Isaías 64 - Kashibo-Kakataibo Biblia

¹ Nukën Ibu Dios nux kananuna kuëënti ꞌain, mixmi naíkamë ꞌëo panárabëkë anun ukëbë aín bashikama shaíkitanun uti kuëënin,

² ꞌianan ka tsi rëkirukin i muxañukama xarokin këñukësaribi ꞌianan, anun ñu ꞌarukëxun ꞌumpaxan kubinmikë usaribi ꞌiti ꞌikën. Usa ꞌain ka axa mimi nishkë unikaman mix kamina kushi ꞌai kixun unántsianxa, ꞌimainun ka kamabi menu ꞌikë unikamaribi mimi rakuë́ti bërëtsianxa.

³ Uisaran kaina min ñu ꞌatimaira ka inuti ꞌikë kixun nun sinánkë ꞌaínmabi anun mix ubúkëbë aín bashikama shaíkiakëxa.

⁴ Uinsaranbi ka uinu ꞌikë unínbi, anu ka misaribi bëtsi dios ꞌikë kixun ñuia unin kuananbi ꞌisama ꞌikën, usa ꞌain ka bëtsi dios an min ꞌakësokin an ñu ꞌakin, axa ami katamëkë unikama ꞌakinkin ꞌakë ꞌaíma ꞌiakëxa.

⁵ Min kamina uin kara upíokin ñu ꞌaia a asábi ka kuëënkin kain, kakëxun ka min kuëënkësabi okin ꞌati sinania. Mix kamina nukamax ꞌuchakë anun nishan; usa ꞌain ka ꞌitsa baritia anun mi masá nuitumikin ñuikë ꞌikën.

⁶ Kamabi nux kananuna uni achúshi upíma chuakë usaribi ꞌain; kamabi nun ꞌakë ñu upíkama ax ka chupa chua usaribi ꞌikën; ꞌimainun kananuna nukamax pëi chushitankëx rëukubukë usaribi ꞌain, ꞌianan ka nun uni rëtëkë ax ka nun ñu ꞌatimaira ꞌakin, a tanti bana kikësokin ꞌakinma uni ꞌakë ax suñun kuainkin pëi pukë usaribi ꞌinun nu ꞌimia.

⁷ Uinu ꞌikë unibi ka an mi ꞌakinun kixun ñukákë ꞌaíma ꞌikën, ꞌianan ka an mimi kushikin ꞌakinun kixun barikë ꞌaíma ꞌikën; usa ꞌain kamina nukamami kasuakëkin nu ëan, nun ñu ꞌatima ꞌai ꞌuchakë kupín kamina nu rakan.

⁸ Usa ꞌaínbi kamina mix Nun ꞌIbu ꞌaish nun papa ꞌain; nukamax kananuna me uniokë ꞌain, usa ꞌain kamina mix an me bëtsi bëtsi ñu tankin ꞌakë usaribi ꞌain; ¡usa ꞌain kananuna kamabi nukamax minbi me unío ꞌain!

⁹ Nukën ꞌIbu ꞌaisamairai kamina nishtima ꞌain, ꞌianan kamina nun ꞌatima ñuira ꞌakin a tanti bana kikësokin ꞌakinma uni ꞌakëkama a sinántima ꞌain. ¡Kamina isti ꞌain, nux kananuna min unikama ꞌain!

¹⁰ Min ëmakama upíbu ax ka anu uni ꞌikëma mesa bërí ꞌikën, ꞌimainun ka Jerusalén axribi rurupakin masókankëxa.

¹¹ Anuxun mi rabiti xubu upíira, ꞌaxuan nun chaitiokëkaman mi rabia, aka masókin tsin mënuakëxa. ¡A nun ꞌitsaira kuëënkan ñukama axribi ka masókan ꞌikën!

¹² ꞌImainun kaina ësai ñu ꞌikëbëtanbi mix Nun ꞌIbu ꞌixun, ¿añu ñubi ꞌatima ꞌain? ¿Usa ꞌain karamina mix uisaibi banaima ꞌianan mix ñuumarasa nunan ꞌiti aín?