Jeremías 31 - Kashibo-Kakataibo Biblia

Israel unikama atun menubi riküatsintëkëan ñuikë bana

¹ Ësai ka Nukën ꞌIbu asérabi kiakëxa: “A nëtë́an ami nishkë unikaman Babilonia menu uan atun menubi utëkëan anun kana ꞌëx kamabi ñaká Israel unikaman Dios ꞌiti ꞌain, ꞌimainun ka atux ꞌën unikama ꞌiti ꞌikën.”

² Ësai ka Nukën ꞌIbu kiaxa: “Anu uni ꞌikëma menuxun kana bamatinuaxa ië́kë unikama ꞌëx kana nuibanan irakë, ꞌai kixun ꞌunánun atu ꞌakiankën. Uínsaran kara Israel unikaman anu atux upiti tanti baria anun kana,

³ ꞌëx kana bërámabi ami mërakën. ꞌËn kana nuibairakë ꞌixun atu bëríbi xënibua ꞌaínbi nuibatin, usa ꞌixun kana uisokin karana nuibakë usabi okin mitsu nuibatin.

⁴ ꞌËn kana amiribishi atun ëma atëkënun amiti ꞌain. Usokin ꞌaxunkëx ka atun manë sharíkati sharíkai ransai kuëënkanti ꞌikën.

⁵ Amiribishi ka Samaria matákamanu uvas ꞌapákanti ꞌikën, ꞌapáxun ka uin kara uvas ꞌapáxa an aín bimi pi ꞌitsaira kuëëni tsókanti ꞌikën.

⁶ Usa ꞌain ka anúan an bërúankë unikama, munuma kuënkëni Efraínnën matákamanuax kiti achúshi nëtë ꞌiti ꞌikën. Mitsux kamina anuxun Nukën ꞌIbu Dios rabi Jerusalénnu kuanti uti ꞌain kiax ka kiti ꞌikën. Ax ka nukaman Dios ꞌikën.”

⁷ Ësai ka Nukën ꞌIbu kiaxa: “Israel unikama Jacobnën rëbúnki, mitsux kamina munuma kantai kuëëni ësai kikanti ꞌain, nux kananuna bëtsi ëma kamasamaira ꞌain. Usa ꞌain kamina ësaiki kantakin mitsun bana kuami ësai kikanti ꞌain. Nukën ꞌIbun ka aín unikama ꞌakinkin ië́miakëxa, nukamax kananuna bëtsi menu bua ꞌaíshbi ñukëma amiribishi utëkëan.

⁸ Ka kuat, ꞌënbi kana aín tsipumia ꞌikë me anua bëanan, uinu kara me kuainakëakëxa anuabi timëbëtsinkin mitsu bëtëkënti ꞌain. Bëkëbë ka atubë bëxuñu uni, aín niti bëtsikë unikama, xanu ñuitsíkëkama ꞌimainun aín tuá bakënkëkama; ¡atux ka ꞌaisamaira uni ꞌaish amiribishi utëkënkanti ꞌikën!

⁹ Ka kuat, abë banakin ñukánan inkuatsini ka ukanti ꞌikën. Inkuatsini aia kana ꞌën anua ꞌumpax ꞌitsaira ꞌikë me anu bëkin, bai upí anun kuani uisaibi ñumi tuaxkitima anun uanti ꞌain. Usa ꞌain kana ꞌëx Israel unikaman papa ꞌain, ꞌimainun ka Efraínëx ꞌën bakë bëchikë apansa ꞌikën, kiax ka kiakëxa.

¹⁰ Bëtsi me kamanu ꞌikë unikama, mitsun kamina ësai kana ꞌëx ki kuati ꞌain, ꞌianan kamina parúmpapa kuëbí ꞌura tsókë unikama aribi ñuixunti ꞌain: Nukën ꞌIbun ka Israel unibu ꞌikë nukama abístanun ꞌimiakëxa, ꞌaínbi ka amiribishi timëtëkënkin bërúanxun an ñuina bërúankë unían aín ovejakama bërúankë usaribi okin ꞌati ꞌikën.

¹¹ Nukën ꞌIbun ka Jacobnën rëbúnki, aín unikama atusama kushiira unikamanua chikíankëxa.

¹² Usakian chikinkëx utankëx ka kuëëni kantai Jerusalénnu ꞌikë matákamanuax kuëënti ꞌikën, usai ꞌia Nukën ꞌIbun ꞌakinkin ñu ꞌinánkëx ka: ꞌitsaira kuëënkanti ꞌikën kuëënika, trigo ꞌimainun uvas baka ꞌakë vino ꞌimainun xëni ꞌianan, ovejakama ꞌimainun vacakamañu ꞌiti ꞌikën. Usa ꞌain ka a unikamax an ië́mikëx amiribishi ꞌain ꞌIbu Diosmi katamëti aín menu tsókë ꞌaish unin aín xubu rapasu ꞌapáxun ꞌupiokin ñu bërúankësa usaribi ꞌaish, amiribishi ñusmatëkënima kushi ꞌikanti ꞌikën.

¹³ Usai ꞌikëbë ka xanu chipash ransai kuëëmainun, uni bënákama axribi ꞌikëbë uni apankama atúxribi usai ꞌi kuëënti ꞌikën. Usai ꞌia nuibakin kana: masá nuitukë a ënia kuëënun ꞌimiti ꞌain, ꞌimianan kana masá nuitutia nitë́xëkë usamaira ꞌinua kuëënun ꞌimiti ꞌain.

¹⁴ ꞌËn kana sacerdotekamaribi upíira piti pinun ꞌimiti ꞌain, ꞌën unikamaxribi ka ꞌën ꞌinánkëxun ꞌaisamaira ñu upíirabu bitsi kuëënti ꞌikën. ꞌËx mitsun ꞌIbu ꞌaish kana asérabi ësai kin.”

¹⁵ Ësai ka Nukën ꞌIbu kiaxa: “Ramá kakë ëma anua ka ꞌitsaira rarumati masá nuituti inia uni kuakanxa. Ax ka Raquel axa aín tuákama rabanan inkë ꞌiaxa, usai ꞌika uínbi kuëënmisamai aín tuákama bamakë ꞌain ianxa.” (Usai ka kiaxa.)

¹⁶ ꞌAínbi ka Nukën ꞌIbun ësokin kaxa: “Raquel ꞌitsaira ini kamina; min bëunan mëskuti intëkëntima ꞌain, ꞌaínbi kana ꞌën mixmi ꞌitsaira masá nuitukë a kupín min biti ñu mi ꞌinánti ꞌain, usa ꞌain ka mixmi masánuituti inkë ꞌaínbi: min tuákama ax ami nishkë unikaman menuax, utëkënti ꞌikën. ꞌËx Mitsun ꞌibu ꞌaish kana asérabi ësai kin.

¹⁷ Min kamina uisa upí ñu kara minan ꞌinuxun ꞌaia a kaínti ꞌain: min tuákamax ka amiribishi aín menu utëkënti ꞌikën. ꞌËx min ꞌIbu ꞌaish kana asérabi ësai kin:

¹⁸ ꞌËn kana Efraínën rëbúnkikama ꞌitsaira masá nuituti ësai kikania kuan: ꞌËx kana bana kuakëma ꞌaish achúshi vaca tuá raëmisama usaribi ꞌiakën, usa ꞌikëbi kamina min ꞌë ꞌunánmamiakën; usa ꞌain kamina amiribishi mi rabitëkënun ꞌë ꞌimiti ꞌain, mix kamina ꞌën ꞌIbu Dios ꞌain.

¹⁹ ꞌËx kana mi rabiti ëanx mix kikësokin ꞌaíma mi ꞌura ꞌikësa ꞌian, ꞌaínbi kana ꞌën ñu ꞌakëkama ëni mimi sinántëkëan; usai ꞌikin kana ꞌën ꞌakë ꞌuchakama a mi ñuixua, usai ꞌi kana ꞌën kisinu kítimëti ꞌian; usai ꞌi kana katë́kësa ꞌianan ñuumasara tan, ꞌën bëná ꞌixun ꞌá ꞌuchakama sinani kana usai ꞌian.

²⁰ Efraínnu ꞌikë unikama ax ka, ꞌëx amira sinánkë bakë bëchikë usaribi ꞌikën; usa ꞌaish ka ax ꞌën kuëëinrakë ꞌën bakë bëchikë ꞌikën. Usa ꞌikë kana ñu ꞌatima ꞌaia usakin kamina ꞌatima ꞌai kixun kan, ꞌaínbi kana ami manukima usakin kamina ꞌatima ꞌain kixun kain; usa ꞌain kana ꞌën nuitunën upitani kuëënkin, atu ꞌitsaira nuibatin. ꞌËx min ꞌIbu ꞌaish kana asérabi ësai kin.

²¹ Israel unikama mitsun kamina anúnmi kuankankë mitsun bainu istisabi okin ꞌunánti oti ꞌain: anun kamina mitsun menubi a isëtsini uin kuanti kara kimashi utëkënti ꞌain; anunmi nikan baikama akamina upiokin iskanti ꞌain. ¡Israel unikama mitsux kamina, amiribishi mitsun ëmakamanubi utëkënkanti ꞌain!

²² ¿Uínsaran kaina ꞌën kakësabiokin ꞌaíma amami amami kuani, xanu tuá aín papan bana kuatima nikësaimi ꞌikankë a ënkanti ꞌain? ꞌËx mitsun ꞌIbu ꞌixun kana achúshi ñu ió okin ënë menu ꞌakën, xanúan ꞌain bënë ënxun bitëkënkë usaribi okin ka Israel unikaman ꞌëx kikësabiokin ꞌanuxun ꞌë mërati ꞌikën. Kiax ka kiakëxa.”

Diosan an bana ñuikë Jeremías uisaia Israel unikama ꞌiti namámia bana

²³ Nukën ꞌIbu kamabi kushiñuira, Israel unikaman Dios ax ka ësai kiaxa: “Uínsaran kara ꞌaisama ñu inuti tsóa ꞌaishi Judánu ꞌikë unikama aín menu kuania anun kana ꞌën amiribishi buántëkënti ꞌain, anun ka upiti tsóti ꞌikën: nun kananuna Nukën ꞌIbu Diosan kakëxun ꞌain bana tankin anunu tsókë anuxun ꞌaisatani, an nu upiokin sinánxunun, usokëxun kananuna nukamanribi kamabi ñu upiokin ꞌati ꞌain.

²⁴ Usa ꞌain ka Judá menuax umainun atun ëmakamanuax kuan akama kuantëkëni, naën tëkë unikama ꞌimainun an ñuina ꞌarakakë bërúankë unikama a menu tsóti ꞌikën.

²⁵ Anuxun kana axa numikëkama a ain piti ꞌinánan, axa xëaima kushiñuma ꞌi atsánkë akaman xëati ñu ꞌitsaira ꞌinun ꞌimiti ꞌain” Kiax kiakëxa.

²⁶ Ësokin namati kana ꞌëx bësuakën. Bësukin kana ꞌën namákë anunbi upí tankën.

²⁷ Ësai ka Nukën ꞌIbu asérabi kiakëxa: “Ka kuat, kamina kuakanti ꞌain, anun ꞌën uni kaikamë ꞌëomainun ñuinakamaribi ꞌaisamaira Israelnu ꞌimainun Judá menu ꞌimiti achúshi nëtë ka ꞌiti ꞌikën.

²⁸ ꞌImainun kana uisokin karana ꞌën bërámabi ëchíkin rurupakin menu pakëtanun ꞌaisama okën usaribikin, bërúanxun amiribishi birutëkënkin ꞌanun ꞌamitëkënti ꞌain. ꞌËx mitsun ꞌIbu ꞌaish kana asérabi ësai kin.

²⁹ Usa ꞌain ka a nëtë ꞌikëbë uíxbi amiribishi ësai kitëkëntima ꞌikën: Atun papan ka uvas kacha piaxa, usa ꞌaínbi ka atun bakë bëchikëkama aín xëta xëmanxëtia kitima ꞌikën.”

³⁰ ꞌAínbi ka uin kara uvas kachakë piaxa, ax aín xëta xëmanxëti ꞌikën. Usa ꞌain ka achúshi achúshi uni uix kara ꞌuchaia ax aín ꞌuchakë anunbi bamati ꞌikën. Kiax ka kiakëxa.

³¹ Nukën ꞌIbu ka ësai asérabi kiakëxa: “Ka kuat, kamina kuakanti ꞌain achúshi nëtë ka anun Israel unikama ꞌimainun Judánu ꞌikë unikamabëtan achúshi ñu ió okin ꞌatëkënti ꞌiti ꞌikën.”

³² Ënë achúshi ñu ꞌati ax ꞌën aín chaitiokëkamabëtan ꞌasa usama ꞌiti ꞌikën, atun ka Egipto menua ꞌën mëkënan tuínxun ꞌakësokin chikinkëxunbi; ꞌëx atun bënësa ꞌaínbi ka ꞌën atubëtan ꞌën ꞌakë achúshi ñu ax kikësabiokin ꞌaisama tankëxa. ꞌËx mitsun ꞌIbu ꞌaish kana asérabi ësai kiakën.

³³ Usa ꞌain ka achúshi ñu mëníokin ꞌën Israel unikamabëtan anun ꞌati nëtë aia, usa ka ꞌiti ꞌikën: Anun kana ꞌën bana aín nuitu mëu upíokin sinankian manukima aín maxkátan ꞌunánun ꞌamiti ꞌain. ꞌËx kana atun Dios ꞌiti ꞌain, ꞌimainun ka atux ꞌën unikama ꞌiti ꞌikën. ꞌËx mitsun ꞌIbu ꞌaish kana asérabi ësai kiakën.

³⁴ Usa ꞌain ka uínsaranbi uínbi bëtsi uni usa ka Nukën ꞌIbu ꞌikë kixun ꞌunámitima ꞌikën, an ꞌunánkë unikama ꞌimainun aín aintsikama ꞌëa ꞌunánun ꞌunánmitëkëinsama ꞌiti ꞌikën, atun ka kamaxunbi uni apanbu ꞌimainun tuáxura kamanbi ka Dios ꞌikë ꞌë ꞌunánkë ꞌiti ꞌikën. ꞌËn kana atun ñu ꞌatima ꞌakëkama mëníoxunkin, atun ꞌuchakëkama a amiribishi sinántëkëntima ꞌain. ꞌËx mitsun ꞌIbu ꞌaish kana asérabi ësai kiakën.

³⁵ Nukën ꞌIbu an bari nëtën pë́kati ꞌanan ꞌuxë ꞌispa akamaribi an imë́ pë́kati ꞌá, an ka parúmpapa bëchunia aín bëchun xukirui bananun ꞌimia, aín anë ka Nukën ꞌIbu kamabi kushiñu kakë ꞌikën, ax ka ësai kiakëxa:

³⁶ “Achúshi nëtën ꞌën anubi ꞌitiokin ꞌën nankë a tanti banakama kikësokin ꞌaima ka nëtën, Israel unikama ꞌën uni ꞌitima ꞌikën. ꞌËx mitsun ꞌIbu ꞌaish kana asérabi ësai kiakën.

³⁷ Ësai ka Nukën ꞌIbu kiaxa: achúshi nëtën kara unin naíkamë ꞌëo tupúanan meribi aín tapunkama ñachati ꞌikën, a nëtën kana ꞌën uni Israelkama kuëënkima atu timati ꞌain, atun kamabi ñu ꞌatimakin ꞌakë kupí. ¡ꞌAínbi ka uínsaranbi a ñu ꞌitima ꞌikën! ꞌËx mitsun ꞌIbu ꞌaish kana asérabi ësai kiakën.”

³⁸ Ka kuat, ësai ka Nukën ꞌIbu asérabi kiakëxa: “Achúshi nëtë ka anun ꞌën ëma ꞌatëkënti nëtë ꞌiti ꞌikën, ꞌakin ka torre Hananel kakë anuxunbi ꞌabianxun aín xëputi ꞌipitiu ꞌikë anubi sënë́onkin ꞌakë ꞌiti ꞌikën.

³⁹ Usa ꞌain ka anua sënë́nkë aín tupunkë ax puntëira kuani Gareb kakë matá me sënë́nkë anuax, Goá kakë me amibi kuainakëkë ꞌiti ꞌikën.

⁴⁰ Kamabi me sapankama anua uni ñuia maínkë a ꞌimainun anua chimapu unin pukë, ꞌimainun kamabi me axa Cedrón kakë xëxá anubi sënënakëkë a ꞌimainun, amiaxa bari urukë anua ꞌikë xëputi ꞌipitiu ꞌikë Caballo kakin anëkë akamaxbi ka ꞌënan ꞌiti ꞌikën, usa ꞌain ka kamabi ënë mekamax uínsaranbi rurupakin ꞌatima okëma a ñukamax ꞌiti ꞌikën.”