Isaías 7 - Kashibo-Kakataibo Biblia

Bana ñuixuntabakin Judánu ꞌikë ꞌapu Ahaz kakë Isaíasnën Sirianu ꞌikë unikaman ka Jerusalén ema ꞌati ꞌikë kixun ká bana

¹ Sirianu ꞌikë ꞌapu Resín kakë ꞌimainun ka Israelkaman ꞌapu Pécah Remalíasnën bakë bëchikë a rabëxun ka ꞌain suntárukamabë kuanxun Jerusalén ꞌaisa tankëxa, ꞌaínbi ka atun ꞌaisama okëxa. Ax ka ꞌiakëxa Ahaz Jotamnën bakë bëchikë ꞌianan Ozíasnën baba axa Judá ëmanu ꞌapu ꞌain.

² Usai ꞌikëbëtan ka a nëtë kaman ꞌapu Ahaz ꞌimainun aín aintsikama ꞌunánun ënë bana ñuixuni kuankëxa: Kuanxun ka siria unikamabë ka Efraínën rëbúnkikama mitsu ꞌanux birananxa kixun kakëxa. Ësakian kakëxun kuati ka ꞌapu Ahaz ꞌimainun anua ꞌikë unikama rakuëntan bamai bërëkirui nikama suñun bëkakëx ꞌikësaribiti bërëi ꞌikankëxa.

³ Usa ꞌain ka Nukën ꞌIbun Isaías kakëxa: “Min bakë bëchikë Sear-iasub abë kuanx kamina ꞌapu Ahaz anua ꞌumpax buchukë aín sënë́nkë anuax abë mëranani kuanti ꞌain, ax ka anun naënu kuanti bai ꞌipitiu anuxua axa tëkë unikaman ami mëchukatankëx mëtërëmëti chupakama bëntankë kakë anu ꞌiti ꞌikën,

⁴ kuanxun kamina anua kai kuanti ꞌain: ꞌËn mi kakëx kamina bërúankati ꞌain, ꞌaínbi kamina ratutima ꞌain; ꞌianan kamina ami rakuë́ti ñusma kantima ꞌain a ꞌapu rabë́ ax ka tsi bimikëxa aín kuin tëxëkirui ënxakë usaribi ꞌikën, ꞌitankëx nëtë́kë usaíshi ka Resín aín suntáru siriokamabë, ꞌianan Remalíasnën bëchikë akamax tsi ërë́rukësaribi ꞌitánun nishaxa.

⁵ Sirio unikamax ka Efraínën rëbúnki ꞌimainun Remalíasnën, bëchikë achúshi abëmi ꞌaisama oti sinani kananxa. Kánani ka ësai kiaxa:

⁶ Nun kananuna Judánu ꞌikë unikama rakuë́nun: ꞌimitankëxun atun ëma ꞌibuati ꞌain, usakin ꞌatankëxun kananuna Tabeelnën bakë bëchikë a ꞌapu ꞌinun ꞌimiti ꞌain.

⁷ ꞌAínbi ka Dios ësai kiaxa: ¡Atun sinánkësa okin ka uínsaranbi atun ñu ꞌatima ꞌikën!

⁸ Axa mitsumi nishkë unikama ax isa kushiira ꞌikë kixunmi mitsun, sinánkë ax ka usama ꞌikën, Damasco ëma ax ka chaiira ëma Asiria menu ꞌikën, usa ꞌain ka Resín ax Damasco ëma anu ꞌapu ꞌikën; ꞌimainun ka Samaria axribi ëma chaiira Efraín menu ꞌikën, usa ꞌain ka Remalíasnën bakë bëchikë ax Samaria ëmanu ꞌapu ꞌikën; ꞌaínbi ka sesenta ꞌimainun cinco baritia ꞌikëbë Efraínën ëma ax nëtë́ti ꞌikën;

⁹ mitsúxribi ꞌëmi katamëtima kamina, atux ꞌikësaribiti ëmañuma bërúkanti ꞌain.”

Isaíasnën Emanuel kakë tuá ka bakënti ꞌikë kixun ꞌapu Ahaz ka bana

¹⁰ Ësakinribi ka Diosan ꞌapu Ahaz kakëxa:

¹¹ “ꞌË kamina min Dios ꞌikë achúshi ñu min iskëma ꞌanun ñukákin kati ꞌain, ax ka ësai ꞌiti ꞌikën, meu ꞌianan a ꞌukë mëu ꞌimaka me manámi ꞌiti ꞌikën, ꞌima ka a manámi ꞌianan a manánmira ꞌiti ꞌikën.”

¹² Kakëxun ka Ahaznën kakëxa: “Usama ka ꞌën kana Dios ꞌë kamina achúshi ñu ꞌaxunti ꞌai tankin kaima.”

¹³ Ësai kia ka Isaíasnën kakëxa: “Ësokin mitsu kamainun kamina ꞌapu Davidtan rëbúnkikama mitsun kuati ꞌain: ¿Mitsun iskëx kara unikama anribia, ꞌën Dios ubioisa tankë akamaribi ubioti asábi it?

¹⁴ Diosan ka unibë ꞌikintankëma xanu: Xuntaku achúshi tuuñu ꞌinun ꞌimiti ꞌikën, ꞌimikëx bakëntankëxun ka Emanuel kakin anëti ꞌikën. Emanuel kikë ax ka, ‘Dios ka nubë ꞌikë ki kikë ꞌikën’.

¹⁵ Anua bakëntankëx kanikë a baritiakaman ka a tuákën vaca xuma sëruakin ꞌakë ꞌimainun buna rëpa akama piti ꞌikën.

¹⁶ ꞌAínbi ka tuá ax kanikian añu kara ꞌati ꞌikë añu kara ꞌatima ꞌikë kiax sinanákëma ꞌaínshi, an mitsu rakuëmikë ëmanu ꞌikë ꞌapu rabë́ ax masókin ꞌakëbë ñankáishi bërúti ꞌikën.

¹⁷ Usai ꞌikëbëtan ka Diosan mitsu ꞌianan, min unikama ꞌimainun, ꞌapun aintsikamaxa Efraínbëa Judá ënanainsamapain ꞌain ꞌiásamaira ꞌinun, a nëtëkama ꞌikëbë tëmëranun ꞌimiti ꞌikën.” (Ënëx ka Asirianu ꞌikë ꞌapu ukëbë usai ꞌiti ñuia kia bana ꞌikën.)

¹⁸ A nëtëkama ꞌikëbëtan ka Diosan samún ꞌitsa iskësaira kuatsinia ꞌura ꞌikë Egipto menua ꞌikë baka, anuaxa suntárukama unun ꞌimianan, Asiria suntárukamaribi buña ukësa kuatsini unun ꞌimiti ꞌikën.

¹⁹ Kamabi unikama atux ka rikuatsintankëx aín bashinua me nankë́kë anua raíri ꞌimainun bashinua ꞌikë mapara kini anuribia ꞌimainun muxañu me anuribi ꞌimainun anuxua vacan ꞌumpax ꞌakë anuribi ꞌiti ꞌikën.

²⁰ A nëtën ka Diosan Asirianu ꞌikë ꞌapu ꞌimainun aín suntárukama, Éufrates baka a ꞌuri ꞌikë anuaxbi uxuan, Israelkama mitsu ñatanbiankë unikama akësokin, ñu kënshún maxkukin mitsun kuëni ꞌuruanan mitsun nami mëu ꞌikë akamaribi ꞌurunun ꞌamiti ꞌikën.

²¹ A nëtëkaman ka an achúshi vaca ꞌarakakë ꞌimainun rabë́ oveja ꞌarakakëñu,

²² ax aín ñuina xuma ꞌaisamairañu sëruakin ꞌakë a pitiñu ꞌiti ꞌikën. Usa ꞌain ka Asiria unikaman ꞌakin tëokë ꞌakëmakaman atun vaca xuma sëruakin ꞌakë a ꞌimainun buna rëpa a piti ꞌikën.

²³ A nëtë́an a menu naëoxun mil uvas i ꞌapákë ax ka mil kuríki manë ꞌakë aín kupí ꞌiakëxa, usa ꞌaínbi ka bërí a menu muxaishi ꞌimainun ꞌaisama me ꞌiti ꞌikën.

²⁴ Usa ꞌain ka a menu uni aín kanti ꞌimainun aín piakama buani ñu ꞌoíshi anu kuanti ꞌikën, a mexa muxa ꞌirui ni tubënrukë ꞌain.

²⁵ Usa ꞌain ka bëráma manë pará anun mëníokë mekama axa tubënrui ꞌaisamaira muxa ꞌimainun me ꞌatima ꞌain uixi anu kuantima ꞌikën. Usa ꞌaish ka vaca bënëkama ꞌimainun ovejakaman anua pasto pitishi ꞌiti ꞌikën.