Jeremías 15 - Kashibo-Kakataibo Biblia

Jeremías an Diosan bana an usai ka Israel unikama tëmëramiti ꞌikë kixun ñuia bana

¹ Ësakin ka Nukën ꞌIbun ꞌë kakëxa: Mitsun chaitiokë Moisés ꞌimainun Samuelnën ꞌë bëtánain nirakëxun usakin kamina ꞌatima ꞌai kixun kakëxunbi kana ënë unikama nuibatima ꞌain. Usa ꞌain kamina anu ꞌëx ꞌikë ënuax chikíkiania kuantanun ënë unikama kati ꞌain.

² Kakëxua uinu karanuna kuanti ꞌai kixun ñukákëxun kamina, ꞌën mi kakë ësokinbi kati ꞌain: Uix kara ꞌinsinan bamati nankë ꞌikë, ax ka anunbi bamati ꞌikën; ꞌimainun ka uix kara ꞌakánanti nankë ꞌikë ax ꞌakanani bamati ꞌikën, ꞌianan ka uix kara numin bamati nankë ax numinbi bamati ꞌikën; ꞌianan ka uix kara axa ami nishkë unikaman ñatanbiankin buánti nankë ꞌikë ax ñatanbiankin buánkë ꞌiti ꞌikën.

³ ꞌËx Dios ꞌaish kana ësai kin: ꞌËn kana rabë́ ꞌimainun rabë́ anun bëtsi bëtsi okin tëmëramiti xuti ꞌain: akamax ka ꞌinuxun ꞌaia, ꞌakanantinuax bamati, kamunkaman bamakë nirinti, ñuina pëchiukaman bamakë piti ꞌimainun raëkëma ñuinakaman bamakë ꞌikë piti akama ka ꞌiti ꞌikën.

⁴ Ësokin kana kamabi menu ꞌikë uníxa a isi rakuë́tanun ꞌati ꞌain, Judá menua ꞌapu ꞌikë Manasés Ezequíasnën bakë bëchikë an ka ꞌatimakin Jerusalénnu ñu ꞌaxa usa ꞌain.

⁵ ¿Uix kara Jerusalénnua tsókë unikama anun rabanan nëëti ꞌit? ¿Uix kara minun rabanan masá nuituti inti ꞌit? ¿Uix kara mitsúxmi ꞌinsinima upitax tsóti kuëënti ꞌit?

⁶ Mitsux kamina ꞌën kakëxun kuaisama tani ꞌëmi manúkankën. ꞌËx Min ꞌIbu ꞌaish, kana asérabi ësai kin. Usa ꞌain kana ꞌurainra mitsu nuibati tënëxun, ꞌën ꞌakësa ꞌitanua axa mimi nishkë unikaman këñukin ꞌanun mitsu ëankën.

⁷ Usakin ꞌakin kana min unikaman ñu bëru tákaia, suñun ꞌain chua nuámikësa okin ꞌakën, ꞌakin kana a menua ꞌikë ëmakamanua abisi chikínun ꞌimiakën; usakin ꞌakin kana ꞌën uni ꞌikëbi atu bakë bëchikëñuma ꞌitánun masókin këñuakën, usokin kana atun ñu ꞌatima ꞌakë ëinsama tania ꞌakën.

⁸ Usakin ꞌakin kana atunua ꞌitsaira xanu kasunamëkë, parúmpapa masi bëru iskësaira ꞌinun ꞌimiakën. ꞌImikin kana bari manikëbëa nëtë xabá ꞌain xanukaman aín bakë tuá bënábu ꞌakánanti ꞌunanbu akamaribi bamanun ꞌimiakën; usakin ꞌakin sapi kana a ëmanu ꞌikë xanukama ꞌaisamaira rakuëkënun ꞌimiakën.

⁹ Usakin ꞌakëbë ka tuá ꞌitsañu xanukamaxribi, aín ñunshin nëtë́ti suñu bikamati uinkamai bë́nani kushi uíni ꞌiti ꞌikën; usai ꞌi rabini ka ñuumasara ꞌaish ꞌikësai atun tuákama nëtë xabá ꞌain bamakë ꞌain ꞌiti ꞌikën, usai ꞌikëbë ka nëtë xabá ax bëánkibukë ꞌiti ꞌikën. Usa ꞌain kana axa bërúkë unikama ami nishkë unikaman ꞌanun ꞌamiti ꞌain. ꞌËx Min ꞌIbu ꞌaish kana asérabi usai kin.

Jeremíasnën ꞌitsaira ñu inuti tëmërakin Dios ñuká ñuikë bana

¹⁰ ¡Ësai ka an bana ñuikë kiakëxa: Uisai karana ꞌiti ꞌain, uisa ꞌixun kara ꞌën titan bëtsi rabanan nëëti kamabi unibë mëëananti okin ꞌë tuakëxa! Uibi kana ꞌën kuríki ꞌinántëkënua ꞌë kuríki ꞌinánun ñukákëma ꞌain, ꞌianan ka ꞌëribi kuríki ꞌinantëkënuxun ñukákëma ꞌikën, usa ꞌaínbi ka kamaxunbi ꞌatima okin sinánkin ꞌë ñuia.

¹¹ Usa ꞌain ka atumi ꞌatimakin sinánxunkë ax asérabi ꞌiti ꞌikën, ꞌën ꞌIbu Dios, ꞌën mi asérabi axa ꞌëmi nishkë unikama ꞌaisama ñu inuti bënëtiabi ñukáxunkëbëma ka mix kikë usaibi ꞌiti ꞌikën.

Dios usakian Israel unikama ꞌatima oti kia bana

¹² ¿Uin kara aín tsipumixuan anun ꞌakánanti, manë tunan ꞌanan manë panshian anun ꞌakánanti uniokë a tsasipati ꞌik?

¹³ Usa ꞌain kana Israel unikama mitsux ꞌuchakë kupín kana ꞌën axa mitsumi nishkë unikaman mitsun ñu kupírakëkama ꞌimainun ñu upíirabu ꞌianan, kamabi mitsun menua ꞌikë ñukama kupímashi bibianun ꞌamiti ꞌain.

¹⁴ ꞌËn kana axa mimi nishkë unikaman mitsun ꞌunánkëma menu buántankëxun tëmëramikin ñu mëëminun mikama ꞌimiti ꞌain, ꞌëx mimi ꞌitsaira nishkë anbi ka tsi rëkirukënëa ñu këñukësa usaribi okin mitsu ꞌati ꞌikën.

An Dios kikë bana ñuikë Jeremíasnën Dios katëkëan ñuikë bana

¹⁵ ¡Nukën ꞌIbu Dios min kamina kamabi ñu ꞌunanin! ¡Usa ꞌain kamina ꞌëmi sinánkin ꞌë ꞌakinti ꞌain! ¡An ꞌë ꞌatima okin ubíokë unikama akamina ꞌatima oti ꞌain! Usa ꞌain kamina atu nuibairatima ꞌain, ꞌëma ꞌaia usa ꞌain; min kamina isti ꞌain, ꞌën kana mi kupí atun ꞌichakëxunbi tënëin.

¹⁶ Uínsaran kaina min ꞌë kai anun kana ꞌëx upíokin min bana kuati piti nëishokin ꞌakë pi kuëënkë, usaribiti kuëënun ꞌë ꞌimiakëxa, minmi kakë bana an ka ꞌë kuëënun ꞌimiakëxa ꞌëx minan ꞌikë. Nukën ꞌIbu Dios mix kamina kamabi kushiñuira ꞌain.

¹⁷ ꞌËn kana an nëtë ꞌinukin xëati sinánishi bukukë unikamabë amiribishi timëtëkënti a ëankën; anunmi min uni ꞌiti ꞌë ꞌimia anun ꞌia ꞌaish kana bëríbi ꞌëxi upiti tsotin, usai ꞌikë kamina mixmi ꞌuchakëbë nishkë usaribiti ꞌinun ꞌë ꞌimiakën.

¹⁸ ¿Uisa kupí kara ꞌëx paëtani tëmërakë ax uínsaranbi nëtë́timin? ¿Uisa kupí kara ꞌëx tëmërakë ax ñumi ꞌikë ronkëxbi mookëma usaribi ꞌik? Minmi ꞌë ꞌakinkëma ax ka ꞌumpaxñuma ꞌinua xëxá ëskikë usaribi ꞌianan, kamina anu ꞌumpax buákiti ꞌakë axa ꞌumpaxñuma ꞌinun barin ëskikë ꞌain ñankáishi ꞌikë usaribi ꞌikën.

An bana ñuikë Jeremías an kakëxun ꞌaisamataniabi ábia ñu anun katëkëan bana

¹⁹ Usa aín ka Diosan ësakin ꞌë katëkëankëxa: ꞌËmi sinántëkënia kana ꞌën mi amiribishi bitëkënti ꞌain, ꞌëmi upíokin ñu ꞌaxúnun, usa ꞌain kamina upíokin ꞌë ñu ꞌaxunti ꞌain. Usa ꞌain kamina mix ꞌatimati banai min sinánkëshi banakë a ëni, mix an ꞌëx kikësa ꞌitánun an ꞌën bana upíokin ñuikë uni ꞌiti ꞌain. Usa ꞌain ka Israel unikama min ꞌën bana ñui kia kuati minu utëkënti ꞌikën, usa ꞌain kamina min atun kakëxun kuatima ꞌain.

²⁰ ꞌËn kana mixmi ënë unikamanan achúshi kënë manë panshianën kënëarakin kushiokin nitsinkë usaribi ꞌinun mi ꞌimiti ꞌain. Usa ꞌikë ka mibë ꞌakanankinbi uínbi mi kanantima ꞌikën, ꞌën kana mi bërúankin ië́miti ꞌain. ꞌËx kana Min ꞌIbu ꞌaish usai kin.

²¹ ꞌËn kana ꞌatima unikaman mi ꞌibuakëx atubë ꞌikëbi mi anua chikíanan, ¡an bënë́kinshi ñu ꞌati kuëënkë unikamanua ꞌën mitsu ië́miti ꞌain!