Isaías 9 - Kashibo-Kakataibo Biblia

Diosan kaiskë ꞌaísh ënë menu bakënti uni ñuikë bana

¹ Diosan ka ꞌatabakin an kuëënkësa oia ꞌinun Galilea ꞌimiakëxa, anu ka Zabulón ꞌimainun Neftalí kakë uni aín me ꞌiakëxa, ax ka an Diosan bana kuakëma a rapasu ꞌikë unikaman me anuaxi Jordán kakë baka ꞌikë ꞌukëmanan, anuaxi kuanx parúmpapa kuëbí anubi sënë́nkë ꞌiakëxa; ꞌaínbi ka nuibakin ꞌitsaira ꞌakiankëxa.

² Axa ami nishkë unikaman ꞌatimokëxa bëánkibukënu ꞌikësa ꞌia unikama an ka achúshi tirí chaiira isakëxa, iskin ka ñu upí ꞌati ꞌunánkëxa; achúshi tirí pëkikësa ꞌaish upiti tsókë uni an ka axa ꞌatimati tsókë unikama ñu upí ꞌai upiti tsóti ꞌunánmiakëxa.

³ Dios min kamina chaiira kuëënun nu ꞌimin; usa ꞌain ka anun nux kuëënti ax chaiira ꞌikën. Kamabi unix ka min ismainunbi kuëëni anun ñu ꞌapáxun biti nëtë ꞌikëbëtan aín ñu ꞌapákë bitankëx bëtsibë ꞌinánani kuëënkë usaribi ꞌikën, ꞌianan ka ꞌakanankin aín ꞌibu ꞌaxun ñu bitankëx bëtsibë ꞌinani kuëënkë usaribi ꞌiti ꞌikën.

⁴ Min kamina tëmëramikin ñu mëëmikëx atsankin bëtsi sinaniabi ꞌapukamanua, tëmërakin ñu mëxuma ꞌanun nu chikiankën. Usabi okin kamina mix Dios ꞌixun Madiánu ꞌikë unikamami ꞌasaribiokin nukama ꞌakën.

⁵ Min kamina ꞌakanani kuankian suntárukaman aín taxaka pañubiankin anun me banamibiankë a ꞌimainun aín chupa ꞌakanankian imin shikë a kamabi tsin në́nkin xaronun ꞌamiti ꞌain.

⁶ Usa ꞌain ka nunu achúshi tuá bakënun ꞌimiaxa, Diosan ka nukama achúshi tuá ꞌinánxa, a tuá ka axa ꞌapu ꞌitiokin aín kushi ꞌinánkë ꞌiti ꞌikën. Usa ꞌikë ka ësokin kakë ꞌiti ꞌikën: “An bana ñuixunkin ꞌësëkëxun kuati upitani kuëënti,” “Dios uínbi kanantisama,” “Nukën papa Dios axa këñutima oi tsókë,” “Achúshi ꞌapun rëkuë́n bëchikë chuámarua ꞌinun uni ꞌakinux bakë́an.”

⁷ Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.