Isaías 8 - Kashibo-Kakataibo Biblia

Isaíasnën bakë bëchikënën anëx ka usai ka Judá ꞌinxun ꞌaia kixun ñuikë ꞌiakëxa

¹ Bëtsi nëtën ka Nukën ꞌIbun ꞌë kaxa: “Cha ꞌitánun parókin tukakë i bitankëxun kamina anu kuënëoti ꞌain, kamabi unían a bana istisabi okin kamina: Maher-salal-hasbaz kitánun kuënëoti ꞌain. (Maher-salal-hasbaz kikë ënë banax ka ënuax basikëma ꞌaínshi ka ꞌatimonan këñukë ꞌiti ꞌikë ki kikë ꞌikën.)

² Usa ꞌain kamina sacerdote Urías ꞌimainun Zacarías Jeberequías ꞌain bakë bëchikë ax ka ami rarámakin ñu ꞌaisa ꞌikën, usa ꞌain min kuënëokë ënë bana an ñuixunun biti ꞌain.”

³ Usakin ꞌë kakë a inúkë ꞌain kana an bana ñuikë ꞌën xanu ain pëi machakë sënë́nkë ꞌain, abë ꞌian ka tutankëx aín ꞌuxë ꞌikëbë bakëankëxa. Usai ꞌikëbëtan ka Diosan ꞌë kaxa: “Min bakë bëchikë bakënkë akamina Maher-salal-hasbaz kakin anëti ꞌain.

⁴ Usa ꞌain ka min bëchikë axa papa kianan tita kikin ꞌunánkëma ꞌaínshi Damasco ꞌimainun Samaria ëma masókin, ꞌatankëxun anua ꞌikë ñukama ꞌain upíbuira akama Asirianu ꞌikë ꞌapun atu ꞌatankëxun ꞌain menu buánti ꞌikën.”

⁵ Ësokin katankëxun ka amiribishi Diosan ꞌë katëkëanxa:

⁶ “Judá menu ꞌikë unikamax ka Resín ꞌimainun Remalíasnën bëchikë ami rakuë́tia, usa ꞌain ka aín suntárukamabëtan Judá ꞌakatsia, ꞌaínbi ka Judánu ꞌikë unikaman Dios, Siloé kakë baka pakaxkima rakákë usaribi ꞌikëbi kuëënima,

⁷ usa ꞌain kana ꞌën munu ꞌakinma Éufrates baka ꞌëi paparukin bënë́kinshi mapurukë, usaribi okin ꞌati ꞌain, (ax ka usaribiokian Asirianu ꞌikë ꞌapun ꞌain suntárukamabëtan ꞌati ꞌikën). Usokin ꞌai ka tanpëtia ꞌumpax amami amamitan chikíkë usaribiti atux ꞌikanti ꞌikën,

⁸ usai ꞌikin ka Judá ëma anubi sënë́nkin ꞌumpaxan mapukësa ꞌitánun asirio suntárukaman ꞌati ꞌikën. ꞌAkin ka ñuina pëchiñunëa pëókikin aín pëchin mapukësa okin maputi ꞌikën, usakin ka anua Diosan kaískë unikama bukukë me a ꞌati ꞌikën, ꞌaínbi ka Dios nubë ꞌiti ꞌikën.”

⁹ Usa ꞌain ka kamabi menu ꞌikë unikama timëaxi ꞌitsaira rakuë́ti ꞌikën; ꞌimainun ka axa ꞌuraira menu bukukë unikamanribi ënë kuati ꞌikën: kuati ka ꞌakananshisa ꞌinun atun ñu bitsi mëníokakë ꞌaishi rakuë́kanti ꞌikën; ꞌianan ka anun ꞌakánanti mëtikiruaxi rakuë́kanti ꞌikën.

¹⁰ ꞌIanan ka usakin kananuna ñu ꞌati ꞌai kixun atun sinaniabi, usakian ꞌanun ꞌamitima ꞌikën, Dios ax ka nubë ꞌikë usa ꞌixun.

Dios ax ka amiiranu nux rakuë́ti ꞌa ꞌikën

¹¹ Diosan ka ax kushiira ꞌixun ꞌain mëkënan tuinkin bikësokin bixun, ënë unikama ꞌikësai kamina ꞌitima ꞌai kixun ꞌë kakëxa:

¹² “Usa ꞌain kamina mitsun unëxun ënë ëmanu tsókë unikaman sinánkë bana ñui bëtsi unikama kikë a usa ka kixun sinántima ꞌain. ꞌIanan kamina atux ami rakuë́kë ñukama ami rakuë́ti ratutima ꞌain.

¹³ Dios kamabi kushiñuira a kananuna ax ka upíira ꞌikë kixun kati ꞌain; kai kananuna ami kuni rakuë́ti ꞌain; usa ꞌain kananuna an nu iskëx ami rakuë́ti ꞌain.

¹⁴ Ax ka mitsunan achúshi ñu ami ꞌia ñu biti nankë usa ꞌiti ꞌikën; ꞌianan ka maxá ami tatíkia uni chakákë usaribi ꞌiti ꞌikën, usa ꞌain ka ami Israel ñaká rabë́ ax ꞌiti ꞌikën; usai ka ami ꞌia ñu biti nankë usaribi ax ꞌain ami Jerusalénnu tsókë unikamax ꞌiti ꞌikën.

¹⁵ Usa ꞌain ka ꞌitsaira uni tuaxki ꞌikësai pakëti bamamainunbi, ꞌaisamaira uni ami ñuina ꞌiti nankë ami ꞌikësa ꞌinun ñatankë ꞌinuxun ꞌaia.”

Isaíasnën an ꞌunánmikë unikama usai ꞌiama ꞌinun kixun ꞌësëkin ká bana

¹⁶ ꞌËn mi kakë bana ënë kamina upíokin sinánti ꞌain; sinánkin kamina ꞌën mi usakinmi anun ꞌunánmikë ꞌianan ꞌën mi ꞌunánmikë ënëkama manutima ꞌain.

¹⁷ Nukën ꞌIbu Dios an aín unikama Jacobnuaxa mërá, atu ꞌakinsama tankëbëbi kana ꞌëx ënima ami katamëtin. ꞌËn kana an ꞌakintishi kainin.

¹⁸ ꞌË ꞌimainun ꞌën bëchikëkama Nukën ꞌIbu Diosan ꞌë ꞌinánkë a kamabë kana unin ꞌunánun unitsin ꞌakëma ñusa Israel unikamanan ꞌain, Nukën ꞌIbu Dios kamabi kushiñuira axa aín bashi Siónnu ꞌikë an nankë kananuna nux ꞌain.

¹⁹ Usa ꞌain ka unikaman mitsu káshibuinxun ësakin kati ꞌikën: “Mitsux kamina uni ñukëkama aín ñunshinbë banati ꞌain, ꞌianan ka axa usai ka ñu ꞌiti ꞌikë kixun ꞌunánkë akamabëribi munura banati ꞌain. ¿Achúshi ëmanu ꞌikë unikaman kara atun dioskamabë, bananan uni bamakëkama a kara uisakin

²⁰ kati ꞌikë kixun ñukáti ꞌit?” Ësai ka atux sinanimaishi banati ꞌikën, ꞌaínbi ka axa këmëishi kikë ꞌikën.

²¹ Usa ꞌain ka an usakin mitsu kakë uni ax anua ꞌikë anuishi ꞌima, amanu amanu bëtsi bëtsi okin, tëmëramikëx numin ꞌikë anunbi ꞌitsaira nishti ꞌikën. Usai ꞌikin ka aín ꞌapu ꞌimainun aín dioskama ꞌatimakin sinánxunti ꞌikën. Usai ꞌikin ka manámia isbëkikin isanan,

²² mëuküaribi isbëkinkin iskanti ꞌikën, usakin iskinbi ka añu ñubi ꞌaíma ꞌikë isanan, tëmërati ashi ꞌain bë́anbëankibukënu ꞌikësa isti ꞌikën. Usa ꞌaish ka kamabi imë́nu ꞌikësashi ꞌiti ꞌikën, usa ꞌain ka bëtsían tëmëramikë uni ax uinubi kuani abátima ꞌikën.