Isaías 61 - Kashibo-Kakataibo Biblia

Israel unikama ka ꞌië́ti ꞌikë kixun ñui bana

¹ Nukën ꞌIbun kushi ax ka ꞌëbë ꞌikën, Usa ꞌain ka Nukën ꞌIbun ꞌë kaístankëxun ñuñuma unikama aín bana ñuixunun ꞌë xuaxa, ꞌimainun ka axa bëtsin ꞌatimokëx masá nuitukë, a upíokin kanan axa ñatanbianxun tëmëramikë unikama a chikínun ꞌë xuaxa, ꞌimainun ñatanxun sipunu nankë akamaxribi basiramashi ka chikiti ꞌikën, kakin kuëëminun ꞌë xuaxa;

² ꞌianan ka anúan Nukën ꞌIbun nu nuibati nëtë aribi ñuianan, a nëtë ꞌikëbëtan ax nun Dios ꞌixun axa numi nishkë unikama ꞌatimoti aribi ñuinun. ꞌImainun ka ꞌë xuaxa axa masá nuitukë akamaribi upí sinánmikin kanan;

³ axa bëtsi menuax uax Jerusalénnu tsókë unikamax ka chimaputan mataka kima mañuti, mañuax kuëënun mitsu ꞌimiti ꞌain, ꞌimianan kana ꞌiníntisa ro sanuira anúnmi ꞌinun ꞌinankësa okin masá nuituti inkë a ënia kuëënun ꞌimiti ꞌain, ꞌianan kana masánuituti nitë́xëkinma ꞌë rabi kantanun ꞌimiti ꞌain. Usa ꞌikë ka i upí kanan, an kanankë kakin mitsu unikaman anëti ꞌikën, usa ꞌixun ka Nukën ꞌIbun anbi ꞌapá ꞌixun aín kushi mitsu ismiti ꞌikën.

⁴ Jerusalénnu ꞌikë unikama mitsun kamina bërámaira rurupakan ëma xëni a birutëkënkin ꞌatëkënti ꞌain, ꞌanan ka anu ꞌikë xubu chaiirabu axa mitsumi nishkë unikaman rurupa akamaribi ꞌati ꞌikën, ꞌanan ka ami nishkë unikaman rurupa ëmakama aribi birukin mëníotëkënti ꞌikën.

⁵ Bëtsi menu ꞌikë unikaman ka utankëxun, mitsun ꞌarakakë oveja ꞌimainun cabrakama, bërúanan mitsun naë bërúanan uvas anu ꞌapákë naëkamaribi mitsu bërúanxunti ꞌikën.

⁶ Anan ka mitsu kati ꞌikën, Nukën ꞌIbun sacerdote ka atux ꞌikë kixun kanan, nukaman Diosan unikama ka atux ꞌikë kixunribi mitsu kati ꞌikën. Mitsun kamina bëtsi menu tsókë unikaman piti nëish tankin pi bukukanti ꞌain, ꞌianan kamina atun ꞌakë ñu upíirabu ꞌaish ichu ichukikë akamaribi tëñuanan mëñuti ꞌain.

⁷ Axa ꞌën unimi nishkë unikaman ka ꞌitsaira ꞌichananbi bëtsi bëtsi okin ñuikëxa katë́nun tëmëramiakëxa, usa ꞌixun ka aín menuxun atúnbi ꞌitsaira ñu chaiirabu biti ꞌikën, bitsi ka xënibua ꞌaínbi kuëënti ꞌikën.

⁸ Usa ꞌain ka Nukën ꞌIbun upí ñuishi ꞌati kuëënia, ꞌianan ka mëkamanan an usai ꞌiti bana nankë a tankinma ꞌatima ñuira ꞌakin bëtsin uni ꞌakë a kuëënima. Usa ꞌixun ka ax kikësabiokin ënkinma ꞌakinkin an biti ñu upí ꞌinánti ꞌikën, ꞌianan ka ax kiásabiokin achúshi ñu këñutima okin atubëtan ꞌati ꞌikën.

⁹ Usa ꞌain ka aín rëbúnkikamax bëtsi bëtsi menu ꞌikë unikaman upíokin ꞌunánkë ꞌiti ꞌikën; usokin ꞌunánkë ka an iskë unikaman, atux ka Nukën ꞌIbunbia aín uni ꞌikë upíokin sinánxukin ꞌakinkë ꞌikë kixun ꞌunánkanti ꞌikën.

¹⁰ ¡Uisai karana ꞌëx Nukën ꞌIbumi chuámarua tani kuëënti ꞌain! Diosan ka kuëëira kuëënun ꞌë ꞌimiaxa, usa ꞌixun ka, ¡kamabi ñu kanankin ꞌanun ꞌë ꞌamiaxa! Usa ꞌain kana an xanu biti unían mëníokakin mañuti mañukësa ꞌianan, achúshi xanun birakanuxun mëníokin ain ñu ꞌupíikama pañukë usaribi ꞌain.

¹¹ Me tukabëtsianx chikiti koia naë chukúmanu ꞌapákëx ñu ꞌikësa, usaribi okin ka Nukën ꞌIbun an ꞌakë ñukama ismikin ꞌën, kamabi menu ꞌikë unikaman kantakin a rabinun ꞌimiti ꞌikën.