Jeremías 2 - Kashibo-Kakataibo Biblia

Nukën ꞌIbun kakësama oi Israel unikama ꞌisamatan ñuikë bana

¹ Nukën ꞌIbu Diosan ka ësokin ꞌë kakëxa:

² Anu kuanxun kamina Jerusalén ëmanua ꞌikë unikama; munuma kuëníshkin upíokian kuanun kati ꞌain: ¡Ësakin mitsu kanun ka Nukën ꞌIbu kiaxa! ꞌËn kana bëná pain ꞌixunmi ꞌën kakësabiokin ꞌá a sinanin, usa ꞌixun kamina an biti unían mëratiokëxun xanun nuikësa ꞌinun mitsun ꞌë nuibakën, ꞌimainun kamina anu uni ꞌikëma me anu ñu ꞌapátisama anuxunbi ꞌë ꞌakiankën.

³ Israel unikama ax ka upíira ꞌinun ꞌën kaískë ꞌaish ñu bimi upíirabu usaribi ꞌikën. Usa ꞌikëbia an ꞌatima okë unikama akana uisa ñubi kara anu ꞌimikin ꞌën ꞌatima okën. ꞌËx Dios ꞌaish kana usai kin.

⁴ Jacobnën rënbunki Israelnën ꞌaintsikaman ka Dios kikë bana kuati ꞌikën.

⁵ Ësai ka Nukën ꞌIbu kiaxa: ¿Añu ñu ꞌatima ënua mërax, kara min chaitiokama ꞌëmi ꞌunánkëx? Atúnbi bëtsi dioskama añu ñu ꞌikëmabi rabikë kupín, atúxribi usaribi ñankáishi bërukankëxa.

⁶ Usai ꞌikin ka ꞌën Egipto menua chikían ꞌixunbi ꞌë bariti sinánkama ꞌikën, anu uni ꞌikëma me, me ëskikë ꞌimainun kuëtú me, ꞌumpaxñuma ꞌimainun anun nisama ꞌatima me, anu uni tsókëma ꞌianan, me anun uni nikëma anun nitsiabi ꞌën ꞌakian, a sinánkin ꞌë rabiti sinánma ꞌikën.

⁷ ꞌËn kana mitsu me upíira anu ꞌapákëxa, ñu ꞌitsaira tuaiami piti me anu mitsu bëakën. ꞌAínbi kamina mitsun anu utankëxun ꞌën ꞌinánkë me masókën, usakin ꞌakin kamina ꞌëx a me isi kuínsanun ꞌë ꞌimikin, ꞌën ꞌinánkë me ꞌatima okën.

⁸ ꞌImainun ka sacerdote kamanribi ꞌën ꞌakinun ꞌë bariti sinánma ꞌikën, ꞌimainun ka an ꞌën bana kuënëo ꞌunánkë unikamanbi ꞌë ꞌunántisamatankëxa, ꞌimainun ka ꞌapukamaribi ꞌëx kikësokin ꞌaisamatamainun, an Dios kikë bana ñuikë unikamaxribi ꞌëmi manutankëx unin rabikë Baal a ñuishi banakëxa, usai ꞌikian a ñukama rabikë ax ka ñankabia ꞌakë ꞌiakëxa.

Dios usakian Israel unikama ꞌati kia bana

⁹ Usa ꞌain kana ꞌëx Min ꞌIbu ꞌaish ësai kin. ꞌËx kana bërí mitsu ꞌimainun mitsun xutakama ñui usakin ka an bana mëníokë ꞌapukaman ꞌanuxun ꞌaia kin.

¹⁰ Amia bari kuabúkë au rikianxun upíokin pain istankëxun kamina; anuxun bëtsi uni Guedar kakë ëma anu kuankin upíokin, an bërí ꞌikësai kara ñu ꞌiakëxa, kixun an kuatanun uni xuti ꞌain,

¹¹ usa ꞌain ka an Diosan bana kuakëma unikaman kara a rabitia ꞌakë ñukama ëanxa kixun ñuikania uínsarabi kuakëma ꞌikën. ¡A ñukamax ka këmëkinshia ꞌakë ñu ꞌikën! ꞌaínbi ka ꞌën kaisa unikaman, kushiira ꞌikëbi ꞌë rabiti ënxun bëtsi ñukama rabia.

¹² ¡Naíkamë ꞌëo ka unix ꞌikësai ënë ñukama ꞌikëbë, rakuë́ti ꞌikën! ¡Usai ꞌika ñu ꞌaisama ꞌikëbë bërëti ꞌikën! ꞌËx Min ꞌIbu ꞌaish kana usai kin.

¹³ ꞌËn unikama ka ꞌiásamaira ꞌinun chaiira ꞌuchaxa: Usai ꞌikin ka ꞌën bana kikësama oi ꞌikin ꞌë manukankëxa, anua ꞌumpax ꞌikë nëminra usaribi ꞌixun na tsónun ꞌakinkëxunbi ꞌë manúakëxa, usakin ꞌë manuika anua ꞌumpax biti nëminra ꞌumpaxñuma ꞌinun ëskikë usai atux ꞌiakëxa.

Israel unikama aín ꞌucha kupí anunbi tëmëra ñuikë bana

¹⁴ Israel unikama ax ka unin ñu mëëmikëma; ꞌianan ka atux tëmërakin ñu mëëmikë anuax bakë́ama ꞌikën. ¿Uisa kupín kara usa ꞌikëbi usakin ꞌakanin?

¹⁵ ¿Uisa kupín kara axa ami nishkë unikama paru ꞌinuánëxa, aín piti ñu binux kuëëkë usa kuatsini ukin, Israel unikama bëara buinkankëx? Axa atumi nishkë unikaman aín me ꞌatima onan; aín ëmakamaribi nënkin xarokë ꞌain ka achúshi unirabi anu bëruama ꞌikën.

¹⁶ Egipto menua ꞌikë ëma rabë́ Menfis ꞌimainun Tafnesnu ꞌikë unikama, maxkukin ñuumara ꞌinun ꞌimiakëxa.

¹⁷ Ësaia ꞌikan ax ka atun ꞌIbu Dios ꞌikëbi, ꞌë rakankë kupín ꞌia ꞌikën, ꞌimainun ka uisai tsóti kara kixun kuania unánmia ꞌixunbi ꞌë manukankëxa.

¹⁸ Bërí kaina, ¿Egipto menu ꞌikë Nilo kakë baka ꞌumpax xëanan, anu ꞌikë unikaman ꞌakinun ñukati kuankin kaina añu biti ꞌain? ¿Añu kaina Asiria menu ꞌikë Éufrates kakë baka ꞌumpax a xëanan, anu ꞌikë unikaman mitsu ꞌakinun ñukákin biti ꞌain?

¹⁹ Min ñu ꞌatima ꞌai ꞌuchakë anbi mi ꞌatima oti ꞌikën, mix ꞌatimakë anbi mi ꞌatima oti ꞌikën. Usa ꞌain kamina min sinánti ꞌain, ꞌëmi ënkin rabikëma ax ka ꞌaisama ñu ꞌikë kixun isti ꞌain, ꞌëx kana min ꞌIbu Dios a ꞌain. ꞌËx Dios kamabi kushiñu ꞌaish kana usai kin.

Diosan bana Israel Judá menu ꞌikë unikaman kuaisamatan ñuikë bana

²⁰ Bërí ka ꞌitsabaritia anun mitsun ꞌën bana kuaisamatani ꞌikan ꞌikën, usai ꞌi kamina ꞌëbë ënanankësa ꞌiakën, ꞌianan kamina ꞌë rabitisama tani ꞌikankën. Usai ꞌikin kamina ꞌë kakën: Bërí kananuna min kakësokin ꞌatima ꞌai kixunribi ꞌë kakankën. ꞌIanan ka kamabi aín bashi manámi ꞌikë ꞌimainun i pëñanakëkëkama tëmúxun, xanun uni aín nami ꞌami ꞌikësaishi niakën.

²¹ ꞌËn kana mi i upíira ꞌapákësa ꞌimianan, uvas bëru upíira ꞌapákëx kókësa usaribi ꞌinun ꞌimiakën. ¡ꞌAínbi kamina atiaira ꞌaisamai ninu ꞌikë bimi mukaira ꞌinun tuákësa usaribi ꞌikankën, usa ꞌikë kana ꞌënribi mitsu ꞌunánkëmasa okën!

²² Anun chupa uxu ꞌitánun chukakë a ꞌimainun, anun chupa chukati ñu anun uitishi okin chukakëxbi ka ꞌën iskëx mitsun ꞌucha anubi ꞌiti ꞌikën. ꞌËx Mitsun ꞌIbu ꞌaish kana usai kin.

²³ ¿Uisa ꞌaish kaina mitsux: Nux kananuna mimi ñu ꞌatima ꞌai ꞌuchanan bëtsi dioskamaribi rabi ꞌuchakëma ꞌai kiax kikanti ꞌain? Kamina sinánkanti ꞌain, uisai kaina mitsux me sapan Ben-hinom kakë anuax bëtsi dios rabi ꞌikankë kixun. Usa ꞌain kamina upíokin pain añu kaina mitsun ꞌakë kixun iskanti ꞌain, mitsux kamina camello aín xanuxa bëtsi bari bënëti kuani amami amami nikë usaribi ꞌikanin;

²⁴ burro raëkëma aín xanux ka ninu atsanx kuantankëx rakatax aín bënëbë ꞌisatani munuma raxëkanani uíni rëxun kia. Usai ꞌikin aín xanu ñuñakë ax ka uínbi ñonkin ënanamitisama ꞌikën. ꞌIanan ka aín bënë achúshitan aín xanu barikin mëraxun atsankimaira ñuñaia: usa ꞌikin ka aín bënën bënë́kinshi mëraxun ñuñaia.

²⁵ ¡Israel unikama mitsux bëtsi dioskama rabi abákiani taëinshi kuani min taë ñumi tachakanan, shimai mitsun tëru ëskitima ꞌain! ꞌAínbi kamina mitsux kiakën: Nukaman kananuna bëtsi dios rabikin ëntima aín; usa ꞌain kananuna bëtsi menuxun rabikë dioskama, nuibati atunu kuani nitsin.

²⁶ An ñu mëkamakë uníxa ñu mëkamatia mërakëx rabinkësa, usaribiti ka Israel unikamax rabinkë ꞌiti ꞌikën, usai ꞌika Israel unikama atun ëmanu bukukëkama ꞌimainun, atun ꞌapukama kushibu ꞌimainun sacerdote unikama an Dios kikë bana ñuikë akamabëbi katë́kë bërúti ꞌikën;

²⁷ usa ꞌixun ka achúshi i nikë ësokin kakania: Mix kamina nun papa ꞌain ꞌimainun ka achúshi maxáx ësokin kakania: Mix kamina ꞌën tita ꞌain. Usokin a ñukama ꞌakinbi ka ꞌëmi kasuakëkin aín bëmánan ꞌë ismima. Usai ꞌikinbi ka ꞌaisama ñu inúkin tankinshi ꞌë ꞌakinun kixun kakania: ¡Nu kamina ië́mi uti ꞌain!

²⁸ Judá menu tsókë unikaman. ¿Uinu kara bërámami mitsúnbi ꞌa dioskama ax ꞌik? ¡Mitsun dios ax ka ꞌitsaira ꞌaish ëma kamabëtan sënë́maira ꞌikën! ¡Usa ꞌain ka atux ꞌatima ñu inutia uisakin, ië́misakara kixun mitsu isi uti ꞌikën!

Dios Judá menu tsókë Israel unikama atun ñu ꞌatima ꞌakë kupí tëmërati kia ñuikë bana

²⁹ ¿Uisa kupín kaina mitsun ꞌën bana kuaisamatankë ꞌixunbi, usakin kamina ñu ꞌatima ꞌai kixun ꞌë kaisa tankanin? ꞌËx Min ꞌIbu ꞌaish, kana ësai kin.

³⁰ ꞌËn kana ñankáishibi mitsun bakë bëchikëkama tëmëramiakën, atun ka ꞌën bana ꞌunánkin ax kikësokin ꞌaisama tankëxa. Mitsúnbi kamina paru ꞌinúan raëkëma, ꞌain piti bitsi në́kësa usaribi ꞌikin, an ꞌën bana ñuikë unikama ꞌakankën.

³¹ (Axa bërí tsókë mitsun kamina ꞌën bana upíokin kuati ꞌain, ꞌëx kana Dios ꞌain.) Israel unikama, ¿ꞌëx karana anu uni ꞌikëma mesa mitsunan ꞌian? ¿ꞌianan karana anua me ꞌitsaira bëánkibukë chichabiantisama usaribi mitsunan ꞌian? ꞌËn unikama, ¿uisa kupín kaina: bërí kananuna uisa ñu ꞌatimabi inútima ꞌai kianan, uínsaranbi kananuna mi sinántëkëntima ꞌai kikanin?

³² ¿Achúshi xanun kara unibë mëranankia bikë ꞌain mëñusutikama manukin rakanti ꞌik? Usa ꞌaínbi ka ꞌën unikama, ꞌitsaira baritia ꞌimi ꞌëmi manúakëxa.

³³ ¡Upiokin kamina ꞌunan uisakin kara unin aín kuëënkë xanu baria kixun! ¡Usa ꞌixun kamina anuxun ꞌatima ñu ꞌati xubu anuxun ꞌakësa ꞌinun ꞌatima ñu ꞌati ꞌunánkan!

³⁴ Mitsun chupax ka uni ñuñuma ꞌimainun ñu ꞌatima ꞌakëmabi, ꞌaxun aín imin pukukësa ꞌikën, a unikamax ka ñu ꞌatima ꞌaiabi uni mërakëmasa ꞌiakëxa.

³⁵ ꞌAínbi ka usakin a ñukama axi atux kia: Nukamax kananuna ñu ꞌatima ꞌai ꞌuchama ꞌain. Nukën ꞌIbu Dios ka bërí numi nishima. Asábi ka usai ki kamina ismina ꞌuchakëma ꞌai kiax kikanin, usa ꞌain kamina ëbëtan anuxun bana mëníokë anuxun mëníoti ꞌain.

³⁶ ¿Uisa kupín kaina bëtsi unikamabë biranankatsi kixun bënë́kinshi sinanin? Usa ꞌaínbi ka Egipto menu tsókë unikaman ka mitsu ꞌakintima ꞌikën, Asiria menu tsókë unikaman mitsu ꞌakianmasa okin.

³⁷ Usa ꞌain kamina Egipto menuax utëkëni chaiira ꞌinun katë́kë ꞌaish utëkënkanti ꞌain, ꞌën kana mitsux ami katamëisa tankë akama mitsu nuibaxunma ꞌanun kuëënxunkëma ꞌain, usa ꞌain kamina atubëtan añubi mitsun ꞌatima ꞌain kixun ka kakëxa.