Isaías 55 - Kashibo-Kakataibo Biblia

Nukën ꞌIbu aín unikaman upíokin ñu ꞌaxunti ñuikë bana

¹ “Kamabi axa shimakë akamax ka ꞌumpax xëai uti ꞌikën; ꞌimainun ka uikamax kara kuríkiñuma akamanribi, atun piti trigo kupíokinmashi biti ꞌikën; bianan ka uvas baka vino ꞌakë a ꞌimainun vaca xuma aribi añubi kupíokinma biti ꞌikën.

² ¿Uisa kupín kaina kuríkinën a piti ñu ꞌakësokin pitima ñu a kupíoti ꞌain? ¿Uisa kupín kaina të́xumi bikë kuríki anun pitima ñu kupíoti ꞌain, a kana ꞌa kixun sinani kuëëntima ñu a kupíoti ꞌain? Upiokin kamina ꞌën kakëxun kuati ꞌain, kuakin kamina upiokin ꞌakë piti nëish irakama piti ꞌain.

³ Ënu kamina mitsux ukanti ꞌain, ꞌën kakësabiokin ꞌën bana upiokin bëmë́kin ꞌai kamina chuámarua tsókanti ꞌain. ꞌËn kana mitsubëtan uínsaranbi këñutima ñu ꞌati ꞌain, usokin ꞌakin kana ꞌën uni David nuibakin kásabiokin mitsu ꞌaxunti ꞌain.

⁴ Mitsun kamina ꞌunánti ꞌain ꞌën kana, bëtsi bëtsi menu kuankian aín ꞌapu ꞌixun ñu ꞌunánmikin ꞌën ꞌunánmikë banakama ñuixunun xuakën.

⁵ Min kamina ëma ꞌunánkëma kamanua; ꞌikë an mi ꞌunánma ëmakamanua bënëkuatsinia ukanun kuëënti ꞌain, usokëx ka atux abákuatsini minu ꞌuti ꞌikën, ꞌëx min ꞌIbu ꞌianan Israel unikaman Dios upíira ꞌixun kana ꞌën mi uisakinbi katima ꞌimian.

⁶ ‘Bërí kamina mëratisa ꞌikëishi Nukën ꞌIbu barikanti ꞌain, ꞌianan kamina bëría mi ꞌurama ꞌikëishi kuënti ꞌain.

⁷ Uni ꞌatimakama an ñu ꞌatima ꞌati sinánkin ꞌakë an ka ñu ꞌatima ꞌakë a ënti ꞌikën, ꞌimainun ka uni bana kuakëmakama atúnribi ꞌatimakian sinánkë akama ënti ꞌikën; ëni ami katamëtia ka Nukën ꞌIbun mitsu nuibati ꞌikën, ꞌimainun kamina Diosan nuibanankëira ꞌixun an mitsun ñu ꞌatima ꞌakëkama mëníoxunun ami sinánkin rabikanti ꞌain.’

^8-9 ꞌËn sinánkë ax ka mitsun sinánkësara usama ꞌikën, ꞌimainun ka ꞌën usakin ñu ꞌaisatankë ax mitsun usakin ñu ꞌaisatankë usama ꞌikën. Usa ꞌaish ka naíkamë ꞌëo axa me manámi ꞌikë, usaribi ka ꞌën ꞌati sinánxun ꞌakë ñukama ꞌikën, usa ꞌain ka ꞌën ꞌati sinánxun ꞌakë ax mitsunmi a ꞌati sinánxun ꞌakë usama ꞌikën, kiax ka.” Nukën ꞌIbu asérabi kiakëxa.

¹⁰ ꞌUí ꞌimainun nibí ax ka naíkamë ꞌëonuax ꞌibútankëx, me chaboima kuarutëkënkima me chabóia, usakin chabókëxa ñu bërukama komainun, a ꞌapátëkënti aín bimi biti axribi koia, komainun ka ꞌapáxun aín bimi piti akamaribi tuaia,

¹¹ usaribiti ka ꞌëx kikë bana ax ꞌia, usai ꞌi ka ꞌën kuëënkësa okin ñu upí ꞌatankëxma ꞌënu kuantëkënima, ꞌaínbi ka ꞌëx kuëënkësabi okin pain ꞌaia, ꞌakin ka kuankima a ꞌanun ꞌën xukë a pain ꞌaia.

¹² Usa ꞌain kamina mitsux kuëënkiani anuaxmi tëmërakankë, anuax kamina mitsun menubi uínbi uisokinbi kakëma kuantëkënti ꞌain. Usai mitsux kuania isi ka ꞌain bashikama kuëëni kantati ꞌikën, ꞌimainun ka kamabi ikama ninu ꞌikë akamax mëtashkiti ꞌikën.

¹³ Usa ꞌain ka pino kakë i axa komainun muxañu ikama ax kotima ꞌikën, ꞌimainun ka i chaxkë́irabu aín pëchi këxtuira ax komainun axa nichaxonankë ax kotima ꞌikën; ënë ñukama iskin ka unin Nukën ꞌIbun anë upiokin rabiti ꞌikën, ax ka uínsarabi ka Dios ax këñutima ꞌikë kixun ꞌunánan uínbi ka ꞌatima otima ꞌikë kixun ꞌunánti ꞌikën.