Jeremías 6 - Kashibo-Kakataibo Biblia

Diosan kakëxun Israel Judánu ꞌikë unikaman kuaisamatan ñuikë bana

¹⁶ Nukën ꞌIbun ka ꞌain unikama ësakin kakëxa: Bainu nirakëxun isi kamina, uisai kara mitsun chaitiokëkama ꞌën ꞌinánkë ꞌën bana ꞌai tsóakëxa kiax ñukákananti ꞌain, uisai kara uni upitax tsóti ꞌikë kiax; usakin ꞌai kamina a ꞌunánkin ax kikësokin ꞌai ꞌupitax tsókanti ꞌain. ꞌAínbi ka atux kia: Nux kananuna usai i tsótisama tanin.

¹⁷ Nukën ꞌIbun ka an bërúanti unikama nanxun aín unikama kakëxa: An manë banañu banókë unin banókë a kamina bëmë́kin kuati ꞌain. ꞌAínbi ka unikama kakëxa: Nukaman kananuna a kuaisamatanin:

¹⁸ Usai atux ꞌikëbë ka ësai Nukën ꞌIbu kia: Bëtsi bëtsi menu tsókë unikama mitsun kamina, uisa ñu kara ꞌën unikama inuti ꞌikë kixun ꞌunánkanti ꞌain.

¹⁹ Men ka unin ꞌakësokin kuati ꞌikën: Ënë unikama kana ꞌaisama ñu inúnun ꞌimiti ꞌain, atun ka ñu ꞌaisama ꞌatishi sinánkanxa usa kupín; ꞌimainun ka ꞌën bana kuaisama tankëxa usa ꞌain, ꞌianan ka ꞌën bana kikësokinshi ꞌaisama tankëxa, usai ꞌikin ka a tanti ꞌën bana timakankëxa.

²⁰ ¿Uisoti kaina mitsun Sabá menu ꞌikë sanuira ñu a ꞌimainun ro ua sanuira ꞌura ꞌikë me kamanua ꞌikë a ꞌë bëxun kanin? ꞌËx kana kuëënima ꞌaímai këñutanun xarokë a ꞌianan, bëtsi ñukamaribi bëxun xarokëxbi ka ꞌën iskëx upíma ꞌikën:

²¹ Usa ꞌain ka Nukën ꞌIbu ësai kiakëxa: Ënë unikama ami nishkë unikaman ꞌanun kana ꞌamiti ꞌain. Aín papakama ꞌianan ain bakë bëchikëkama ꞌimainun a rapasu ꞌikë unikama ꞌimainun an ꞌunánkë unikamaxi ka bëtsi ꞌakësaribiti ñuti ꞌikën.

Amia nishkë unikaman Israel unikama aín tsipumiaxi ꞌuxun bëara buinxun chikínti ñuikë bana

²² Ësai ka Nukën ꞌIbu kiakëxa: Aín tsipumia ꞌikë ꞌuraira me anuax ka achúshi ëma chaiira ꞌaish kushiira ax mitsu ꞌai unux mëníokatia.

²³ Usa ꞌaish ka aín suntárukama aín pia, aín kanti ꞌimainun aín manë xëtokë a bitsi upiti mëniokakë ꞌikën; usa ꞌaish ka akamax bënë́kinshi bëtsi tëmëramikë ꞌianan, nuibananti ꞌunánma ꞌikën; atux kushiira banakë ax ka parúmpapa xukirui bëchuni banakë usaribi ꞌikën, usa ꞌain ka atun caballonu tsótax kuanti ꞌikën. Usa ꞌain ka Jerusalén ꞌanux mëníoka kuatsini utishi ꞌikën.

²⁴ Jerusalénnu tsókë unikamax ka ësai kia: Nun kananuna axa numi nishkë unikamaxa nu ꞌai unux mëníokakë a bana kuan, usa ꞌain kananuna a bana kuax rakuë́ti kushiñumasa tanin; usa ꞌain kananuna ꞌitsaira tëmërai xanuxa aín tuá bakënux paë tani tëmërakë usaribiti ꞌin.

²⁵ ¡Usa ꞌain ka uixi nitsima ꞌimainun bainubi nikantima ꞌikën! ¡Axa numi nishkë unikama ka mëníoka kuatsini aín manë xëtokë tuíanx uti ꞌikën; usa ꞌain ka unikama amanu amanua tsókë atúxribi rakuë́kania!

²⁶ ¡ꞌËn unikaman ꞌini bëchikë xanukama mitsun kamina anun paë masá nuitukin, pañukë anun chupa xëni pañutankëx, chimapunuax kuainakë bëkini anun chuati ꞌain. Usai ꞌi kamina masánuituti nishi inkanti ꞌain, usai ꞌi kamina ꞌain bakë bëchikë achúshira ꞌaíshbi ñukëbëa uni ꞌikë usaribiti ꞌikanti ꞌain; an nu ꞌatima okin masóti unikama ka basirakëma ꞌaínshi ukanti ꞌikën!

²⁷ Ësakin ka Diosan ꞌë kakëxa: ꞌËn kana uisai kara ꞌën unikama ꞌia isnuxumi tanun mi ꞌamiti ꞌain. Usa ꞌain kamina uisai kara atux, nitsia kixun isti ꞌain.

²⁸ Kamabi a unikamax ka bana kuakëmairabu ꞌikën; usa ꞌaish ka a unikamax nishanani kuamianani ñuiananishi tsotia; usa ꞌaish ka manë panshian ꞌimainun manë tunan irusamaira a unikama ꞌikën.

²⁹ Anun xunkati anun kushin xunkakëx ërë́ti ka tsi plomo charotishi ꞌia. Usaribiti ka an xunkakin tsi ërë́nkin manë charokë ax ꞌia, ꞌaínbi ka ñankáishibi an manë charoti ꞌakë ax tëia. Usaribi ka atux ꞌikën, usa ꞌain ka an ñu ꞌatima ꞌakë unikama atux nëtë́tima.

³⁰ Usa ꞌain ka atux. Kuríki ꞌatima okë kakin anëkë ꞌiti ꞌikën, usa ꞌain kamina mix Dios ꞌixun ꞌatima ñu aín upí kaístankëxun pukësa ꞌinun atu ꞌimian.