Isaías 65 - Kashibo-Kakataibo Biblia

Dios aín bana kuaisamatankë unikama tëmëramiti kikë bana

¹ Ësai ka Nukën ꞌIbu kiaxa: An añu ñubi ꞌë ñukáma unikama ax ka ꞌënu uakëxa; an ꞌëmi sinánkin ꞌë bariama unikama anbi ka ꞌëmi sinánkin ꞌë mërakëxa. Achúshi ëmanu bukukë unikama an ꞌë kuëënkëma akana kakën: Ënu kana aín.

² Kamabi nëtën kana ꞌën mëkënan mëshpakin ꞌënu unun kixun kana bana kuakëma ꞌikëbi atu kuëanken, mitsux kamina min kuëënkësa okin ñu ꞌatima ꞌai tsókën, usakin ꞌai kamina mitsun sinánkësa ꞌoíshi tsókën.

³ A unikamax ka ꞌën kuamainunbi nëtëtibi ꞌëmi ꞌatimati abi banakin ꞌë ꞌatima tamia; atun dioskama anua ñu ꞌapákë naënuxun ñuina xaroxuankëxa ꞌanan ka anuxun ñuina xaroti ladrillo ꞌakë anuxun sanuira ro aribi mënuakëxa.

⁴ An mënukë atux ka anu uni ñukë maínkë kini rapasu tsókëxa; usai ꞌikin ka anu kamabi imë́ unëax ꞌikin; anuxun kuchi nami piakëxa, pianan ka ain këntikama ñu pitima aín baka akama anu buchuokin ꞌaruakëxa.

⁵ A unikamax ka ësai kiakëxa, nu ꞌurama oíma kamina ꞌuri bërúti ꞌain; numi ꞌurama onuma kananuna upíira upí ꞌain; usa ꞌain kamina nu ramëtima ꞌain. Usa ꞌain ka a unikamax tikakëxa tsi nëtë́timaira bari buini ërë́kë usaribi ꞌikën; usa ꞌixun ka tsin kuinan rëtunkakëx ubikë usai ꞌinun ꞌë ꞌimia.

Naí ió ꞌimainun me ió ꞌiti ñuikë bana

¹⁷ “Ësai ka Dios kiakëxa: Ka kuat, ꞌën kana naíkamë ꞌëo ió ꞌanan me ióribi ꞌatëkënti ꞌain. Usa ꞌain ka ax pain ꞌia naíkamë ꞌëo xëni a ꞌimainun me xëni a uínbi sinántëkëntima ꞌikën.

¹⁸ Kamina upiti xënibua ꞌaínbi, kuëënti ꞌain amiribishi kana ñukama unioti ꞌain, Jerusalén ió anuax kuëënti ꞌanuxun ꞌain, anuax ka anu tsókë unikamax kuëënti ꞌikën.

¹⁹ ꞌËxbi kana Jerusalén kupí kuëënti ꞌain, ꞌianan kana ꞌën unikamami sinani kuëënti ꞌain. Usa ꞌain ka a ëmanu ꞌikë uni masá nuituti kuënkëni inia kuatëkënti ꞌaíma ꞌinuxun ꞌaia.

²⁰ ꞌAnu ka tuá bërí bakënkë nëtë ꞌitsama ꞌaínshi bamakë a ꞌaíma ꞌiti ꞌikën, ꞌianan ka uni apankama axribia anúan ñuti nëtë ꞌikë ꞌaímabia ñukë a ꞌaíma ꞌiti ꞌikën. Uix kara cien baritia ꞌain ñuia ax ka bëná ꞌaísha ꞌikë ꞌiti ꞌikën, usa ꞌaínbi ka axa cien baritia tsóamabi bamakë ax usai ꞌi ñukë ax ka Dios kuëënkë ꞌikë ꞌiti ꞌikën.

²¹ Anua ꞌikë unikama ka atun xubu ꞌatankëx anu tsókanti ꞌikën, ꞌianan ka uvas ꞌapáxun bimia a kuti ꞌikën.

²² Usa ꞌain ka bëtsi unin anua bëtsi uni ꞌiti xubu ꞌati ꞌaíma ꞌiti ꞌikën, uni itsin ka bëtsi unin piti ñu ꞌapátima ꞌikën, usa ꞌain ka ꞌën unikama achúshi i ꞌikësai ꞌitsaira baritia tsókanti ꞌikën. ꞌËn kaískë unikamax ka ñu mëi tëëkin ain mëkënan ñu ꞌapáxun pi kuëëni tsókanti ꞌikën.

²³ Usa ꞌain ka ꞌën unikaman ñu mëëkë ax ñankabi ꞌakëma ꞌiti ꞌikën, ꞌianan ka atun bëchikëkamax anun bamati nëtë ꞌikëma ꞌaínbi bamatima ꞌikën, atux ka ꞌën kaískë unikaman rëbúnki ꞌikën. Atux ka Nukën ꞌIbu ꞌupiokin sinánxuan unikama aín bëchikëkama ꞌikën, usa ꞌaish ka aín rëbúnkikama atúxribi usaribi ꞌiti ꞌikën.

²⁴ ꞌImainun kana atun ꞌë ñukákin sënë́onkë, ꞌaímabi ꞌakinti ꞌain; atúxa ꞌëbë banai sënë́nkë ꞌaímabi kana ꞌën ꞌunánkë ꞌiti ꞌain, ꞌën kana atun bana kuakë ꞌinuxun ꞌain.

²⁵ ꞌIanan ka shórapánanën carnerobë timë́xun, pimainun paru ꞌinúanën vaca bënën ꞌakësaribi okin pasto piti ꞌikën, ꞌimainun ka rununribi me putu piti ꞌikën. Usa ꞌain ka an kamabi ꞌën bashikamanu ꞌikë, unikama ꞌatima oti uinu ꞌikë unibi ꞌaíma ꞌiti ꞌikën.” Usai ka Nun ꞌIbu kiaxa.