Jeremías 38 - Kashibo-Kakataibo Biblia

Jeremías achúshi me naëkë ëskikënu tëmëramikin ënkan ñuikë bana

¹ Achúshi nëtën ka Jeremíasnën Jerusalénnu ꞌikë unikama bana ñuixunia ënë unikaman kuakëxa. Sefatías Matánën bakë bëchikë, Guedalías Pashurnën bakë bëchikë, Jucal Selemíasnën bakë bëchikë ꞌimainun bëtsi uni Pashur Malquíasnën bakë bëchikë ënë kaman ka ësai kia küakëxa. Ënë kamax a banakama ꞌikën:

² “Nukën ꞌIbu Dios ka ësai kiaxa: Uix kara ënë ëmanu bërútia atux ka ꞌakanani ꞌianan numin ꞌiananbi ꞌinsinan ꞌi këñuti ꞌikën. ꞌAínbi ka uikamax kara Babilonio unikamanu chikiti ꞌinamëtia akamax kuni bamatima ꞌikën.

³ Nukën ꞌIbu ka ësai kia: Ënë ëma ka Babilonianu ꞌikë ꞌapun suntárukaman ñatankë ꞌiti ꞌikën. Usakin ꞌaia ka atu uínbi usakin kamina ꞌatima ꞌai kixun katima ꞌikën. Ësai ka Jeremías kiakëxa.”

⁴ Usa ꞌain ka aín unikama raírinën ꞌapu kakëxa: —Ënë uni kananuna ꞌati ꞌain, aín bana kuakin ka suntáru axa ëmanu bërúkëkama ꞌimainun kamabi unikama atúnribi bëtsiokin sinania. Ënë unin bana kuati ka suntárukama axa ëmanu bërúkë ꞌimainun kamabi unikama rakuë́tia.

⁵ Kixun kakëxun ka ꞌapu Sedequíasnënribi atu kakëxa: —Ka kuat, asábi ka, mitsun kuëënkësa okin kamina a uni ꞌati ꞌain. ꞌËn kana uisokin kaina ꞌakatsi usokin ꞌaxuma ꞌanun mitsu kaiman.

⁶ Usokian ꞌapun kakëxun ka Jeremías atun ñatantankëxun kini ëskikë ꞌumpaxñuma anu nampákankëxa, a kinix ka ꞌapun bakë bëchikë Malquías ainan ꞌiakëxa, ax ka anua suntárukama an ëma bëruankë ꞌikë me mëníokë anu ꞌiakëxa. Anua itsin nanpakë ax ka ꞌumpaxñuma ꞌaíshbi me kini anu nisama chua ꞌiakëxa, anu ka Jeremías ënuma sënëni nanë́ax niakëxa.

⁷ Usokin ꞌakë ꞌain ka achúshi etíope uni Ébed-mélec kakë ꞌiakëxa, ax ka ꞌapun uni an unikama ꞌësëti aín xubunu nankë ꞌiakëxa, an ka Jeremías ka me kinikë ꞌukëmëu nipakë ꞌikë kixun ñuia kuakëxa. Usa ꞌain ka a nëtën ꞌapu bana mënioi Benjamínën xëkuë kakë a ꞌurama timë́kankë ꞌiakëxa.

⁸ Usa ꞌain ka Ébed-mélec ꞌapun xubunuax chikíkiani ꞌapu kai kuankëxa, kuanxun ka Benjamínën xëkuë kakë anu tsókë mërakëxa, mërakin ka ësokin kakëxa:

⁹ —ꞌËn ꞌIbu, unikaman an bana ñuikë uni Jeremías usakin me naëkënu nipakë ax ka ñu ꞌatimaira ꞌakë ꞌikën. Usa ꞌain ka anuax a piti ñu ëmanu ꞌaíma ꞌain numin bamatisa tania.

¹⁰ Kakëxunshi ka ꞌapun Ébed-mélec kakëxa: Treinta uni bibianxun kamina atubëtan bënë́kinshi Jeremías me naëkënua bamakëmaishi bitsi kuanti ꞌain.

¹¹ Kakëxun unikama buani kuanx ka Ébed-mélec anua ꞌapun xubu ꞌikënua chupa bukúnkë anua uiti chupa xënikara bibiankë, a itsin nanpákin ka Jeremías me naëkë anua,

¹² ësokin kakëxa: —Chupa xënikama ënën kamina min pëñanu mima itsin rashutia usa ꞌain përabukuti ꞌain kixun kakëxa. Kakëx ka Jeremías usai ꞌiakëxa.

¹³ Usai ꞌikëbëtan ka unikaman itsi sarakapakin nanpakëbëa anun tëkërëkia itsinbi bërúakëxa. Usokin ꞌakëx kuanx ka anua suntárukama ꞌikë me mëníokë anu Jeremías bërúakëxa.

ꞌApu Sedequías an bana ñuikë Jeremíasbë bana ñuikë bana

¹⁴ Achúshi nëtën ka ꞌapu Sedequíasnën aín suntárukama anua an Dios kikë bana ñuikë Jeremías bënun ꞌamiakëxa, ax ka anuxun Dios rabiti xubu xëkuë rabë́ ꞌimainun achúshi anun atsínti ꞌikë anu ꞌiakëxa. Anuxun ka ꞌapun kakëxa: —ꞌËn kana mi ꞌachúshi ñu ñukatin, usa ꞌain kamina kamabi ñu min ꞌunánkëkama asérabi ꞌë kati ꞌain.

¹⁵ Kakëxun ka an bana ñuikë uni Jeremíasnën ꞌapu kakëxa: —ꞌËn min ñukákëxun mix, ꞌapu ꞌikë kakëxun kamina min ꞌë ꞌanun ꞌamiti ꞌain; ꞌimainun kamina ꞌën usokin kamina ñu ꞌatima ꞌai kixun kakëxunbi kuatima ꞌain.

¹⁶ ꞌAínbi ka uínbi kuanuma ꞌapu Sedequíasnën unëxun asérabi ësokin an bana ñuikë Jeremías kakëxa: —ꞌËn kana Nukën ꞌIbu an nu tsóti ꞌinánkë an ismainun asérabi mi kain, ꞌën kana mia ꞌanun uni ꞌinánan an mi ꞌaisatankë unikaman mia ꞌanun ꞌamitima ꞌain.

¹⁷ Usa ꞌain ka Jeremíasnën ꞌapu Sedequías ësokin kakëxa: —Nukën ꞌIbu kamabi kushiñu Israel unikaman Dios ax ka ësai kiaxa: Mix Babilonianu ꞌikë ꞌapun suntárunën kushikamanu bënëti ꞌinamëti kamina mi ꞌimainun min aintsikamabë ië́ti ꞌain, usai ꞌikëbë ka ënë ëmaribi në́nkë ꞌitima ꞌikën.

¹⁸ ꞌAínbi ka mixmi atunu ꞌinamëkëbëtama ënë ëma ꞌibuakin Babilonia unikaman në́nti ꞌikën, në́nkëbë kamina mix abátima ꞌain.

¹⁹ Kixun kakëxun ka Sedequíasnënribi kakëxa: —ꞌËx kana judioskama axa Babilonia unikamanu ꞌinamëkiani kuankë atumi rakuë́tin; usa ꞌain ka atun bixun ꞌë uisa kara oisatania usokin ꞌakin tëmëramiti ꞌikën.

²⁰ Kia ka Jeremíasnën kakëxa: —ꞌAínbi ka mix ꞌën ꞌibu ꞌikë atun mi bitima ꞌikën. Usa ꞌain kamina asérabi ꞌën mi Nukën ꞌIbu kikë banakama kakë ënë upíokin kuati ꞌain, usakin ꞌai kamina uisabi okëma ꞌianan ië́kë ꞌiti ꞌain.

²¹ Nukën ꞌIbun ka usaía ꞌiti ñukama ꞌë ꞌunánmiaxa, usa ꞌain kamina mix Babilonianu ꞌikë ꞌapunu ꞌinamëisama tani kërutima ꞌain:

²² ka kuat, kamabi xanukama axa Judánu ꞌikë ꞌapun xubunu bërúkë akamax ka bitankëxun Babilonianu ꞌikë, suntárunën kushikama ꞌinánkë ꞌiti ꞌikën, a xanukamax ka ësai kiti ꞌikën: Ka kuat, an ꞌunainrakë unikamanbi ka ꞌapu paránxun ꞌanun ꞌamiaxa; ꞌamikin ka chua menu tatsimëti nanë́kësa ꞌitánun ꞌimiakëxa ꞌimianan ka ꞌapu ꞌikëbi iskëmasa okëxa.

²³ Usa ꞌain ka Jeremíasnën ꞌapu abi kakëxa: —Kamabi min xanukama ꞌimainun min bëchikëkama ka Babilonianu ꞌikë unikaman bikë ꞌiti ꞌikën, ꞌimainun kamina mix ꞌapu ꞌaíshbi atunuax abátima ꞌain, mi ka suntárukaman atun ꞌapu Babilonianu ꞌikë a ꞌinánti ꞌikën, ꞌimainun ka Jerusalén ëma ënëribi tsin në́nkë ꞌiti ꞌikën.

²⁴ Usa ꞌain ka ꞌapu Sedequíasnën an bana ñuikë Jeremías kakëxa: —Mix abi tsótisa tanan bamatisama tankin kamina nuxnu banakë bana ënë uibi ñuixuntima ꞌain.

²⁵ Usainu nux banakë ënë kuabëtsini uxun ka ꞌën unikaman min ꞌë kakë bana ënë ñukánan ꞌën mi kakë abi mi ñukáti ꞌikën, nukaman mi ꞌaxuma ꞌanun kamina uisai kaina ꞌapubë bana akamabi nu nukama kati ꞌai kixun mi kati ꞌikën.

²⁶ ꞌAínbi kamina min ësokin atu kati ꞌain, ꞌën kana ꞌëa Jonatánnën xubunu amiribishi xutëkënxuma ꞌanun kan, anuax atuna bamai usa ꞌain, kixun ka Jeremíasnën kakëxa.

²⁷ Ësai banatankëx sënë́an ka kamabi aín kushikama anu rikianxun Jeremías ñukáti kuankëxa, kuanxun ka ñukákankëxa, ñukákëxun ka uisakin kara ꞌapun kaxa usakinbi a banakama kakëxa. Usa ꞌain ka uínbia ꞌapubë banaia kuakëma ꞌikë uisabi okima ënkankëxa.

²⁸ Usa ꞌain ka Jeremías anua suntárukama ꞌikë me mëníokë anu bërúakëxa, anúan axa ami nishkë Babilonianu ꞌikë unikaman biti nëtë ꞌitámainun ka usai ꞌiakëxa.