Jeremías 19 - Kashibo-Kakataibo Biblia

Chumu tukikë ñui kikë bana

¹ Nukën ꞌIbun ka ꞌë kakëxa: “Anuxua ꞌakë anu kuanxun kamina achúshi chumu mapú ꞌakë maruti ꞌain, usokin ꞌatankëxun kamina ëmanu ꞌikë ꞌain kushikama ꞌimainun sacerdote aín kushibu raíri timëti ꞌain.

² Usokin ꞌabiani kamina Ben-hinom kakë me sapan anu kuanti ꞌain, anua Chumu sani pukë kakë Xëputi ꞌikë a bëtánain kuantankëx, anu bëbatankëxun kamina ꞌën mi kakë banakama atu ñuixunti ꞌain.

³ Ënë bana: Ka Judá menu tsókë ꞌapukama ꞌimainun Jerusalén ëmanu tsókë unikaman kuati ꞌikën, ësokin mitsu kakëxunmi kuakanun ka Nukën ꞌIbu kamabi kushiñu, Israel kaman Dios ax kiaxa: ꞌËn kana ñu ꞌaisama chaiira ënë menu, tsókë unikamaxa a ñuia kuati ꞌitsaira rakuë́kantanun ꞌimiti ꞌain.

⁴ Usa ꞌain ka Israel kaman ꞌëmi manutankëxun ënë me ꞌunánkëma mesa ꞌimikin anuxun bëtsi dioskama rabiakëxa. Rabikin ka unínbia ꞌakë ñukama sanuira ñu xaroxuankëxa, ꞌaínbi ka atúnbi a dioskama ꞌunánma ꞌikën, a dioskaman ka a nëtëkaman uisai kara ꞌiabi uínsaranbi ꞌakianma ꞌikën, ꞌimainun ka atun chaitiokëkama ꞌianan Judánu ꞌikë ꞌapukamanbi ꞌunánma ꞌikën. ꞌUnánkima ka a menuxun uni ñu ꞌatima ꞌakëmabi aín imi menu ꞌëbankiantanun ꞌakankëxa.

⁵ ꞌAnan ka anuxun atun bakë bëchikëkama Baal kakë atun dios a ꞌaímai këñutanun xaroxunti ꞌakëxa, ꞌaínbi kana usakia ñu ꞌanun káma ꞌain, ꞌianan kana ꞌënbi usakin ka ñu ꞌati ꞌikë kixun sinánma ꞌain.

⁶ Ka kuat, anun ënë me Tófet kanan me sapan Ben-hinom kakima, me sapan anuxun uni ꞌakë kakin anun anëti nëtë ꞌiti ꞌikën. ꞌËx min ꞌIbu ꞌaish kana ësai kin.

⁷ Ënë menuxun kana atun sinánkësokian Judá menu ꞌikë unikama ꞌimainun Jerusalén ëmanu tsókë unikaman ꞌanun ꞌamitima ꞌain. Usokin ꞌakima kana axa ami nishkë unikaman atuira ꞌakanankin ꞌakëxa, ñuia ñuina pëchiñu ꞌimainun axa pianankë raëkëma ñuinakaman piti ꞌimiti ꞌain.

⁸ Ënë ëma kana anu uni ꞌikëma mesa ꞌimiti ꞌain ꞌimikëbë ka anu ꞌikë unikamax ꞌitsaira rakuë́ti ꞌikën. Usa ꞌain ka axa anun inúkë unikamax masókin ꞌaíma ꞌitánun këñua a isi ratuti rakuë́kanti ꞌikën.

⁹ ꞌAnan kana axa aminishkë unikama atun ëma bëarabuinkë ꞌaia, panankin a piti ꞌaíma ꞌain bënë́kin unikaman atun bakë bëchikë bëbukama ꞌimainun ꞌini bëchikëkamaribi piti ꞌikën, ꞌimainun ka unínribi uni itsi piti ꞌikën kixun kakëxa.

¹⁰ Ësokin pain atu katankëxun kamina, axa mibë ꞌikë mi rapasu ꞌikë unikaman ismainunbi ñutë mushkin tukapakin,

¹¹ ësokin kati ꞌain: Nukën ꞌIbu kamabi kushiñu ax ka ësai kiaxa: Ënë unikama këñunbi kana atun ëma ñutë me ꞌakë tukibukënëxa mëníotëkëinsama usaribi ꞌitánun atu ꞌati ꞌain. Usakin ꞌakë ka unin uni ñukë anu maínti me ꞌaíma ꞌain Tófet kakë anu maínti ꞌikën.

¹² Usakin kana ënë ëma anua tsókë unikama këñunbi ꞌati ꞌain. ꞌAkin kana Tófet ꞌikësaribitia ꞌitánun ꞌati ꞌain. ꞌËx min ꞌIbu ꞌaish kana ësai kin.

¹³ Jerusalénnu ꞌikë xubukama ꞌimainun, Judánu ꞌikë ꞌapun xubukama ꞌimainun xubu maskuan anuxua naínu ꞌikë ꞌispakama ꞌimainua bëtsi dioskama, rabikian uvas baka anpënkaxunkë ꞌaish ka ñu ꞌati ꞌaisama anuxun ꞌakë kakë usaribi ꞌaish Tófetsaribi ꞌiti ꞌikën.”

¹⁴ Ësokin pain ꞌanuxun atu kanua Nukën ꞌIbun xukëxun Tófet anuxun atu kabiani kuanxun ka Jeremíasnën, anuxun Dios rabiti xubu Jerusalén anu ꞌikë me mëníokë anu nixun kamabi unikama kakëxa:

¹⁵ Nukën ꞌIbu kamabi kushiñu Israel unikaman Dios ax ka ësai kia: ꞌËn kana ënë ëma anua ꞌikë unikama këñunbi ꞌëx kikësokinbi tëmëramiti ꞌain. Usa ꞌain kana atun ka aín nuitu iruarakin ꞌën bana kikësabiokin ꞌaisamatania kiaxa Dios kikë ka Jeremíasnën atu ñuixuankëxa.