Jeremías 37 - Kashibo-Kakataibo Biblia

Jeremías ꞌapu Sedequíasnën Dios ñukáxunun kixun ká bana

¹ Babilonianu ꞌikë ꞌapu Nabucodonosornën ka Judá menua ꞌapu ꞌinun, Sedequías Josíasnën bakë bëchikë a ꞌimiakëxa, ꞌimikin ka Jeconías Joaquímnën bëchikë a ꞌapu ꞌikëbi chikíankëxa.

² ꞌAínbi ka ꞌapu Sedequías ꞌianan, abëa aín xubunu tëëkë unikama ꞌimainun unikamanbi an Dios kikë bana ñuikë Jeremíasnën usakin kanun Diosan kakë banakama unikaman kuama ꞌikën.

³ Usa ꞌain ka ꞌapu Sedequíasnën Israel uni rabë́, an bana ñuikë Jeremíasbë banatanun xuakëxa, akamax ka Jucal Selemíasnën bakë bëchikë ꞌimainun sacerdote Sofonías Maaseíasnën bakë bëchikë a rabë́ xukin ka ësokian katánun kakëxa: “Nukama kamina Nukën ꞌIbu Dios ñukáxunti ꞌain.”

⁴ A nëtëkaman ka sipunu atsímiti ñatankëma pain ꞌaish unikamanu kuani niakëxa.

⁵ Usaia ꞌimainun ka faraónën suntárukama Egipto menuax chikíkë ꞌiakëxa. Chikíkiani kuania kuati ka Babilonio suntárukama an Jerusalén bëarabuinxun ꞌakë atux ka aia kixun ñuikania kuati anuax chikikankëxa.

⁶ Usa ꞌain, ka Nukën ꞌIbun an bana ñuikë Jeremías abë banakin an ësokin kanun kakëxa,

⁷ min kamina ësai ka Nukën ꞌIbu Israel unikaman Dios ax kiaxa kixun axa ukë unikama kati ꞌain: “Judánu ꞌikë ꞌapu an ꞌëbë banati uni xukë a kamina kati ꞌain, axa ukë faraónën suntárukama axa a ꞌakini ukë ax ka bainu bërukiani Egiptonu kuantëkëanxa.

⁸ Usa ꞌaínbi ka Babilonio suntárukaman utëkëntankëxun Jerusalén ëmanu ꞌikë unikama ꞌanan ñatankin bianan aín ëma në́nti ꞌikën.

⁹ ꞌËx mitsun ꞌIbu ꞌain kamina bërúankati ꞌain: mitsúxi paránani kamina ësai kitima ꞌain, Babilonio unikamax ka rikianxa, usa ꞌain ka amiribishi nu ꞌai utëkëntima ꞌikën kiax kamina kitima ꞌain, usai ka ꞌitima ꞌikë usa ꞌain.

¹⁰ ꞌImainun ka mitsubë ꞌakanankënuxun mitsun kanankin atun suntárukama ꞌakëbëbi uiti kara ꞌakin ramiokë anua ꞌikë atun ꞌutanu ꞌiti ꞌikën, a unikaman ka amiribishi nirutëkënkin ëma në́nti ꞌikën. Kiax Nukën ꞌIbu kiakëxa.”

An bana ñuikë Jeremías sipuakan ñuikë bana

¹¹ Usa ꞌain ka Babilonio suntárukama Jerusalén ꞌanux ami ꞌikuaiaxi faraónën suntárukama ka ꞌaia kixun kuati anuax chikíakëxa,

¹² usa ꞌain ka an bana ñuikë Jeremías Jerusalén ëmanuax achúshi me kasunankë Benjamínën menu kuanxun aín ꞌaintsi ꞌibukama ꞌinánan, anribi ainan ꞌinun me bitsi kuankëxa.

¹³ ꞌAínbi ka Benjamínën xëputi kakë anu bëbakëbëbi achúshi uni Irías kakë Selemíasnën bëchikë Hananíasnën xuta suntárukama an ëma bëruankë ꞌain kushi capitán ax anu ꞌiakëxa, an ka Jeremías kuaniabi bërunkin kakëxa: —Mix kaina Babilonia unikamanu abati kuani ain.

¹⁴ Kakëxunbi ka Jeremíasnën kakëxa: —¡Usama ka, asérabi kana kin ꞌëx kana Babilonio unikamanu abátankëx anu ꞌinamëti kuaniman! ꞌAínbi ka Iríasnën usakin kakëxunbi kuaisamatankin ñatanbiankin ꞌapun unikamanu buánkëxa.

¹⁵ A unikaman ka ꞌitsaira ami nishkin an bana ñuikë Jeremías mëëtankëxuan an bërúankë suntárukaman sipuanun kakëxa, anu uni xëpútia Jonatán an kirika kuënëokë an aín xubunu ꞌakë anu xëpúnun ꞌamiakëxa.

¹⁶ Usakin sipuakin ka Jeremías ꞌukëmëuira anua ꞌitsa nëtë ꞌitinu sipuakëxa.

¹⁷ Usakin ꞌakë ꞌain ka ꞌitsa nëtë ꞌikëbëtan ꞌapu Sedequíasnën aín xubunu an bana ñuikë Jeremías buánxunun kixun kakëxa, kakëxun buánkë ka unin kuanuma ñukákëxa: —¿Mi kara min ꞌIbun ꞌë ñuikin achúshi banabi kakëma ꞌik? Kixuan kakëxun ka Jeremíasnën kakëxa: —Usa ka, ax ka ësa ꞌikën: mix ismina ꞌapu ꞌai, ꞌaínbi ismina mix Babilonianu ꞌikë ꞌapun aín unikama bimikë ꞌiti ꞌai kiax ka kia.

¹⁸ Usakin katankëxun ka an bana ñuikë Jeremías anribi ꞌapu Sedequías ñukákëxa: —¿Uisa ñu ꞌatimaira ꞌai a tanti bana kikësokin ꞌaíma mimi ꞌuchanan, min unikamamiribi ꞌianan, unikamami ꞌuchakë kara ꞌë sipuakanx?

¹⁹ ¿Uinu kara an Dios kikë bana ñuikë ꞌixunbi ꞌatimakin ñuikin Babilonianu ꞌikë ꞌapun ka aín suntárukambëtan ꞌanan mitsun meribi ꞌatimotima ꞌikë kixun ká unikama ax ꞌik?

²⁰ Usa ꞌain kamina bërí ësokin mi kamainun mix ꞌapu ixun, ꞌën mi ñukákësabiokin ꞌë ꞌaxunti ꞌain: Usa ꞌain kamina amiribishi Jonatán an kirika kuënëokë ain, xubunu ꞌë buántëkënun ꞌamitima ꞌain, anuax atuna bamai usa ꞌain.

²¹ Usa ꞌain ka ꞌapu Sedequíasnën ꞌain suntárukama anua atux ꞌikë me mëníokë anua Jeremías ꞌiminun kixun kakëxa, usakin ꞌakë ꞌikë ka kamabi nëtën pán ëmanua bixun uanxuankëxa. Usakin ka a ëmanua ꞌikë bai anuxun pán ꞌakë kakin anëkë anua bixun ꞌinánkëxa. Usakin ka a ëmanua pán këñutisama pain ꞌain kamabi nëtën achúshi pánra ꞌinánkëxa, usai ꞌika Jeremías anua ëmanu ꞌikë suntárukama ꞌikë me mëníokë anu bërúakëxa.