Isaías 63 - Kashibo-Kakataibo Biblia

Diosan anun atu ꞌati nëtë ꞌikëbëtan axa ami nishkë unikama tëmëramiti ñuikë bana

¹ ¿Ui kara axa Bosrá kakë ëma chaiira Edom kakë menua ꞌikë anuax ai, aín chupa chëxëira tsákatsaka okë upíira a pañuax ain kushibëshi ukë ax ꞌik? ꞌËx kana kana kanan kixun ꞌupiokin ñu ꞌakë a ꞌianan, kushiira ꞌixun an uni ië́miti a ꞌain.

² —¿Uisa kupí kara min chupa chëxëira ꞌaish, uvas taën amákin aín baka bikë anun tsakokësa ꞌik?

³ ꞌËn kana uvas ꞌëbi taën amákën, uínbi ka ꞌë ꞌakianma ꞌikën; usakin kana axa ꞌëmi nishkë unikama atumi ꞌitsaira nishkin tëmërakin ꞌatimaira okën, usakin ꞌakin chakakësa ꞌitánun amira nishkin ꞌakën, usakin ꞌakëxun ka ꞌain imin ꞌën chupa tsaka tsaka ꞌitánun anskakëxa, usakin ꞌakin ka ꞌën chupa kamabi tsakokëxa.

⁴ ꞌËn kana bëráma sinánkë ꞌiakën, achúshi nëtën kana ꞌëmi nishkë unikama tëmërakin ꞌati ꞌai kixun; usa ꞌain kana a nëtë ꞌikëbëtan ꞌën unikama bitëkënkin ië́miti ꞌain.

⁵ Usa ꞌain ka ꞌën iskëx an ꞌë ꞌakinti ꞌaíma ꞌiakëxa; usa ꞌain kana an ꞌë ꞌakinti ꞌaíma ꞌain sinánkasmakësa ꞌiakën. Usai ꞌi nishkin kana ꞌën kushínbi ꞌakin kamabi ñukama kanánkën.

⁶ ꞌËx atumi ꞌitsaira nishkin kana kamabi ëmanu ꞌikë unikama, ꞌatima okin këñukin, aín imi menu ꞌapamikin ꞌakanun ꞌamiakën.

Diosan ka ꞌain uni Israelkama nuibakin ꞌakinti ꞌikën

⁷ ꞌËn kana ñuitisa tanin uisakin kara Nukën ꞌIbun nu nuibatia kixun, ꞌianan kana a rabi kantatisa tanin, kamabi ñu an nukama ꞌaxunkë a kupín, an ka Israel ꞌaintsikama ꞌitsaira nu nuibakin, ax nuibanankëira ꞌixun usakin ꞌaxa usa ꞌain, axëshi nuibanankë a ꞌikën.

⁸ Ax ka ësai kiakëxa: “Atux ka ꞌën unibu ꞌikën, usa ꞌixun ka atun ꞌën kuëënkësokin ꞌakin ꞌë parántima ꞌikën.” An ka atu ië́miakëxa,

⁹ kamabi atun tëmërakë anuabi. Usa ꞌixun ka bëtsi uni an ië́minun xukinma, Nukën ꞌIbunbi ka ië́miakëxa. An ka bitëkëánkëxa nuibanairakë ꞌixun; aín pëñanën birukësa ꞌinun ꞌakiankëxa. Usakin ka bërámabi ꞌa ꞌixun ꞌakiankëxa.

¹⁰ ꞌAínbi ka Nukën ꞌIbun kakëxun atun kuaisamatankëxa ꞌianan ka ꞌatimakin ñuikëx masá sinánkëxa; usakin ꞌakëxun ka axbi atumi nishkin atu ꞌakëxa.

¹¹ Usakian ꞌakëxun ka bërámaira ñu ꞌia kama a sinanan Moisésnën aín unikama ië́mia a sinánkëxa, sinani ka atúxbi ñukákanani kikankëxa: “¿Uinu kara Dios Nilo kakë bakanu nankëbi an Moisés ië́mia ꞌixuan, an ñuina bërúankë uni ꞌakësokian aín unikama bërúanun ꞌamia ax ꞌit? ¿Uinu kara an Moisés aín bëru ñunshin upí ꞌinan ax ꞌit?

¹² ¿Uinu kara aín kushin Moisés ꞌakian ax ꞌik? ¿Uinu kara aín unikaman ismainun parúmpapa panarabënun uinsaranbi nëtë́tima okin ꞌimia ax ꞌit?

¹³ ¿Uinu kara parúmpapa panárabëti me ëskikë anun inuti raíshkima, caballokama anu uni ꞌikëma me kuankë usaribi kiani kuanun ꞌimianan,

¹⁴ vaca me sapanën kuankësa kiani kuanun ꞌimia ax ꞌik?” Nukën ꞌIbun bëru ñunshinanbi ka usaía kuania buánkëxa. Usakin aín unikama buánkëxa usa ꞌain ka kamabi unikaman ax ka kushi ꞌikë kixun ꞌunania.

Isaíasnëan Israel unikama ꞌakinun kixun Dios ñu ka bana

¹⁵ Nun ꞌIbu min kamina naíkamë ꞌëonuxunbi nu ꞌisti ꞌain, upíira anuxunbi kamina min isti ꞌain. ¿Uinu kara mix nuibanankë chaiira ꞌimainun min kushi ax ꞌit? ¿Uinu kara nu sinánkinmi nukama nuibakë ax ꞌit? ¿Minmi nukama nuiba a kaina numi manukin ëan?

¹⁶ ¡Mix kamina nukaman papa ꞌain! Abrahamnëa nukama ꞌunanima ꞌimainuan Israel unikama numi sinánkëbëmabi kamina, Nun ꞌIbu ꞌianan nukaman papa ꞌain; usa ꞌixun kamina ënënsaran nëtëma ꞌa ꞌixunma min ꞌakësabi okin nu bitëkënin.

¹⁷ ¿Uisa ꞌixun kaina mix Nun ꞌIbu ꞌixunbi mix kikësokin ꞌati ëni, min kakësokin ꞌaíma nun nuitu iruarakin min kakësabiokin ꞌaisamatanun nu ꞌimin? Min unikama ꞌanan min kaisa aín ñakánu ꞌikëkama nuibakë ꞌixun, kamina mixmi nishkë a sinanati ꞌain.

¹⁸ ¡Usa ꞌain ka ꞌitsama barishi ka min unikama upíira anua ꞌikë atun menu tsóakëxa! Axa numi nishkë unikaman ka anuxun mi rabiti xubu rurupakëxa.

¹⁹ Usa ꞌain kananuna nux uínsaranbi min ꞌakinkëmasa ꞌianan, uínsaranbi min unibu ꞌikëmasa ꞌiakën.