Isaías 6 - Kashibo-Kakataibo Biblia

Diosan namámikësokin usaía ꞌiti ñuikin Isaías ka bana

¹ A baritian ꞌapu Ozías ñukë anun kana Dios anua tsókë manainra anuxunbia; aín chupa kuëxitan anun anuxun a rabiti xubu a mapukë isan.

² Isanan kana unisa akamaxa tsi rëkirukë kamasa ꞌaish a manámi tsókë isan. Usa ꞌaish ka achúshi achúshinëx mapai achúshi ꞌimainun achúshi pëchiñu ꞌiaxa. Usa ꞌaish ka rabë́ pëchin bëmápuküanan, rabëtan aín chixumixun aín nami mapuanan ka rabëtanribi nuanxa.

³ Usai ꞌika bëtsibë bëtsibë kánani ësai kiaxa: “Nukën ꞌIbu kamabi kushiñu ax ka upíira upí, upíira upí ꞌikën; kamabi an menu unio ñukaman ka ax ka kushiira ꞌikë kixun ꞌunania.”

⁴ Ësai kikin rabikëbë ka anuxun a rabiti xubu ꞌain xëpútikama shaíkimainun, ka tsin kuinsa axribi anu ꞌibúkin a xubu mapuruaxa.

⁵ Usakin ꞌaia iskin sinani kana ësai kian: “¡Uisai karana ꞌiti ꞌain, bërí sapi kana bamati ꞌain! ꞌËnbi kana ꞌapu ꞌaish kamabi kushiñu Dios a isan; ꞌëx kana achúshi uni ꞌën kuëbitan ꞌatimati banakë ꞌimainun, kana achúshi ëma ꞌatimati banakë unikama nëbëtsi tsotin.”

⁶ Usai ꞌëx kikëbëbi ka unikama achúshi tsi rëkirukësa ꞌaish ꞌëmi kikuatsini nuankuatsini uaxa. Ukin ka xëta rabë́ okin ꞌakë anun tsi ëxku ënxaira achúshi anuxun ñuina xaroti ꞌakë anua bitsínkin bëaxa,

⁷ bëkin ka anun kuëtíkakin ꞌë kaxa: “Ka kuat, tsi ëxku ënxaira ënën kana mi kuëtikan. Usa ꞌain kamina bërí min ñu ꞌatima ꞌakë kupí ꞌuchokëma ꞌain, usa ꞌaish kamina min ñu ꞌatima ꞌai ꞌuchakëkama bërí mëníokë ꞌain.”

⁸ Ësai kia kuatankëxun kana Dios ësai kikë aín banaribi kuan: “¿Uinu ꞌikë uni karana xuti ꞌain? ¿Uix kara nukamax kikë bana uni ñuixunkë ꞌiti ꞌik?” Kia kana ꞌën kan: “Ënu kana ꞌëx ꞌain ꞌë kamina xuti ꞌain.”

⁹ Ësokin kakëxun ka an ꞌë kaxa: “Anu kuanxun kamina ëmanu ꞌikë unikama ësokin kai kuanti ꞌain: ꞌItsokin ñuixunkëxun kuakinbi ka ꞌën bana uisai ki kara kia kixun ꞌunánkantima ꞌikën; ꞌianan ka ꞌitsokin ꞌën ñu ꞌaia iskinbi, uisakin ꞌakin karana usakin ꞌai kixun ꞌunánkantima ꞌikën.

¹⁰ Ënë unikama kamina upíokin sinánxuma ꞌanun ꞌimiti ꞌain; ꞌimianan kamina atun pabitan kuakinbia aín pabí xëpúkësa ꞌixuan kuakasmanun ꞌimiti ꞌain; ꞌimianan kamina iskinbia aín bëru bëpankësa ꞌixun iskasmanun ꞌimiti ꞌain. Usa ꞌixun ka kuatima ꞌianan istimabi ꞌikën, usai ꞌikin ka atun ꞌën bana kuatíbi ꞌëmi sinanatima ꞌikën, ꞌën atun ꞌakë ꞌuchakama mëníoxunun.”

¹¹ Ësokin kakëxun kana ꞌën ñukákën: “¿ꞌËn ꞌIbu uiti bari ꞌimi kara ënë ñukama min bana kikësai ꞌinux basiti ꞌik?” Kixun kakëxun ka Diosan ꞌë kakëxa: “Ënëx ka ëmakama masókin ꞌatima okëbëa anu ꞌikë unikamax uniñuma ꞌianan; atun xubukamaxribi uniñuma ꞌimainun, anu ñu ꞌapákë me kamaxribi anu uni ꞌikëma mesa bërutamainun anu sënën ꞌiti ꞌikën,

¹² ꞌimainun ka anu ꞌikë unikama Diosan axa ami nishkë unikaman, ñatanbiankin buánkëbë ñankáishi anu ꞌikë me ꞌimiti ꞌikën.

¹³ ꞌIanan ka cien uni buankëbëa mapai rabë́ uni bërúkë akamaxribi këñúkë ꞌiti ꞌikën, usakin ꞌakëx ka i unin bëríbi tëakëx ꞌikësai ꞌain buru ishi bërúkë usairibi ꞌiti ꞌikën” (ꞌaínbi ka aín mo bërúkë axa upíira ꞌinun kotëkënkë, usaribiti anuax an kuëënkësa okían ꞌati unikama mëratëkënti ꞌikën).