Jeremías 20 - Kashibo-Kakataibo Biblia

Ax ami nishkë Pashur axa usai ꞌiti ñuia Jeremías kia ñuikë bana

¹ An anuxun Dios rabiti xubu bërúankë aín kushi Pashur sacerdote ax ka Imernën bakë bëchikë ꞌiakëxa, an ka usai ka ñu ꞌinuxun ꞌaia kiaxa Jeremías kia kuakëxa,

² kuaxun ka ñatanxua mëëtankëxun i kiniokë anun tabiataxkin sipuanun ꞌamiakëxa, ax ka Benjamínën menu kuani anun chikiti xëkuë cha au ꞌiakëxa, anuxun Dios rabiti xubu a rapasu ꞌikë anu ka sipuakëxa.

³ Usokin ónkë achúshi nëtë ꞌinukëbëtan ka Pashur, an Jeremías sipuakë anua chikínti uni xuakëxa, xukëxuan bitsínkin bëkëxun ka Jeremíasnën kakëxa: “Bërí ka Nukën ꞌIbun min anë Pashur ꞌikëbi bëtsiokin nankin Magor-misabib kakin min anë nanxa, ‘Magor-misabib ënë banax ka kamabinuax ka uni rakuë́ti ꞌikë ki kikë ꞌikën.’

⁴ Ësai ka Nukën ꞌIbu kiaxa: ꞌËn kana mi ꞌimainun min ꞌunánkë unikama axribia ꞌaisamaira rakuë́nun ꞌimiti ꞌain; usa ꞌain ka min ismainunbi ax aminishkë unikaman aín manë xëtokën min ꞌunánkë unikama ꞌati ꞌikën. ꞌËn kana kamabi Judánu ꞌikë unikama Babilonianu ꞌikë ꞌapun aín suntárukamabëtan ñatanbiankin aín manë xëtokën anuxun atu rëtëanan raíri unikama aín me Babilonia anu tsónun buánun ꞌamiti ꞌain.

⁵ ꞌAmianan kana axa mitsumi nishkë unikama ënë ëmanua ꞌikë ñu upíbu, ꞌimainun unikaman ñu upíirabu a ꞌianan Judánu ꞌikë, ꞌapukaman ñu upíbu akama Babilonianu buánun ꞌamiti ꞌain.

⁶ ꞌImainun ka Pashur miribi axa mimi nishkë unikaman Babilonianu min aintsikama këñunbi buánti ꞌikën. Anuax ñuia ka min ꞌunánkë unikama këñunbi anubi mi mainkanti ꞌikën, min kamina këmëkin asérabi ꞌikëmabi usai isa ñu ꞌiti ꞌikë kixun bana atu ñuixuankën.”

An bana ñuikë Jeremías unikaman ꞌakë ñu kuëënima nishi Nukën ꞌIbubë bana

⁷ ꞌËn ꞌIbu, min kamina ꞌë paránkën, usa ꞌikëbi kana minmi ꞌë paránun ꞌamian; usa ꞌikëbi kamina mix ꞌën kushisama ꞌixun ꞌë isin. Kamabi hora ka unikaman ꞌë ꞌusani ꞌëmi kuaikania.

⁸ ꞌËx banakëtibi kana bënë́kinshi ñu ꞌatima ꞌati ꞌimainun ñu masóti a ñui banain; usai kikin min bana ñuia ka ënkinmaira ꞌë ꞌichati ꞌëmi kuaikania, ꞌën mix kikë bana ñuikëbë.

⁹ Uínsaran nëtën karana ꞌëx kian: “ꞌËn kana amiribishi Nukën ꞌIbumi sinántëkëntima ꞌain, usa ꞌain kana amiribishi aín bana ñuitëkëntima ꞌain,” usa ꞌain ka min banakama ax tsi rëkirukënën ꞌakësa okin ꞌën xokama ꞌë ꞌukëmëuxun xarokësa okin ꞌaia. Usa ꞌain kana mixmi kikë banakama ꞌëbi ñuikinma sinaínshitisa tanin ꞌaínbi ka usokin ꞌaisama ꞌikën.

¹⁰ Usa ꞌain kana munura banai unikama ësai kanania kuatin: “¡Kamabinuax ka ꞌitsaira rakuë́kania!” Usa ꞌain ka ësai kikania: “¡Uisax karanuna a unimi manánti ꞌai isti kamina rikuatsinti ꞌain!” ꞌËn ꞌunánkë unikamanbi ka ꞌën ñu ꞌatima ꞌati kuëënkania. Usai ꞌi ka ësai kikania: “¡Parántisa ꞌikë parántankëxun kananuna nun ira a ꞌatimokin kananti ꞌai kiax ka kikania!”

¹¹ ꞌAínbi kamina mix Nukën ꞌIbu ꞌaish ꞌëbë ꞌai, achúshi uni ꞌakánanti ꞌunáinra ꞌikë uínbi kanánkëma usaribi ꞌain; usa ꞌain ka an ꞌë ꞌakatsi kixun nuikë unikaman, ꞌë rëtëtima ꞌikën; usai ꞌika atun ꞌanuxun sinánkë usakin ꞌaíma rabinkë bërúti ꞌikën, usaía rabinkë ax ka uínsaranbi uínbi manukëma ꞌiti ꞌikën.

¹² Nukën ꞌIbu kamabi kushiñuira, min kamina upí unikaman ñu ꞌakë a ꞌunanin, min kamina unin aín nuitu ꞌukëmëu ñu ꞌaisatankin sinánkë, akamabi ꞌunánin, ꞌën kana ꞌëmi ꞌakinun mi ñukan, usa ꞌain kamina uisakin kaina a unikama tëmëramiti ꞌai a ꞌë ismiti ꞌain.

¹³ ¡Nukën ꞌIbumi ka kantakan Nukën ꞌIbu ka rabikan!, an ka ꞌatima ñu ꞌakë unikaman tëmëramikëx bënëtiabi uni ië́mia.

¹⁴ ¡ꞌAtimokë ka anun ꞌën titan ꞌë tuá nëtë ax ꞌiti ꞌiakëxa! ¡Anun ꞌën titan ꞌë bakë́an nëtë ax ka ꞌupiokin sinánxunkëma ꞌiti ꞌikën!

¹⁵ ¡ꞌAtima okë ka an ꞌën papa bëbu tuá ka min bëchikë bakë́anxa kixun kakin kuëëmia uni ax ꞌiti ꞌikën!

¹⁶ ¡A unix ka ëmakama Diosan xënibua ꞌaínbi usabi rakátanun këñuasaribi ꞌiti ꞌikën! ¡An ka pëkarakëma ꞌaínshi uni rakuë́ti ꞌakánanti ꞌain kuënkënkë a kuanan, bari xamarukëbëtan anun bënëtishi mëníokati ñu banókë kuati ꞌikën,

¹⁷ uisati kara Diosan ꞌën titan puku ꞌukë mëuküax rëmumënun ꞌë ꞌimiama ꞌikën! Usaribiti ax anu uni ñuia maínkë kinisa ꞌain kana ꞌëx uínsaranbi bakë́ama ꞌitsían.

¹⁸ ¿Uisa kupín kara ꞌëx paë tani masá nuituti ꞌianan, ꞌëx anun tsókë nëtëkaman rabinishi tsótiokin ꞌën titan ꞌë tuakëx? ¿Uisa kupín karana ꞌën titan puku ꞌukë mëuküax rabinishi ꞌëx bamati nëtë ꞌitámainun tsónux bakë́ankën?