Jeremías 7 - Kashibo-Kakataibo Biblia

Jeremíasnën anuxun Dios rabiti xubu xëkuënuxun unikama bana ñuixunkin ka

¹ Nukën ꞌIbu Diosan ka Jeremías ësokin kakëxa:

² Anun ꞌë rabi atsínti anu kuantankëx nirakëkin kamina ꞌëx kikë ënë banakama unikama ñuixunti ꞌain: Kamabi Judá menu ꞌikë unikama axa Dios rabi ënë xëpútikaman atsínkë mitsun kamina ënë bana kuati ꞌain.

³ Nukën ꞌIbu Israel unikaman Dios kamabi kushiñuira ax ka ësai kiaxa. Mitsux upiti tsókin ñu ꞌatima ꞌakë mëníokakin, ñu ꞌatima ꞌakë ënia kana ꞌën ënë menubi mi tsónun ꞌimiti ꞌain.

⁴ Usa ꞌain kamina axa këmëi mitsu paráni banai ësai kikë a unikama ami rarámatima ꞌain. Atun ka ësai kikin mitsu kati ꞌikën: ¡Ënu ka anuxun Dios rabiti xubu ꞌikën!

⁵ Mitsux upiti tsókin ñu upíokin ꞌai bëtsibë bëtsibë upiti nuibanankin kamina;

⁶ ꞌatimokin aín ñu bikuanan tuá papa ñumakama ꞌimainun xanu kasunamëkë ꞌimainun bëtsi menu tsókë aribi ꞌatima oíma ꞌianan, uni ꞌatima ñu ꞌakëmabi ënë menuxun ꞌanan, unínbia a rabinuxun ꞌakë a rabi ꞌatimatiama kana,

⁷ ꞌën anumi tsókankë me min chaitiokëkama xënibua ꞌaínbia atunanbi ꞌinun ꞌën ꞌinan me ënubi tsónun mitsu ꞌimiti ꞌain.

⁸ Mitsun kamina paránkin kakë banakama a asérabisa ax ꞌikë kixun sinánkanin.

⁹ Mitsun kamina ñu mëkamanan uni ꞌanan, bëtsi unin xanubë ꞌianan, këmëishi anuxun bana mëníokë anuxun bëtsi uni ꞌuchonan, asérabi ñu ꞌakatsi kianan a rabikankë Baal rabikin sanuira ro xaroxuanan, mitsun usakin ꞌati ꞌikëmabi unínbia a rabinuxun ꞌakë dioskama a rabikanin,

¹⁰ usakin ꞌatankëx ka anuxun ꞌë rabiti xubu ënuribi ꞌëbë bana katsikiax rikuatsinin. Atun ka sinania ënuax kananuna ië́kë ꞌiti ꞌai kixun; usa ꞌixun ka abi kananuna ꞌati ꞌai kixun ꞌën kuëënkëma ñuira ꞌakania.

¹¹ ¿Atun kara anuxun ꞌë rabiti xubu ënëx ka anua mëkama unibu bukukë ꞌikë kixun sinánkanin? ꞌËnbi kana usakin ꞌakania kamabi isan. ꞌËx Nukën ꞌIbu ꞌaish kana ësai kin.

¹² Anuxun ꞌë rabiti xubu Silónu ꞌikë anuxun pain ꞌë rabikin pëukan a karana ꞌën uni Israelkaman ꞌucha kupí uisokën, kixun kamina anu kuantankëxun isi kuanti ꞌain.

¹³ ꞌËn amiribi amiribi usaími tsókankë a ñuikin kakëxunbi kamina mitsun kuaisama tankën, usa ꞌaínbi kamina kuaisama tankin, ꞌëbi kaisama tankën. ꞌËx Min ꞌIbu ꞌaish kana ësai kin.

¹⁴ Usa ꞌain kana anuxun ꞌë rabiti xubu Silónu ꞌikë ꞌásaribiokin, bërí anuxun ꞌë rabiti xubu ënë mikama ꞌimainun mitsun chaitiokëkama ꞌinan amimi mitsux katamëkankë ënë ꞌati ꞌain.

¹⁵ Usa ꞌain kana anu ꞌiti ꞌën mikama ꞌinan me ënua min xukë́nkama Efraínën rëbúnkikama ꞌasaribiokin mitsu chikínti ꞌain.

Diosan kakësabi oi Israel unikama ꞌisama tan ñuikë bana

¹⁶ Diosan ka Jeremías kakëxa, minmi ënë unikama abi ꞌë ñukáxunkëxunbi kana min bana kuatima ꞌain. ꞌIanan kana ñunshinakëkin kakëxunbi ꞌën min bana kuashiti ꞌain.

¹⁷ ¿Min kaina Judá menu ꞌikë ëmakamanuxua ꞌakë ñukama ꞌimainun Jerusalén ëmanu ꞌikë anun niti baikamanuxua ꞌakë ñukama a isiman?

¹⁸ Atun bakë bëchikë ꞌimainun ꞌini bëchikëkaman ka karu bitsinkin bëia, bëia ka atun papakaman ërë́rutanun tikaia usokëbëtan ka xanukaman harina chabóxun pán bata ꞌinun ꞌatankëxun, atunbia rabinuxun xanu tankin ꞌakë, naíkamë ꞌëonu ꞌikë kakin anëkë ꞌapu xanu a ꞌinania. ꞌInánan ka atúnbi ꞌunánkëma bëtsi dioskama aribi uvas baka vino ꞌakë rabikin ꞌinánkin ꞌë nishmia.

¹⁹ ꞌAínbi ka ꞌëa aín banan nishmikë usamaira oi atúxa kikë bana anunbi nishia, usai ꞌika aín bana anunbi katë́ti ꞌikania. ꞌËx Min ꞌIbu ꞌaish kana ësai kin.

²⁰ Usa ꞌain kana ꞌëx Dios ꞌaish asérabi kin, ënë me ꞌianan unikama ꞌimainun ñuinakama, nikama, ꞌianan ñu ꞌapákëxa tuákë akamami kana ꞌitsaira nishan. Usa ꞌain ka ꞌëx nishkë ax ërë́ruia tsi bënantisama usaribi ꞌiti ꞌikën.

²¹ Nukën ꞌIbu kamabi kushiñuira Israel unikaman Dios ax ka ësokin aín unikama kai kiaxa: Mitsun kuëënkësa okin ñuina ꞌaímai këñutanun xaronanbi, këñutanuma xaroxun kamina ꞌain namikama tëxëkë a pikanti ꞌain.

²² ꞌAínbi kana ꞌën mitsun chaitiokëkama Egipto menua chikíntankëxun, usakin kamina ñuina xarokin ꞌati ꞌai kixun uisakinbi káma ꞌain.

²³ ꞌAínbi kana ësaia ꞌën bana tani ꞌikanun kakën; ꞌëx atun Dios ꞌimainua atux ꞌën unikama ꞌinun kixun kana kakën. Usai ꞌia ꞌën kakësabi oi ꞌikëbë ka mitsun ꞌakë ñukama upí ꞌiti ꞌikën.

²⁴ ꞌAínbi ka ꞌëx kikësokin ꞌaisama tanan, ꞌën bana kuaisamatani, atun kuëënkësokinshi ñu ꞌatima ꞌatishi sinani ꞌikankëxa. Usakin ꞌakin ka ꞌëmi sinántëkënkinma, atun kuëënkë ñuishi rabiti ꞌakankëxa.

²⁵ Anun mitsun chaitiokëkama Egipto menua chikía a nëtëkamanribi ꞌa ꞌixunbi kana an ꞌën bana ñuikë unikamaribi nëtë́kinmaira bëríbi mitsunu xutin.

²⁶ ꞌAínbi kamina mitsun ꞌën kakëxunbi kuaisamatankën, usai ꞌikamina mitsun chaitiokëkama ꞌiásamairai atiaira bana kuama ꞌain.

²⁷ Jeremías min kamina kamabi ënë ñukama ñuikin min kakëxua kuanumabi atu kati ꞌain; usakin kakëxunbi ka atun miribi katima ꞌikën.

²⁸ Ënë kamina: Aín ꞌIbu Diosan kakëxunbi kuaisama tanan, uisakinbi kati kuëënkëma ꞌianan, uínbi uisokinbi kaisama unibu akama kati ꞌain. Mitsun kamina ax kikësoibi ꞌiti bana a ꞌimainun achúshi ñu mitsubëtan Diosan ꞌa ꞌikëbi ami manúkin a rakan irakan.

Israel unikamax ka bëtsi ñu axun rabi Jerusalénnuax ꞌuchakankëxa

²⁹ ¡Judá menu tsókë unikama mitsun bu tëatankëx kamina ka masánuitukan kixuan ꞌunántanun niti ꞌain! ¡Nianan kamina aín bashi matákama anu uni ꞌikëma anuax masánuituti kantati ꞌain! Diosan ka mikaman nishmikëxun rakankësa ꞌinun mitsu ëanxa.

³⁰ Ësai ka Nukën ꞌIbu asérabi kiakëxa: Judá menu tsókë unikaman ka ꞌën kuëënkëma ñu ꞌaxa: ꞌAkin ka anuxun ꞌë rabiti xubu a ꞌatima okin anu atun rabikë ñukama anu buákarukin nankëxa.

³¹ Usa ꞌain ka Ben-hinom kakë me sapan anuxun ñuina xaroti Tófel kakë ꞌakëxa, anuxun ka atun bakë bëchikë ꞌimainun ꞌini bëchikama xarokëxa, ꞌakin ka usakin ka ñu ꞌanuxun, ꞌaia kixun ꞌën sinánkëma ñuira ꞌakëxa, usa ꞌain kana ꞌëxbi kin.

³² Usa ꞌain kana ꞌëx Min ꞌIbu ꞌaish asérabi ësai kin, anun a me Tófel kananbi me sapan Ben-hinom, kakin anëtima achúshi nëtë ka ꞌinuxun ꞌaia. Usa ꞌain ka a me sapan anuxun uni ꞌakë kakin anëkë ꞌinuxun ꞌaia. Usa ꞌain ka Tófet kakë ax anu uni ñukë ꞌitsaira maínkë ꞌiti ꞌikën, usa ꞌain ka anu maínti ꞌaíma ꞌain raíri axa atumi nishkë unikaman ꞌakë ꞌikë ëman rakankë ꞌiti ꞌikën.

³³ Usa ꞌain ka an ñu bamaia pikë ñuina pëchiñu ꞌimainun raëkëma ñuina pianankë akaman piti ñuia rakankë uni ꞌinuxun ꞌaia, usa ꞌaínbi ka uínbi a ñuinakama an ꞌibinti ꞌaíma ꞌiti ꞌikën.

³⁴ ꞌËn kana Judánu ꞌikë ëmakama ꞌimainun Jerusalénnu anun niti ꞌakë anuaxa unikamax fiesta ꞌai kuëëni kantakë ꞌimainun xanu bitsi kuëëni kantakë akama nëtë́nun ꞌimiti ꞌain, usaía ꞌinun ꞌimikëbëka kamabi ëma anu uni ꞌikëma mesa ꞌiti ꞌikë kiax ka Dios kiakëxa.