Isaías 60 - Kashibo-Kakataibo Biblia

Jerusalén ió anuax uisai uni ꞌiti ñuikë bana

¹ Ësai ka Isaías kiakëxa: Jerusalén ꞌimainun Judánu tsókë unikama mitsun kamina kuati ꞌain, Nukën ꞌIbu kamabi kushiñuira ax ka achúshi ñu pëkikësa mitsubë ꞌikën, usa ꞌain kamina mitsux ichu ichukikë anun rabumëkësa ꞌikanin.

² Kamina kuakanti ꞌain, nëtë kuin tunankuatsinkë an ka me mapuia, ꞌimainun ka bëtsi ëmakamanu ꞌikë unikama ax bë́anbëankikë an mapukënu ꞌikësa ꞌikën, ꞌaínbi ka Nukën ꞌIbu ax tirítan pë́kakësa mitsunu ꞌiti ꞌikën, usai ꞌia ka usai ka Diosan kushi mitsunu ꞌia kixun bëtsi unikaman isti ꞌikën.

³ Usai ꞌikëbë ka bëtsi bëtsi ëmanu ꞌikë unikama Dios kuëënkësabi oí tsóti tirínu ꞌikësa ꞌiti ꞌikën, ꞌimainun ka bëtsi bëtsi ëmanu ꞌikë ꞌapukama atúxribi ichu ichukikë an pë́kakësanu ꞌiti ꞌikën.

⁴ Jerusalénnu tsókë unikama mitsun kamina, chairui kuainakëkin usai ka bëtsi menu tsókë unikama mitsubë timë́ti ꞌaia isti ꞌain. Mitsun bakë bëchikëkamax ka ꞌurakëoxbi uti ꞌikën; ukin ka unikaman mitsun ꞌini bëchikë xanukama, bërúanxun aín pëñanu ꞌaruxun bëkësa obëtsinkin bëti ꞌikën.

⁵ Usakin bëia isi kamina ꞌitsaira kuëëni kuëpunchini kuaikanti ꞌain, usai ꞌi kamina uínsarabi kuëënkësamairai min nuitu mëu kuëënti ꞌain; usai ukin ka parúmpapa nasínua ꞌikë ëmakamanua ꞌikë ñu upíirabu a mitsu bëxunkanti ꞌikën, usakin bëxun ka bëtsi menu ꞌikë unikama ñu kupikëirabu akama mitsu ꞌinánti ꞌikën.

⁶ Usa ꞌain kamina atúxa ꞌitsaira ꞌaish atun camellonën ëma tsitsibëtsini Madián ꞌimainun Efá amiax ꞌaia isti ꞌain; usai ukin ka Sabánu ꞌikë unikama an kuri ꞌimainun sanuira ñu aín camellonën bëi ukin an upíokin ñu ꞌaia kixun Dios a rabiti ꞌikën.

⁷ Atun ꞌarakakë carnero ꞌimainun cabra Quedarnu ꞌikë unikaman mitsu bëxunkë, ꞌimainun carnero kama Nebaiotnu ꞌikëkaman bëkë akamina mitsunmi anuxun ñuina xaroti ꞌakë anuxun an kuëëntisabi okin ꞌinaínshiti sinánxun nankë ꞌakësa okin upí ꞌitánun ꞌaxunti ꞌain, usakin ꞌakëbëtan ka an anuxun a rabiti xubu upíira ꞌimiti ꞌikën.

⁸ ¿Uikama kara axa kuin ꞌikësai munu kuanima nianan, ñumakuru aín ꞌuxtinu kuankësa ꞌinun kuankë ax ꞌit?

⁹ Tarsisnu ꞌikë manë nunti kama ax ka atu rëkuëonbiani manë nunti kama raíri abë biranan kuatsini kuankin, Jerusalénnu ikë unikama bëi ukin, mitsun bëchikëkama ꞌurakëo bëanan, kuri manë uxua akama bëti aka ax ꞌikën, a ñukamax ka min ꞌIbu Israel kaman Dios upíira a bëxunkë ꞌiti ꞌikën, an ka kushiira ꞌixun mitsu ꞌakiankëxa.

¹⁰ Bëtsi menu tsókë unikaman ka anun mitsun ëma kënëara ꞌikëbia rurupakama a mitsu ꞌaxuntëkënti ꞌikën, usakin ꞌaia ka atun ꞌapukaman mitsu ꞌakinti ꞌikën; Nukën ꞌIbun ka ax nishkin mitsu ꞌatima okin tëmëramiakëxa, ꞌaínbi ka bërí ax upí ꞌixun mitsu nuibatia.

¹¹ Jerusalén ëma kënëkë aín xëpútikama ax ka uínsaranbi xëpúkëma ꞌiti ꞌikën; usa ꞌain ka nëtë ꞌimainun ꞌimë́bi xëpúkëma xëókikë ꞌiti ꞌikën, usa ꞌain ka bëtsi bëtsi menu ꞌikë uni ñuñuirakama atun ñu buani atsínti ꞌikën, anun bëtsi bëtsi menu ꞌikë ꞌapukama aín unikamabë ꞌatsínti ꞌikën.

¹² Uinu ꞌikë menu ꞌikë ꞌapun kara aín unikamabëtan ꞌakinsama tania ax ka; aín ëmakama këñunbi ꞌatima okin masókin këñúkë ꞌiti ꞌikën.

¹³ Nukën ꞌIbun ka Jerusalén ëmanu tsókë unikama ësokin kaxa: “Líbano menu ꞌikë unikaman ka anu ꞌikë ñu upíbu a mitsu bëxúnti ꞌikën, ax ka ꞌiti ꞌikën, pino kakë i ꞌimainun abeto kakë i ꞌimainun ciprese kakë i akaman anuxun ꞌë rabiti xubu ꞌupíira ꞌitánun mëníokin ꞌati ꞌikën, usakin ꞌaxun kamina anuxun ꞌë rabikanti ꞌain, ax ka ꞌëx anu ꞌikë xubu ꞌiti ꞌikën.

¹⁴ An mitsu tëmëramia unikaman bakë bëchikë atux ka aí ñuumara ꞌianan, kushiñuma mitsun iskëx ꞌiti ꞌikën, ꞌimainun ka an mi tima unikama atúxribi mitsu bëtanain rantipuruni tsóbukin, mi anëi kikanti ꞌikën. Mix kamina Nukën ꞌIbun ëma ꞌai kixun kati ꞌikën. ꞌImainun ka Jerusalén Dios upíira aín ëma kakin anëti ꞌikën.”

¹⁵ Usa ꞌain kamina mitsu rakanan, istisama tankin miratsushi ꞌinun ënkësa ꞌitima ꞌain, usai ꞌima kamina ꞌën mi xënibua, ꞌaínbi ꞌën kushiokëx kuëëni tsókanun mi ꞌimiti ꞌain.

¹⁶ Bëtsi bëtsi menu tsókë unikaman atun piti upíira a bëxun ꞌinámainun, ka ꞌapukamanribi ñu upíbu akama mitsu bëxúnti ꞌikën; bëxunkëxun kamina mitsun ꞌëx kana Nukën ꞌIbu a ꞌai kixun ꞌunánkanti ꞌain, ꞌunánan ka ꞌëx kushiira ꞌixun kana Israel unikama ië́mikin bitëkëa kixun ꞌunánkanti ꞌikën.

¹⁷ “Usa ꞌain kana manë panshian ꞌinánkinma kuri mi ꞌinánti ꞌain, ꞌimainun kana manë iru ꞌinánkinma manë uxua a mi ꞌinánti ꞌain, ꞌanan kana i ꞌinánkinma manë panshian a mi ꞌinánti ꞌain. ꞌAnan kana maxá ꞌinánkima manë tunan mi ꞌinánti ꞌain. Usakin ꞌanan kana upiti tsótimi bukukanun ꞌimiti ꞌain, ꞌimianan kana upiokinshi ñu ꞌanun mitsu ꞌamiti ꞌain.

¹⁸ Usa ꞌain ka Israel menu uínsaranbi ñu ꞌatima ꞌaia kuatëkënti ꞌaíma ꞌiti ꞌikën, ꞌianan ka amiribishi min menu masókin rurupakë ꞌitëkëntima ꞌikën, usa ꞌikë ka anun mitsun ëma kënëara kama ax ië́mianankë kakin anëkë ꞌiti ꞌikënꞌ ꞌimainun ka aín xëkuëkama axribi anuxun Nukën ꞌIbu rabiti kakin anëkë ꞌiti ꞌikënꞌ.

¹⁹ Usa ꞌain ka nëtë́n barin pë́kamainun, imë́ribi ꞌuxën pë́kakë ax kuëënkëma ꞌiti ꞌikën, ꞌëx mitsun ꞌIbu ꞌixun kana nëtë́tima okin mitsu pë́kati ꞌain, ꞌëx mitsun Dios ꞌixun kana ichu ichúkikësa ꞌitánun mitsu pë́kati ꞌain.

²⁰ An mi pë́kakë bari ax ka uínsaranbi ain pë́kakë nëtë́tima ꞌikë ꞌimainun ka ꞌuxën pë́kakë axribi nëtë́tima ꞌikën, ꞌëx min ꞌIbu ꞌaish kana an mi pë́kakë ꞌixun uínsaranbi nëtë́kinma pë́kati ꞌain; ꞌianan ka anun uni ñukëbë masá nuituti nëtëkama axribi nëtë́ti ꞌikën.

²¹ Kamabi unikama mitsun ëmanu ꞌikë ax ka upí sinánñubu ꞌiti ꞌikën, usai tsótika atun menubi xënibuti tsóti ꞌikën, usai ꞌika ꞌënbi ꞌapákëxa ñu upiti kookë usaribi atux ꞌiti ꞌikën, ax ka ꞌën mëkënanbi usaka ꞌën kushi ꞌikë kixun ismikin ꞌën ꞌakë ꞌikën.

²² ꞌItsamara uni ënëx ka ꞌaisamaira ꞌinun ꞌuakamë ꞌëoti ꞌikën, usai ꞌika ꞌitsamara uni ax achúshi ëma chaiira ꞌinun ꞌuakamë ꞌëoti ꞌikën. ꞌËx kana Nukën ꞌIbu ꞌain, usa ꞌixun kana ꞌën anun ꞌiti nëtë ꞌikëbëa, bënëtishi usai ꞌinun ꞌimiti ꞌain.”