Jeremías 18 - Kashibo-Kakataibo Biblia

An chua me tëkë ꞌimainun an mapú ꞌakë uni ñuikë bana

¹ Nukën ꞌIbun ka ꞌë amiribishi katëkëankëxa:

² Axa chua men tëëkë achúshi uni aín xubunu kamina kuanti ꞌain, anuxun kana achúshi bana mi kati ꞌain.

³ Ësokin kakëx kana ꞌëx anua chua men tëkë uni aín xubunu kuankën.

⁴ Kuankin iskëxunbi ka ñutëa ꞌakë a ꞌatima bërútia amiribishi tukapatankëxun a mapúbi, añu kara ꞌaisatania usakinbi upí isi kuëënuxun ꞌakëxa.

⁵ Usa ꞌain ka anuxun Diosan ësokin kakëxa:

⁶ ¿ꞌËn karana Israel unikama an chua me ꞌakë unían mapú ꞌakësaribi okin ꞌatima ꞌain? Mitsux kamina ꞌën ënkëma ꞌaish ꞌën mëkënubi ꞌaish an chua me ꞌakë unían aín mëkënan mapú añu kara ꞌaisatania usakin ꞌakë usaribi ꞌain. ꞌËx Dios ꞌaish kana ësai kin.

⁷ Usa ꞌain kana ꞌëx kuëënxun achúshi menu ꞌikë ëmakama ꞌanan, anua aín ꞌapukama ꞌikë aribi bënë́kinshi këñunun ꞌimiti ꞌain.

⁸ ꞌAínbi kana a menu ꞌikë unikama aín ñu ꞌatima ꞌakëkama a ënia, usakin ꞌati ꞌën sinánkë usakin ꞌatima otima ꞌain.

⁹ Usakin ꞌakinma kana bëtsi nëtën ñu ꞌapákëx koókë usaribiti ꞌi ꞌuakamë ꞌëonanbi ꞌapuñu ꞌinun ꞌimiti ꞌain.

¹⁰ ꞌAínbi kana a ëmanu tsókë unikama ñu ꞌatima ꞌakin, usai kamina ꞌitima ꞌai ꞌën kakë usai ꞌiama, kana a usakin ꞌakinti ꞌën mëníokin sinánkë usakin ꞌakintima ꞌain.

¹¹ Usa ꞌain kamina Judá menu tsókë unikama ꞌimainun Jerusalén ëmanu tsókë unikama ësokin kati ꞌain, ꞌëx Dios ꞌaish kana ësai kin: ꞌËn kana uisokin karana mitsu ꞌatima oti ꞌai kixun sinánkin, mitsu ꞌatima oti sinanin. Usa ꞌain kamina mitsunmi ꞌatima ñu ꞌakë a ënkin; upí ñukamaishi ꞌai upiti bukukanti ꞌain.

¹² ꞌAínbi ka atun mi kati ꞌikën: ¡Ñankáishi kamina usai ꞌitima ꞌain! Nukamax kananuna nun kuëënkësa ꞌoíshi tsókin, nun sinánkësa okinshi ñu ꞌati ꞌain.

¹³ Usa ꞌain ka Nukën ꞌIbu ësai kia: Bëtsi bëtsi ëmanu tsókë unikama kamina uin kara usaribiti ñu ꞌia kuaxa kixun ñukáti ꞌain. ¡Israel unikaman ka ꞌaisama ñuira axa!

¹⁴ ¿Líbano bashinu ꞌikë maparakama anua ꞌikë matsin tita ax kara uínsaran nëtë́ti ꞌik? ¿ꞌUmpax matsira bashinuax shióbukë ax kara ꞌain bashi kamanuax ëskiti ꞌik?

¹⁵ Usa ꞌaínbi ka ꞌën kaískë unikaman ꞌë manutankëxun, ro sanuira aribi xarokin, atunbia ꞌakë ñukama ashi rabikin ꞌë manukanxa. Usai ꞌika anua nia bai xëni a ëni, ꞌën usai ꞌiti kakë banakama a manui, atun ꞌunánkëma bain kuankësa ꞌinun ꞌëx kia banakama a manukankëxa.

¹⁶ Usaia ꞌikëbë ka atun ëmakama anu uni ꞌikëma mesa ꞌinun ꞌiakëxa, usaía ꞌikë ꞌain ka kamabi menu ꞌikë unikama ami kuaiakëxa. Usa ꞌain ka uikamax kara anun inuti kuania akaman rakuë́kin tankin ꞌain maxká shaíkai tënkëti ꞌiti ꞌikën.

¹⁷ ꞌËn kana amiaxa bari urukë amiax suñu kushi bëki ꞌikësai ꞌikin, Israel unikama abistanun ꞌimiti ꞌain; usakin kana ami nishkë unikaman ꞌatirabanan abátanun ꞌimiti ꞌain. ꞌImianan kana uínsaran nëtën kara ꞌën kakësakin ꞌaíma tëmëraia, anun ꞌën ꞌatima okëxa tëmëraiabi ꞌakintima ꞌain.

An Dios kikë bana ñuikë uni Jeremías ꞌakatsi kiax unikama ꞌësë́nan

¹⁸ Ësai ka unikama kiakëxa: “Bërí kananuna uisoxun karanuna an Dios kikë bana ñuikë Jeremías ꞌati ꞌai kixun sinánti ꞌain. Uinsaranbi ka nunu sacerdotekama an bana nu ñuixunti ꞌianan, an bana ꞌunánkë an nu ꞌësëti ꞌianan, an bana ñuikë unikama an Diosan bana nu ñuixunti akama nunu ꞌima ꞌitima ꞌikën. Usa ꞌain kananuna unikaman ꞌanun nun ꞌuchoti ꞌain. Usa ꞌain kananuna uisai kara ax kia abi aín bana tantima ꞌain.”

An bana ñuikë Jeremíasnën Dios ñuká ñuikë bana

¹⁹ ¡Nukën ꞌIbu Dios ꞌën mi ñukákëxun kamina kuati aín! ¡Axa ꞌëmi nishkë unikamaxa usai ꞌë ñuikikë a kamina kuati ꞌain!

²⁰ ¿ꞌËn upíokin ꞌakinkëxunbi atun ꞌë usokin ꞌatimokë ax kara upí ꞌiti ꞌik? ¡Atun ka anu ꞌatankëxun ꞌë mainkatsi kixun kini ꞌaxa! Usa ꞌain kamina atun rabanan në́kin kanan, atumi nishkin ꞌatima oxunma ꞌanun ꞌën mi kakë akamina sinánti ꞌain.

²¹ ꞌAínbi kamina bërí atun ꞌini bëchikë xanu ꞌimainun bëbukama numin ꞌiananbi manë xëtokën ꞌakëx bamanun ꞌimiti ꞌan, usakin ꞌakëbë ka atun xanukama kasunamëti tuáñuma bërúkanti ꞌikën. ¡ꞌImainun ꞌinsinan atun bënëkamaribi këñuti ꞌikën, ꞌimainun uni bënábukama axribi ꞌakanankënuax manë xëtokën ꞌakëx bamati ꞌikën!

²² ꞌËn kana kuëënin xuisa tankin sapi kamina atu ratuia, mëkama unibu atux kuankëbëa atun xubunuax kuënkëni ratúkantanun xuti kuëënin. Usa ꞌaínbi ka atun anu pakëtia ꞌë bikatsikixun kini chaiira ꞌanan, anun ꞌëx niti bainuribi unëkin ami ꞌëx ꞌiti ñuribi nanxa.

²³ ꞌAínbi kamina mix Dios ꞌixun, kamabi ñu uisokin ꞌaxun ꞌë bamamiti kara sinánkanxa akamabi min ꞌunanin. ¡Usa ꞌain kamina atun ñu ꞌatima ꞌakëkama a mëníoxuanan atun ꞌuchakama a manutima ꞌain! ¡Usa ꞌain kamina atiaira uínsaran kaina atumi nishi anun, uisa kaina oisatani usakin min atu ꞌatimoti ꞌain!