Isaías 54 - Kashibo-Kakataibo Biblia

Diosan ka aín unikama ënkinma xënibua ꞌaínbi nuibatia kikë bana

¹ Jerusalén ax ka tuáñuma xanu ꞌianan tuakëma xanusa ꞌaish munuma kuëëni kantati ꞌikën, mix kamina bakënkin paëtankë usaribi ꞌain usai ka Nun ꞌIbu kiaxa: xanu aín bënë ënkë an ka xanu bënuñunën ꞌakësamaira okin ꞌitsaira tuati ꞌikën.

² Min xubusokin chupa ꞌakë akamina chooti ꞌain, ꞌanan kamina anun mapankë a rakuë́kimaishi anumi ꞌikë a pëninkin ꞌati ꞌain; ꞌanan kamina aín itsikama chaxkë́bu ꞌaxun aín ikama upíokin matáskin nitsintankëxun ami tëkërë kati ꞌain,

³ min rëbúnkikamax ka mëkeu kuanan, mëmiu kuani me tsitsirui ꞌuakamë ꞌëoti ꞌikën; usai ꞌikin ka min rëbúnki kaman mekama anu ëma ꞌikëbia ënkan, anu uni ꞌikëma ëmakama anu kuantëkënti ꞌikën.

⁴ Usa ꞌain kamina rakuë́tima ꞌain katë́kësamina ꞌin, usa ꞌain kamina bërúankati ꞌain; mi ꞌichakin ñuikankëxbi anun rabinti ñu ka ꞌaíma ꞌiti ꞌikën. Bëná ꞌaíshmi bakë bëchikëñuma ꞌaish rabian akamina manuti ꞌain, ꞌimainun kamina xanu aín bënën kasunankë ꞌakësokin mi ꞌakan a sinántima ꞌain,

⁵ ꞌianan ka an mi unio an aín xanusa ꞌikë mi biti ꞌikën. Aín anëx ka Nukën ꞌIbu kamabi kushiñuira ꞌikën; ax ka an mi bitëkënti Israel unikaman Dios upíira a ꞌikën, ꞌianan ka Dios kamabi me an unio a ꞌikën.

⁶ Mix kamina xanu chipash aín bënën ꞌatimati nitsia ënkësa ꞌaish tëmërai ꞌiakën, ꞌaínbi ka min Diosan amirbishi nuitëkënun mi kaxa.

⁷ “ꞌItsama nëtë́ishi ꞌimikin kana mi ëankën, ꞌaínbi kana ꞌëx nuibanankë ax chaiira ꞌain amiribishi ꞌëbë biranani utëkënun mi kakën.

⁸ Uínsaran karana ꞌëx mimi nishakën anu kana, ꞌitsama nëtë́ishi mimi mëráma ꞌain, ꞌaínbi kana ꞌëx nuibanairakë ax nëtë́tima ꞌain mi nuibakën.” Usai ka min ꞌIbu an mi bitëkënti ax kiaxa.

⁹ “Baka ꞌikuatsini sënë́nkë ꞌain kana, sinanatëkëntima okin ꞌën Noé amiribishi ka me mapui baka ꞌëtëkëntima ꞌikë kixun kakën. Usokin kana bërí sinanatëkëntima okin amiribishi kana usakin mimi nishtëkëntima ꞌai kixun kakën.

¹⁰ Aín bashikamax anua ꞌikë anuax amoki shaíkimainua, matá mekama tukibuti rëukubukëbëbi ka ꞌën mi nuibakë ax uisaibi ꞌi nëtë́tima ꞌikën, ꞌimainun ka ꞌën mibëtan ꞌa achúshi ñu anun upiti tsóti ax uisaibi ꞌi nëtë́tima ꞌikën.” Usai ka min ꞌIbu ax mixmi ꞌaisama ñu ꞌinutia isi mi nuibati kia.

Jerusalén ëma ió ꞌitëkënti ñuikë bana

¹¹ “¡Jerusalén ëma bërí kamina nuibatira ꞌaish, suñuanën ꞌatima okësa ꞌiti ꞌain, usa ꞌain ka an mi kuëënmiti uibi ꞌaíma ꞌiti ꞌikën! ꞌËn kana min maxáxkama a tsisu niba nibakikë tunaínra anu nanan, min tapunkama aribi zafiro kakë kuman batsisa akamanan nanti ꞌain;

¹² ꞌanan rubíes kakë maxax panshian torrekama ꞌanan, berilo kakë maxáx paxasa tani nibánibákikë aribi aín xëpútikamaribi ꞌati ꞌain, ꞌanan kana buinarakin kënëarakin maxax upíirabu akaman ꞌati ꞌain.

¹³ ꞌËn kana min bakë bëchikëkama ñu ꞌunánmiti ꞌain, usokëx ka akamax upiti tsóti bukuti ꞌikën.

¹⁴ Usa ꞌain ka ñu ꞌatima ꞌaíma upiti tsókë an mi kushioti ꞌikën, usai ꞌia uínbi mi uisabi okëma ꞌaish kamina rakuë́tima ꞌain, usai ꞌi kamina rakuë́tan bamati sinántëkënima upitax tsóti ꞌain.

¹⁵ Uin kara mi ꞌaisatankin ꞌaia, ax ka ꞌën ꞌamikëxun mi ꞌakëma ꞌiti ꞌikën, ꞌaínbi kamina min ira kanankin atu ꞌati ꞌain.

¹⁶ Ka kuat, ꞌën kana ax manën tëkë akama uniokën, an ka tsi ënxaira anu ꞌarukëxa charatia bëtsi bëtsi ñu uniokin anun ꞌakánanti akamaribi ꞌaia; ꞌianan kana uniribi uisokin kara ꞌakatsia usakin ꞌakin an kuëënkësa okin ñu ꞌatimonun uniokën;

¹⁷ ꞌaínbi ka uínbi anun ꞌakanankin ñu anun masókin ꞌati uniokëma ꞌikën. Mitsun kamina an usa ka atux ꞌikë kixun mitsu ꞌuchokëkama a uisa bananbi bananun kimitima ꞌain. Ësokin kana axa ꞌëmi katamëkë unikama ꞌamiti ꞌain: usokin ꞌakin ka atun ñusmoti ꞌikën.” Ësai ka Nukën ꞌIbu asérabi kiakëxa.