Jeremías 23 - Kashibo-Kakataibo Biblia

Israel uni ꞌimainun Judánu tsókë akaman ka anun tëmëratima nëtë a kaínti ꞌikë kixun ñuikë bana

¹ Ësai ka Nukën ꞌIbu asérabi kiakëxa: “¡Uisai kara an ꞌën unikama aín ñuina ꞌarakakë unin ꞌakësa okin bërúankinma ꞌën ovejakama nëtë́nun ꞌimianan abísnun ꞌimikë akamax ꞌiti ꞌikën!”

² Nukën ꞌIbu Israel unikaman Dios an ka aín unikama ꞌakinkë ꞌapukama ësokin kaia: “Mitsun kamina ꞌën kaískë unikama bërúankinma abístanun abámian. Usa ꞌain kana ꞌën uisakin kaina ñu ꞌaisama ꞌan usakinbi mitsu tëmëramiti ꞌain. ꞌËx kana Dios ꞌaish ësai kin.

³ ꞌËnbi kana ꞌën unin raírikama anuaxa abánun ꞌën ꞌimia anubi utëkënun ꞌimiti ꞌain, ꞌimikëx ka aín ëmanubi ꞌutëkënti ꞌikën, usai ika ovejakama ꞌain pastonu kuantëkënkë usairibi ꞌiti ꞌikën, anuax ka bakë bëchipati ꞌuakamë ꞌëoti ꞌikën.

⁴ ꞌËn kana an ñuina bërúankë uni ꞌakësa ꞌinua an bërúanti ꞌapu nanti ꞌain, usakin nankëxun bërúai ka uimibi rakuë́tima ꞌianan achúshibi nëtë́nun ꞌimitima ꞌikën. ꞌËx min ꞌIbu ꞌaish kana ësai kin,”

⁵ Ësai ka Nukën ꞌIbu asérabi kiakëxa: “Ka is achúshi nëtë ka uti ikë, anúan Davidtan rëbúnki ꞌibuira, ax ꞌapu achúshi ñu ꞌunairakë ꞌixun unikama ꞌakinkin, Judá menu ꞌikë unikama ainra upíokin ñu ꞌaia bukunun ꞌakinti ꞌikën, usokëx ka ñu ꞌatima ꞌaíma upiti tsóti ꞌikën.

⁶ A nëtëkama ax ꞌapu ꞌain ka, Judá menu ꞌikë unikama ꞌië́mainun, Israel unikamaribi uínbi ubíokëma upitax tsóti ꞌikën. Ësokin anëkë ka ꞌiti ꞌikën: Nukën ꞌIbu ax ka an nu ië́mikë ꞌikën.”

⁷ Ësai ka Nukën ꞌIbu asérabi kiakëxa: “Ka kuat, anúan uínsaranbi ꞌëmi sinántëkënima ësai asérabi kikanti nëtë ka ꞌiti ꞌikën: ꞌËx kana Nukën ꞌIbu axa tsókë aín anë ñui kin an ka Israel unikama Egipto menua chikíankëxa,

⁸ usai kima ka sinanátëkëntimoi ësai kiti ꞌikën: Nukën ꞌIbu axa tsókë an ka Israel rëbúnkikama aín tsipumia ꞌanan bëtsi mekamanua abisa ꞌikëbi chikíankëxa. A unikamax ka aín menubi tsótënkënti ꞌikën.”

An Diosan banamabi këmë bana ñuikë unikama ñui kikë bana

⁹ ꞌËx Jeremías an Diosan bana uni ñuixunkë ꞌaish kana këmëkinshi bana ñuikë unikama ñui kin: ꞌËx kana ꞌitsaira ꞌën sinánkë anunbi ꞌaisamatani; ꞌën namikama bërërui paë́nkësa tanin, usai ꞌikin kana achúshi unia uvas baka ꞌitsaira xëaxun tankësa usaribi tanin. Atux ka Nukën ꞌIbumi ꞌatimati bananan aín bana upíira amiribi ꞌatimati banaia kana kuatin.

¹⁰ A menuxun ka unikaman ꞌaisamaira ꞌatima ñuira ꞌaia, ꞌën kana usaía ꞌinun ꞌatimakin sinánxuan, usa ꞌain ka a me masá nuitukë ꞌikën. ꞌImainun ka anu uni ꞌikëma menu kookë nikamaribi ëskiaxa usa ꞌain ka atun kushínbi uni ꞌatimakin ñu ꞌaxunia.

¹¹ Ësai ka Nukën ꞌIbu asérabi kiakëxa: “An Dios kikë bana uni ñuixunkë ꞌimainun sacerdotekamaxi ka ꞌën bana ꞌunánkëmasa ꞌikën; usa ꞌain kana anuxun ꞌë rabiti xubu anuxunbi ꞌaisama ñu ꞌaia atu mëran.

¹² Usa ꞌain ka atun tsóti ax tëira ꞌaish bai bëánkibukë ꞌianan, anun nikëxa me tsëtsërui tuñukë usaribi ꞌikën: ꞌën kana bëtsin titikakëx pakëkësa usairibi ꞌinun atu ꞌimiti ꞌain usokin ꞌakin kana atun sinánkësokin ꞌanun ꞌamiti ꞌain. Uínsaran karana ꞌën atun ñu ꞌatima ꞌakëkama mënioin anun kana atun ñu ꞌatima ꞌakë, uisakin karana ꞌati ꞌai usakin ꞌati ꞌain. ꞌËx Dios ꞌaish, kana asérabi ësai kin.

¹³ Ësai ka Nukën ꞌIbu kiaxa: ꞌËn kana Samarianu ꞌikë an ꞌën bana ñuixunkë unikama, ꞌatima ñukama an ꞌë ꞌaisama ꞌimikë ꞌaia isan: usakin ñu ꞌakin Baalnën anë ñuixunkin ka ꞌën kaisa Israel unikama, ꞌëmi manuti ꞌuranun ꞌimiakëxa.

¹⁴ ꞌËn kana Jerusalénnu ꞌikë an ꞌën bana uni ñuixunkë unikama ꞌatima ñu an ꞌë ꞌaisama ꞌimikë ñuira ꞌaia isan: usakin ka atun aín xanuma bëtsi xanu aín nami ꞌanan, bëtsi unikama këmëkin paránia, usakin ꞌakin ka uni ꞌatima sinánñukama, a uínbia ꞌain ñu ꞌatima ꞌakë ënxuma ꞌanun kixun sinánmia. Usa ꞌain ka atu ꞌimainun a ëmanu tsókë unikamax Sodoma ꞌimainun Gomorranu ꞌikë uni tsóasaribi ꞌën iskëx ꞌikën.

¹⁵ Usa ꞌain kana Nukën ꞌIbu kamabi kushiñu ꞌëx an këmëkinshi asérabi ꞌikëmabi bana ñuikë unikama a ñui kin: ꞌËn kana piti ꞌimainun ꞌumpax muka rokëñun; mëskukësamaira ꞌumpax xëanun ꞌinánti ꞌain, an bana uni ñuixunkë Jerusalénnu ꞌikë unikaman ñu ꞌaisama ꞌakë aka kamabi Judá menu ꞌikë Israel unikamanribi ꞌaia.”

¹⁶ Nukën ꞌIbu kamabi kushiñu ax ka ësai kiaxa: “Israel unikama mitsun kamina, an këmëkinshi uni ꞌën bana ñuixunkë unikama ax kikë a kamina kuatima ꞌain. Atúxa kikë ax atúnbi sinanx këmëishi, usai ka ꞌiti ꞌikë kiax kikë ꞌikën, ꞌën kana usai karamina kiti ꞌai kixun atu kakëma ꞌain.

¹⁷ Uikaman kara ꞌën bana kikësabiokin ꞌaisama tankin timaia, atun ka mitsu kati ꞌikën: Kamabi mitsun ꞌakë ñukama ax upí ꞌia. ꞌImainun ka ꞌain sinánkësa okinshia, an ñu ꞌakë unikamanribi mitsu kaia: Uisa ñu ꞌatimabi ka mitsunu ꞌitima ꞌikën.”

An bana ñuikë Jeremías munuma banai kia

¹⁸ ¿Uix kara anua Nukën ꞌIbu ꞌunántisama ꞌinun timë́kë anu ꞌiakëx? ¿Uin kara a isanan aín bana kuakëx? ¿Uin kara axa kia bëmë́kin kuakëx?

¹⁹ Ka kuat: Nukën ꞌIbu nishkë ax ka nëtë masákuatsini tunankuatsinkë usa ꞌianan, suñúan kushiira ukian ñu këñubëtsinkë usaribi ꞌatima sinánñu unikama ainan ꞌikën.

²⁰ Nukën ꞌIbu nishkë ax ka uisakin kara ñu ꞌaisatania usakin ꞌaxma tantitima ꞌikën. Usa ꞌain ka anun mitsun ax ka asérabi ꞌikë kixun sinanan, ënë ñukama upíira okin kuati nëtë ꞌiti ꞌikën.

Nukën ꞌIbu usai ka an këmëkin bana ñuikë unikama ꞌiti ꞌikë kiax kia ñuikë bana

²¹ “Ësai ka Nukën ꞌIbu kiakëxa. ꞌËn kana an këmëkinshi an ꞌën bana ñuikë unikama a xukëma ꞌain, ꞌianan kana uisa banabi ꞌën atu kakëma ꞌain, ꞌaínbi ka atúxbi usai ꞌiti kuëëanx ꞌën anë ñui banati sinanx bënëruxun ꞌaisatanxa.

²² ꞌAínbi ka anu ꞌëx ꞌikë anu kuanxun kuni ꞌën bana kuakë ꞌitsíanxa, kuaxun ka ꞌën bana ꞌën unikama ñuixunkë ꞌitsíanxa; usakin ꞌakin ka atun ñu ꞌatima ꞌakëkama ënun ꞌimianan ꞌatimai tsókë akama ënun ꞌimikë ꞌitsíanxa kiax ka kiakëxa.”

²³ Ësai ka Nukën ꞌIbu asérabi kiakëxa: “ꞌËx kana ꞌura ꞌiananbi ꞌurama ꞌaish Dios ꞌain.

²⁴ ¿Uix kara ꞌën istimaisakiax unëti ꞌik? ꞌËx kana naíkamë ꞌëonu ꞌianan kamabi menuribi ꞌain. ꞌËx min ꞌIbu ꞌaish kana ësai kin kiax ka Dios kiakëxa.

²⁵ Ësai ka Nukën ꞌIbu kiakëxa: ꞌËn kana kuan an bana ñuikë unikamax ka atúnbi namátankëx këmëi ꞌën isana namámikin atu ká kiax kia.

²⁶ ¿Uínsaran kara an këmëkinshi bana ñuikë unikama atun, ꞌën usai kinun kakëxumabia këmëkin atúnbi sinánkin bana ñuikankë a ënti ꞌik?

²⁷ Usa ꞌain ka këmëkinshi an bana ñuikë unikama an namákë bëtsi ñuixunkin, ꞌën unikama ꞌëmi manunun ꞌimia, usakin ka aín chaitiokë kamanribi Baal rabikin ꞌë manuakëxa.

²⁸ ¡An Dios kikë bana ñuikë unin namáxun ka aín namákë ashi bëtsi ñu ñuikinma ñuiti ꞌikën, ꞌaínbi ka uin kara ꞌën bana ñuia an ꞌën banaishi ñui kiti ꞌikën! Usai ka Nukën ꞌIbu kiakëxa.

²⁹ ¡Nun karanuna basikëñun trigo abëtan sënën kara kixun tupúnti ꞌain! ꞌËx kikë bana ax ka tsi rëkirukësa ꞌimainun achúshi manë taxuñunën mapara tukapakësa usaribi ꞌikën. ꞌËx min ꞌIbu ꞌaish kana ësai kin.

³⁰ Usa ꞌain kana ꞌëx an këmëkinshi bëtsibë paránankin ꞌën banaisa kixun bana ñuikë unikama ami nishin kiax ka asérabi Nukën ꞌIbu kiakëxa.

³¹ ꞌËx kana an bana ñuikë unikama sinánñuma kuainxun an bëtsin bana ñuikë ami nishin.

³² ꞌËx kana an bana ñuikë unikama an këmëkinshi namákë ñuixunkin ꞌën unikama; bëtsiokin sinánmia. ꞌËn kana xukin uisa bananbi kakëma ꞌain, usa ꞌaish ka ꞌën unikama ꞌakinsama ꞌikën. ꞌËx min ꞌIbu ꞌaish kana asérabi ësai kin.”