Jeremías 26 - Kashibo-Kakataibo Biblia

Jerusalénnu tsókë unikamax an bana ñuikë Jeremías ꞌakatsi kia ñuikë bana

¹ Anua Joaquím kakë uni Josíasnën bakë bëchikë an Judá menu ꞌapu ꞌikin pëukë ꞌain ka, Nukën ꞌIbun Jeremías abë banakin,

² ësokin kakëxa: “Anuxun ꞌë rabiti ꞌën xubunu ꞌikë me mëníokë anu nirakëxun, kamina ꞌën mi kakë banakama axa Judá menu ꞌikë ëmakamanuax anuxun ꞌë rabiti ꞌën xubunu ukë unikama kati ꞌain. Kakin kamina kamabi ꞌën mi kakë banakama a ñuixunkin tëokima kati ꞌain.

³ Usakinmi kakëxun kuakin sapi ka atun ꞌakë ñu ꞌatimakama a ënti ꞌikën, usakin ënia sapi kana atun ñu ꞌatima ꞌakë kupí tëmëramikin, ꞌën usakin ꞌati sinánkësokin ꞌatima ꞌain.

⁴ Ësokin kamina atu kati ꞌain, ꞌëx min ꞌIbu ꞌaish, kana usai kia kixun kamina kati ꞌain: Mitsun kamina ꞌën kakëxun kuama ꞌain, usa ꞌixun kamina ꞌën kakësabiokin ꞌaiman,

⁵ an bana ñuikë ꞌën unikama ꞌitsokin xutia xutiabi, kamina an kakë banakama kuaisamatankankë ꞌaínbi kamina atun bana kikësokin ꞌakankëma ꞌain,

⁶ usa ꞌain kana mitsunmi ꞌën kakëxun kuaisama tankëbëtan anuxun ꞌë rabikë xubu ënë Silónu ꞌikë a ꞌasaribiokin ꞌati ꞌain. Usakin ꞌakëbë ka Jerusalén ëma ënëmi kuaiti ꞌikën.”

⁷ Jeremías an bana ñuikë an anuxun Dios rabiti xubu anuxun bana ñuia ka sacerdote ꞌimainun këmëkin an bana ñuikë unikama ꞌimainun kamabi unikaman kuakëxa.

⁸ Usa ꞌain ka Diosan a kakë banakama atu katankëxa sënënia, sacerdotekama ꞌimainun an këmëkinshi bana ñuikë unikama ꞌimainun kamabi unikaman, ñatankin bikin kakëxa: “¡Mix kamina ꞌakë ꞌiti ꞌain!

⁹ ¿Uisa ꞌaish kaina mix rakuë́timaishi Nukën ꞌIbun anë ñui anuxun a rabiti xubu ënëx ka Silónu ꞌikë ax ꞌiásaribiti ꞌiti ꞌikë, kianan ënë ëmaxribisa anu uni ꞌikëmasa ꞌitánun masókë ꞌiti ꞌikë kiax kin?” Usai kiax sënë́nkë ka kamabi unikaman anuxun Dios rabiti xubunu Jeremías bëararakankëxa.

¹⁰ Usai ꞌikania ñuia kuati ka, Judánu ꞌikë aín kushibukama ax, anua ꞌapun xubu ꞌikë anuax kuankëxa anuxun Dios rabiti xubu xëkuë ió ꞌikë anu rikiankëxa, anu ka añu kara ꞌakanxa kixun istankëxun mëníoti anu tsóbukankëxa.

¹¹ Usa ꞌain ka sacerdotekama ꞌimainun an këmëkinshi bana ñuikë unikama atun aín kushibu ꞌimainun kamabi unikaman kakëxa: “Ënë unix ka ꞌakë ꞌiti ꞌikën, ax ka ënë ëma ñui ꞌatimati banaia. Mitsúnbi kamina axa usai kia mitsun pabitanbi kuakan.”

¹² Usai kitankëxa atux sënë́nkëbëtan ka Jeremíasnën aín kushikama ꞌimainun kamabi uni timë́kë a ësokin kakëxa: “Nukën ꞌIbunbi ka ꞌë xuaxa aín anë ñui rakuë́timaishi bananun, ꞌianan anuxun a rabiti xubu ñui kianan ënë ëma ñui kinun, mitsúnbi kamina ꞌëx kikë bana a kuakan.

¹³ Mitsux mi ꞌatimati tsókë a ënkin kamina, upíokin ñu ꞌakánti ꞌain mitsun ꞌIbu Dios kikësa okinshi kamina ꞌati ꞌain, usaími ꞌikankëbëtan ka axa ñu ꞌatima ka ꞌinúnuxun ꞌaia ax kikë, a ꞌëx kikë ñukama ꞌimitima ꞌikën.

¹⁴ Usa ꞌain kamina mitsun kamina ꞌë ñatankan usa ꞌain, uisa kaina oisatani usokin ꞌë ꞌakánti ꞌain.

¹⁵ ꞌAínbi kamina mitsun upíokin ënë ꞌunánkanti ꞌain: mitsunmi ñu ꞌatima ꞌakëmabi ënë ëmanu ꞌikë unikamabëtan ꞌë ꞌax kamina ꞌuchokë ꞌikanti ꞌain; asérabi ka Nukën ꞌIbunbi ꞌë ënë bana upíokin ñuianan kamabi a ñukama chikinakin ñuinun ꞌë xuaxa.”

¹⁶ Usa ꞌain ka aín kushibu ꞌimainun kamabi unikaman sacerdotekama ꞌimainun an këmëkin Diosan bana ꞌikëmabi bana ñuikë unikaman kakëxa: “Ënë uni a kupín nun ꞌati ñu ꞌatima ka ꞌaíma ꞌikën; ënë unin ka Nukën ꞌIbu Diosan anën nukama kaxa.”

¹⁷ Usakin kai atux sënë́nkëbë atúxribi nirukin ka aín kushibu raírinënribi anu timëkamë ꞌëokë unikama a kakëxa:

¹⁸ “Anua Ezequías Judá menu ꞌapu ꞌikë a barikaman ka Miqueas Moréset kakë ëmanu ꞌikë an, kamabi uni Nukën ꞌIbun anën Judá menu ꞌikë unikama ësokin kakëxa: Nukën ꞌIbu kamabi kushiñu ax ka ësai kiaxa. Sión ëma ax ka unin anu ñu ꞌapáti me buinakë usaribi bërúti ꞌikën, Jerusalén ëmax ka anu uni ꞌikëma me ꞌi ñankáishi ꞌiti ꞌikën, usa ꞌain ka aín bashi anuxun a rabiti xubu ꞌikë anu chuku ꞌatimashi kóti ꞌikën.

¹⁹ ¿ꞌApu Ezequías ꞌimainun kamabi Judá menu ꞌikë unikaman kara an bana ñuikë uni Miqueas rëtëakëx? Usakin ꞌati ka sinánma ꞌikën: ꞌapun ka ami rakuë́kin Dios atuisa nuibanun kixun kakëxa. Usa ꞌain ka Nukën ꞌIbun usai ka ñu ꞌiti ꞌikë kixuan aín unikaman ñuia usaía atunu ꞌinun ñu ꞌatima ꞌimiama ꞌikën. ¿Usa ꞌain karanuna nukaman an bana ñuikë uni ꞌatankëxun chaiira ꞌucha papikë ꞌiti ꞌain?” (Kiax ka ꞌain tukurikubu unikama atux kiakëxa.)

²⁰ An uni bana ñuixunkë Urías, Semaíasnën bakë bëchikë Quiriat-jearim kakë ëma ꞌikë uni axribi ka ënë me ꞌimainun ëma ñui Diosan usai kinun kakëx Jeremías kikësaribiti kiakëxa.

²¹ ꞌApu Joaquím, ꞌimainun an ñu mëëxunkë unikama ꞌianan aín kushibu akaman ka usaía Urías kikë bana kuakëxa, kuakin ka ꞌakatsi kixun bariakëxa. ꞌAínbi ka an bana ñuikë Urías a bana kuax ꞌapumi rakuë́ti Egipto menu abákëxa.

²² ꞌAínbi ka ꞌapu Joaquímnën Elnatán Acbor aín bakë bëchikë ꞌimainun bëtsi unikama Egipto menu xuakëxa,

²³ xukëx kuanxun ka Egipto menua bitsínkin bëxun ꞌapu Joaquím a Urías ꞌinánkëxa, ꞌinánkëxun ka Joaquímnën, ꞌatankëxun anu uni ñuñumakama maínti ꞌakë anu maínun unikama ꞌamiakëxa.

²⁴ Usa ꞌain ka Ahicam, Safánën bakë bëchikë axribi an bana ñuikë Jeremíasnën rabanan nëëti kiakëxa, kikëbëtan ka an ꞌati unikama ꞌináma ꞌikën.