usa ꞌain ka uíxbi anun ꞌinútima ꞌikën, ꞌimainun ka anua vaca manki banaia kuakë ꞌaíma ꞌimainun, ñuina pëchiñu, ñuina raëkëma akama kuani abati nëtë́kë ꞌiti ꞌikën.

¹¹ ꞌËn kana Jerusalén ëma bëtsiokin maxákama bukunkësa ꞌitánun ꞌimiti ꞌain; ꞌimikëbë ka anu kamun raëkëma kama ꞌiti ꞌikën, ꞌimianan kana anu uni ꞌikëma mesa ꞌitánun Judánu ꞌikë ëmakama ꞌimiti ꞌain, ꞌimikëbë ka a ëmakama uniñuma ꞌiti ꞌikën.

¹² ¿Uin kara an ꞌitsaira ñu ꞌunánkë ꞌixun uisai kara ënë ñu ꞌia kixun ꞌunánti ꞌik? ¿Ui uni kara Diosan ënë ñukama unánmiaxa, an ꞌunánxua raíri unikama usa ka ñu ꞌikë kixun ñuixunun ꞌunanmiakëx? ¿Uisa kupín kara a menu ꞌikë ëma masókan ꞌaían anu uni ꞌiamasa ꞌain, anu uni ꞌikëma mesa ꞌain, anun uinu ꞌikë unixi nitëkënkëma ꞌiti ꞌik?

¹³ Usa ꞌain ka Dios ësakin kakëxa: Kamabi ñua Israel unikama ꞌinua ax ka ꞌën ꞌinánkë banakama kikësoibi ꞌikinma rakankë ꞌaían ꞌikë ꞌiakëxa, usai ꞌikin ka ꞌëx kikësoi ꞌikinma a banakama ꞌunánxunbi abi ꞌakima manukankëxa.

¹⁴ Usai ꞌikin ka bana kuakëmasa ꞌixun aín nuitu iruarakin, unínbia rabinuxun ꞌakë dioskama a rabikin uisakian ꞌanun kara atún papan ꞌunánmiakëxa usakinbi ꞌakankëxa.

¹⁵ Usa ꞌain kana kamabi kushiñuira Israel unikaman ꞌIbu ꞌaish ꞌëx ësai kin: ꞌËn kana piti ꞌaisama ꞌinun kachakë na pinun ꞌinánan, ꞌumpax muka rokëñu mëskukë aribi xëakanun ꞌinánti ꞌain.

¹⁶ Usakin ꞌanan kana ꞌën mekamanu ꞌikë atun papanbi ꞌunánma ëmakamanu kuani abístanun ꞌiminuxun ꞌain; usakin ꞌanan kana axa ami nishkë unikaman ꞌain manë xëtokë tuínxun anun ꞌanan achirabi nitánuma kamabi binun bimiti ꞌain.

Jerusalénnu ëmanu tsókë unikama masá nuituti ꞌinkan ñuikë bana

¹⁷ Nukën ꞌIbu kamabi kushiñu ax ka ꞌësai kia: “¡Axa rarumati ꞌunáirakë xanukama kamina rikuatsinun kamiti ꞌain!”

¹⁸ ¡Kamikëx bënëkuatsini ꞌishtun aia atux nukama kupín inkëbë; ka kamaxi bëunan mëskúkanti ꞌikën; usai ꞌi kananuna a nëtëkaman masá nuituti nun bëun purupurukai inti ꞌain!

¹⁹ Kamabi Jerusalénnu ꞌikë unikama sharati masá nuituti inkë ax ka kamaxunbi kuakë ꞌiti ꞌikën: ¡Axa numi nishkë unikaman ka nun ëma masókin rurupaxa!, ¡usa ꞌain kananuna ꞌitsaira ꞌatimokëx tëmëran! Usa ꞌain kananuna nun xubukamaribi chánkapakë ꞌikë axa numi nishkë unikaman ka nun me ënun kixun nu bënëia, usa ꞌain kananuna nun me ënti ꞌain.

²⁰ Xanu kamanribi ka Nukën ꞌIbu Dios kikë bana kuati ꞌikën, kuakin ka ain bana upíokin ꞌati ꞌikën. ꞌAnan ka aín tuákamaribi usai kara inti ꞌikë aribi ꞌunámianan, usaía masá nuituti ini kiti ꞌunamiti ꞌikën:

²¹ Usai ꞌikëbë ka uni aín xubunu atsínkësa ꞌinun nukamax ñuti axribi nun xubukamanu atsíankëxa, ꞌimainun ka anu ꞌapu ꞌikë ꞌapun xukamanuribi ꞌianan, tuá ëman niabakë akamaribi ñumainun, uni bënábu anu tantiti plazanu bukukë akamaribi këñuti ñuakëxa.

²² Usai ika uni ñukëkama ñuinakan pui chë́ki bukukiankë ninua iskësa ꞌianan, ñu bimi unin bikin ënkëxa bikëxma chë́kibukuainkësa ꞌinun ꞌiakëxa. Ësai ka Nukën ꞌIbu asérabi kiakëxa.

²³ Ësai ka Nukën ꞌIbu kiaxa: Uixi ka rabiakati an ñu ꞌunairakë anun ꞌëx kana ñu ꞌunánkë ꞌai kiax rabiakatima ꞌikën, ꞌimainun ka kushiira uni axi ꞌëx kana kushiira ꞌai kiax rabiakatima ꞌikën, uix kara ñuñuira ꞌikë axi ka ꞌëx kana ñuñuira ꞌai kiax anun rabiakatima ꞌikën.

²⁴ Usa ꞌain ka uikamax kara rabiakatia, abi rabiakatima ꞌëmi sinani ꞌën kakësabiokin ꞌakë ax ka Dios an ꞌën ꞌunánmikë ꞌikë kixun sinánti ꞌikën, usa ꞌain ka ꞌën ënë menu upíokin ñu ꞌakëbëtan an ka uni nuibatia kixun unin ꞌunánti ꞌikën, usa ꞌain ka unínribi upíoki ñu ꞌati ꞌikën. Ësai ka Nukën ꞌIbu asérabi kiakëxa.