Jeremías 14 - Kashibo-Kakataibo Biblia

Chaiira ꞌinun me ëskia ñuikë bana

¹ Nukën ꞌIbu Diosan ka Jeremías Judá menua ꞌuí ꞌibúkëbëma me ëskikë ꞌain ësokin kakëxa:

² Judánu tsókë unikama ka nitë́xëti inia, usa ꞌain ka anu ꞌikë ëmakamanu ꞌikë unikamax tëmëraia, usai ꞌika anu ꞌikë unikama menu tsótax masánuitutia. Usai ꞌika Jerusalénnu ꞌikë unikama munuma kuënkëni paëtani inkania.

³ Usai ꞌimainun ka ñuñuira unikaman an ñu mëmikë unikama ꞌumpax bitánun xutia; xukëx kuanxunbi ka atun anua ꞌumpax biti ꞌakë kini anua ꞌumpaxñuma okin, anun ꞌumpax biti ꞌakë na buankankë a ñankáishi buani ritëkënkiani; ꞌumpaxbitsi kuanxi ꞌumpaxñuma obiani kuani, chupan rabinkësa ꞌaish mamápukukankëxa.

⁴ ꞌImainun ka naën tëkë unikamaxribi, paránkësa bërúti ꞌitsaira rabinia usai ꞌika chupan mamapukutia, ꞌuíka ꞌibutima usa ꞌain ꞌimainun ka me ë́ski tukibutia.

⁵ Usai ꞌikëbëtan ka chaxu aín xanu kamanribi aín tuá bërí bakënkërakama a piti, xubikama ꞌaíma ꞌain rakania,

⁶ ꞌimainun ka burro raëkëmakama axribi, aín bashi anu ñu ꞌikëmakama anu nitsax munuma uin bitsi ñuina chukúmabu an nami paxa pikëkama ꞌikësaribiti ꞌia; usai ꞌika a piti pastobi ꞌaíma ꞌain numikëa bakishan mapukëxun upíokin isima.

Jeremíasnën Judá menu ꞌikë Israel unikama Dios ñukáxua bana

⁷ ¡Nukën ꞌIbu Dios nun ꞌuchakë anbi ka nukama ꞌaisama ꞌimia, usa ꞌain ka mix nuibanankë ꞌain min anë ax upíokin rabikë ꞌiti ꞌikën! Usa ꞌaínbi kananuna mix kikësoi ꞌima ꞌitsaira nukamax mimi ꞌuchan.

⁸ Mix kamina ꞌashia Israel unikaman kainkë a ꞌain, usa ꞌain kamina anun nux tëmërati nëtë ꞌikëbëtan nukama ië́miti ꞌain, ¿uisakatsi kaina achúshi uni ꞌunánkëmaxa ënë menuax ꞌikësai, ꞌianan uni ꞌurakuani imë́ uinu kara ꞌia anu ꞌuxi bërúkë usaribiti mix ꞌin?

⁹ ¿Uisa kupín kaina achúshi uni ñu ꞌianan, axa ꞌakánanti ꞌunánkë ꞌixunbi raíri uni ꞌakinkin ië́mikëma usaribi ꞌain? Usa ꞌaínbi kamina mix nun Dios ꞌaish nukama nëbëtsi ꞌiti ꞌain, usa ꞌain ka nux kananuna min unikama ꞌai kixun kamaxunbi ꞌunánkanxa; ¡usa ꞌain kamina nukama ëntima ꞌain!

¹⁰ Diosan ka Jeremías Judá menu tsókë aín uni Israelkama ñuikin kakëxa: Ënë unikamax ka atun kuëënkësa oi ñu ꞌaíma bëtsinu bëtsinu kuani niti kuëënia. Usa ꞌikë kana a unikama ꞌën kuëënkin isiman. Usa ꞌain kana bërí atun ñu ꞌatima ꞌakë a sinánkin, atun ꞌuchakë kupí ꞌatima oti ꞌain.

¹¹ Nukën ꞌIbu Diosan ka ꞌë kakëxa: ꞌË kamina ënë unikama upiokin ꞌakinun kixun katima ꞌain.

¹² Usa ꞌain kana ꞌitsa nëtë imi pima samákin atun ñukákëxunbi kuatima ꞌain; ꞌianan kana ꞌitsaira ñuina xaroxuanan ñu ꞌapákë aín bimi ꞌë bëxun nanxunkëxunbi ꞌën upí istima ꞌain. Usa ꞌain kana ꞌën suntárukama abë ꞌakanankin ꞌakëx ꞌianan, atun piti ꞌaíma ꞌain numin ꞌianan, ꞌinsinan këñunun ꞌimiti ꞌain.

¹³ Ësai kiabi kana ꞌën Dios kakën: Nukën ꞌIbu Dios an bana ñuikë unikaman ka unikama ësokin bana ñuixunia, ꞌakánanti ka ꞌaíma ꞌinuxun ꞌaia, ꞌimainun ka numiribi ꞌitima ꞌikën, usa ꞌain ismina min ënë menu basi uni upitax nuibanani tsónun ꞌiminuxun ꞌai ka atux kia.

¹⁴ Ësokin kakëxunbi ka Nukën ꞌIbu Diosan ꞌë kakëxa: Asabi ka usaika ꞌën anë ñui ꞌën kakëxmabi, an bana ñuikë unikama këmëi kia. ꞌËn kana usakian ñu ꞌanun a unikama kaiskëma ꞌain, ꞌimainun kana uisa banabi kakëma ꞌain. Akamax ka ꞌën usakin anun namákësokin ismikëxumabi këmëkinshi ꞌanan atúnbi usakin ꞌati sinanx kikë ꞌikën. Ësai ka ënë ñukama ñui an bana ñuikë unikamax kia.

¹⁵ Usa ꞌain kana ꞌëx Dios ꞌaish, an bana ñuikë unikama ꞌën anë ñuiti xukëmaxia atúnbi sinánbiani kuanx ꞌakanantisa ꞌaíma ꞌinuxun ꞌaia kianan, numiribisa ënë menu ꞌaíma ꞌinuxun ꞌaia kiax kikë, an bana ñuikë unikama ax ka ami nishkë unikaman ꞌakëx ꞌianan numin këñuti ꞌikë kin.

¹⁶ ꞌImainun ka unikama an atun bana kuakin atu nuikë akamaxribi ami nishkë unikaman ꞌakëx ñuti ꞌikën, ꞌimainun atún xanukama ꞌianan atun bakë bëchikë bëbukama ꞌimainun ꞌini bëchikë xanukamaribi ka numin bamati ꞌikën. Usa ꞌain ka aminishkë unikaman ꞌakëx uni ñukë Jerusalén ëma anun niti baikama anubi an maínti uni ꞌaíma ꞌain uni ñukë rakati ꞌikën. Usakin kana atun ñu ꞌatima ꞌai ꞌuchakë kupí ꞌati ꞌain.

¹⁷ Usa ꞌain kamina ënë bana ñuikin unikama kati ꞌain: Nëtë ꞌimainun ꞌimë́bi kana ꞌëx ënimaira bëunan mëskuti masánuituti, ꞌën kaískë unikamax ka ꞌain ꞌatima ñuira ꞌakë anunbi ꞌain nami tëakësa ꞌinun ꞌatimaxa.

¹⁸ ꞌImainun kana ninu kuankin, anuaribi ꞌakanania anuax uni ñuia isanan; ëmanu atsínkin anuaribi a piti ꞌaíma ꞌain numin bamaia uni isin. Usaia ꞌikankëbë ka an Dios kikë bana ñuikë unikama ꞌimainun sacerdotekamax an ꞌunánkëma bëtsi ëmakamanu kuani añu kara ꞌati ꞌikë kixun ꞌunánimabi nitsia.

Dios kikë bana ñuikë Jeremíasnën uisai kara Israel unikama ꞌiti ꞌikë kixun abë banakin ka

¹⁹ ꞌËn ꞌIbu Dios, ¿min kaina Judá menu ꞌikë unikama asérabi ashikin ëan? ¿Min kaina ami atsanxun Jerusalén ëmanu tsókë unikama ëan? ¿Uisa kupín kaina anun romëti ꞌaíma ꞌaínbi ꞌaisamairai ꞌatimanun ꞌimian? Nun kananuna nux upiti tsóti a kainkin, ꞌaínbi ka añu upibi nunu ꞌikëma ꞌikën. Nun kananuna uisabi ꞌinsinima tsótishi sinánkën, ꞌaínbi ka anun rakuë́tisa ñuishi ꞌia.

²⁰ Nukën ꞌIbu Dios nun kananuna ꞌatima ñu ꞌakë ꞌimainun nun chaitiokëkamaxa mimi ꞌucha akamaribi ꞌunanin; usa ꞌain kananuna nukamax mimi ꞌuchan.

²¹ ¡Min anë axa rabikë ꞌinun kamina nu timakësa otima ꞌain, ꞌianan kamina anua min kushi ꞌikë xubu ꞌupiokin ꞌakë anuxun ꞌapun bana ñuia kuakë a timakësa otima ꞌain! ¡ꞌIanan kamina nubëtan mi nëtë́timokin ñu ꞌa a sinánkin, ñankáishisa ꞌinun ꞌimitima ꞌain!

²² ¿Anu kara ꞌiti ꞌikë unínbia a rabinuxun ꞌakë dios an ꞌuí ꞌibúmiti ꞌiti ꞌit? ¿ꞌIanan kara naíkamë ꞌëo abi ꞌuí kushiira ꞌibúnun ꞌimiti ꞌik? ¡Usama ka, Nukën ꞌIbu Dios! Mix kamina an ꞌuí ꞌibúnun ꞌimikë a ꞌain. Mix kamina an kamabi ënë ñukama usaía ꞌinun ꞌimikë a ꞌain; ¡usa ꞌain kananuna mimishi katamëti ꞌain!