Jeremías 1 - Kashibo-Kakataibo Biblia

Jeremías usai ka ñu ꞌiti ꞌikë kiá ñuikë bana

¹ Achúshi uni anuaxa aín aintsikama sacerdote ꞌikë anu ka achúshi uni Jeremías kakë ꞌiakëxa, aín papax ka Hilquías kakë ꞌiakëxa, ax ka Anatot kakë ëma anua Benjamínën ñaká bukukë me anu tsókë ꞌiakëxa, ënëx ka usakin ñu ꞌanan usai Jeremías kia bana ꞌikën.

² Diosan ka Jeremías Amonnën bakë bëchikë Josías ax trece baritia Judá menu ꞌapu ꞌain kakëxa.

³ Kanan ka Joaquím Josíasnën bakë bëchikë axa Judánu ꞌapu ꞌikë a baritiakamanribi kakëxa, kanan ka Sedequías Josíasnën bakë bëchikë itsi axa once baritia sënë́ntamainun Judánu ꞌapu ꞌitëkënkëbëtan kakëxa, usa ꞌain ka a barin mapai achúshi ꞌuxë sënë́nkëbëtan Jerusalénnu ꞌikë unikama ami nishkë unikaman atun menu buánkëxa.

Diosan Jeremías kakë uni ka ñuikë bana

⁴ Diosan ka ësokin ꞌë kaxa:

⁵ ꞌËn kana min titan puku ꞌukëmëu ꞌikëbi mi kaisakën; ꞌianan kana min titan mi bakënkë ꞌikëmashi mi kaisakën; ꞌanan kana kamabi menu ꞌikë unikama an Dios kikë bana ñuixunkëmi ꞌinun mi kaisankën.

⁶ Ësakin kakëxun ꞌënribi kan: ¡ꞌËn ꞌIbu Dios! ¡ꞌËx bëná pain ꞌixun uisai banati kara abi ꞌunaniman!

⁷ ꞌAínbi ka Diosan ꞌë kaxa: Uni bëná pain kana ꞌain kamina kitima ꞌain. Mix kamina uinu kuanun karana ꞌën mi xuti anubi kuanti ꞌain, usa ꞌain kamina kuanxun ꞌën mi kakësabiokin atu kati ꞌain.

⁸ Usa ꞌain kamina uinu ꞌikë unimibi rakuë́tima ꞌain. ꞌËx kana mi ꞌakinux mibëbi ꞌiti ꞌain. ꞌËn kana Dios ꞌixun mi kakësa okinbi asérabi ꞌakinti ꞌain.

⁹ Usa ꞌain ka Nukën ꞌIbun aín mëkën mëshpakin ꞌën kuëbí mëëkin ꞌë kaxa:

¹⁰ ꞌËn mi bërí ꞌunánmikë bana usakinbi kamina kati ꞌain. Bërí kana usakin ñukama ꞌakin anua ꞌapu ꞌikë ëmakama ꞌimainun bëtsi menu ꞌikë ëmakama, ñankáishi ꞌitánun masókin rurupakin, ꞌatima okin këñutankëxun mi, amiribishi birukin ꞌatëkënun mi kain.

¹¹ Diosan ka ësokin ꞌë kaxa: Jeremías, ¿añu kara min iskë ënëx ꞌik? Kixun ñukákëxun kana kan, achúshi ꞌamukutan pëñan bënëtishi uabutia kana isin, —kixun kana kan.

¹² Kakëxun ka Diosan asábi ka kamina isan —kixun ꞌë kaxa—. Usa ꞌain kana ꞌën bana, kikësabi oi kara bënëtishi, ꞌia kixun kainin.

¹³ Diosan ka amiribishi ꞌë katëkëanxa: ¿Añu kaina min isin? —kixun ka ꞌë ñukáxa. Achúshi ñutë kana kubinia aín tsipumi ki ꞌianan, aín rëbúmiki pakëti ꞌuramashi ꞌikë, —kixun kana kan.

¹⁴ Usa ꞌain ka Diosan ꞌë kaxa: Aín tsipúmiax ka ñu anpënkakëx ꞌikësa kuatsini, an ënë menu tsókë unikama tëmëramiti axa ami nishkë unikama uti ꞌikën.

¹⁵ ꞌËx Dios ꞌaish kana usai ka ꞌinuxun ꞌaia kin, usa ꞌain kana aín tsipúmiax ꞌapukama aín suntárukamabë unun ꞌimiti ꞌain. Ukëbë ka atun ꞌapukama atúxribi aín suntárukamabëbi uxun, Jerusalénnu anun atsínti xëputi anubi atun tsóti akánti ꞌikën, ꞌanan ka anun ëma kënëara abi bëararakin Judá menu ꞌikë ëmakama aribi bëararakanti ꞌikën.

¹⁶ Ënëx ka usakin kana an ꞌuchakin ꞌë rakan unikama a tëmëramiti ꞌain kiti ꞌikën, atúnbi rabinuxun bëtsi menu ꞌikë unikaman uniokë ñu ꞌatankëxun, rabikin sanuira ro a xaroxunkin rabiakëxa,

¹⁷ Usa ꞌain kamina mix atu ꞌën kakë banakama kai kuanux rakuë́ti sinanima, anun ꞌakánanti nëtën ꞌikësai mëníokati ꞌain; usa ꞌain kamina kuantankëxun ꞌën mi kakë banakama atu kai kuanti ꞌain. Atumi kamina rakuë́tima ꞌain, atumi rakuë́tia kana ꞌën mi, atunu kuanimi rakuë́ti bërënun ꞌimiti ꞌain.

¹⁸ ꞌËn kana mi bërí kushiira ꞌinun ꞌimikin, ëma upíokin kënëkin ꞌakë usa ꞌianan, manë tunan ami xubu buaruti nitsínkë usaribi ꞌinun ꞌimianan, anun ëma kënëarakë manë panshian iruira usaribi ꞌixunmi, Judá menu ꞌikë ꞌapukama ꞌimainun aín kushibu ꞌianan, sacerdotekama ꞌianan, kamabi unikama atusamaira ꞌixun minra kanun mi ꞌimiti ꞌain.

¹⁹ A unikamax ka mibë mëëananti ꞌikën, ꞌixunbi ka mi kanantima ꞌikën, ꞌëx kana mi bërúai mibë ꞌiti ꞌain. ꞌËn kana Dios ꞌixun kakësa okinbi asérabi mi ꞌakinti ꞌain.