Isaías 53 - Kashibo-Kakataibo Biblia

¹ ¿Uin kara nukamannu kuaxun ñuikë min bana ax ka asérabi ꞌikë kixun sinánti ꞌik? ¿Ui kara Nukën ꞌIbun aín kushin ñu ꞌakin ax ka kushi ꞌikë kixun sinánnun ꞌimiax?

² Nukën ꞌIbun ka kuëëankëxa, aín uni axa ñu ꞌapákëx bërí koi kani aín tapunkama me ëskikë ꞌukëmëu kuankë usairibi ꞌiti. Usa ꞌaínbi ka upíma ꞌianan, chabáchabákikë upima ꞌiakëxa, ain namix ka usa ka kixun unin ñachakin istisama ꞌiakëxa;

³ usa ꞌikë ka unikaman istisamatankin timakanti ꞌikën. Ax ka achúshi uni ꞌitsaira paë tani tëmërakin masánuitukinbi tënëkin ꞌaxëkë ꞌiaxa. Usa ꞌikë ka a unin istisama tankë unisa ꞌikë kamaxunbi usa ka; ax ꞌikë kixun nukaman ꞌunánma ꞌain.

⁴ Usa ꞌaínbi ka ainansa ain nukamaxnu tëmërati anun tëmërakëxa, usa ꞌikë ka nukaman paë ainansa ꞌain anun tënëakëxa. Nukaman kananuna sinanin Diosan ka aín namikama tëakin, ꞌakësokin tëmëramikëx ñuumarasa ꞌiti ꞌikën. (Ënë banax ka bëráma ꞌiása ꞌikëbi upiokin ꞌunánti ësokin ꞌakë ꞌikën.)

⁵ ꞌAínbi ka nun bana kuakëma kupí ax bëtsi bëtsi okin mëëkë ꞌiti ꞌikën, usokin ka nun ꞌuchakama kupí ꞌati ꞌikën; axa usai tëmërakë ꞌain kananuna nux upitax tsótin, ꞌianan kananuna rishkikin aín nami tëakan ꞌain uisabi ꞌikëma upiti tsóti ꞌain.

⁶ Kamabi nukamax kananuna ovejakama nëtë́kësa ꞌinun, nukamax achúshi achúshinëx nun kuëënkësoishi niakën, ꞌaínbi ka Nukën ꞌIbun ainansa ꞌikë nun ñu ꞌatima ꞌakëkama kamabi nukamanua mëníokëxa.

⁷ Ax ka ꞌatima okë ꞌiaxa, ꞌaínbi ka ñuumarasa ꞌixun ꞌinamëkin tënëti ꞌikën, ꞌianan ka uisa banarabi banatima ꞌikën; usai ꞌiaka, anuxun ꞌatinua carnero aín bënë bërí kanikë buankësa okin buankanti ꞌikën, usai ꞌika ax uisaibi banaima nëtë́ax aín rani tëakëxun carneronën tanshikë usaíshi ꞌiti ꞌikën.

⁸ Usa ꞌain ka ñu ꞌatima ꞌakëmabi uankankëbë anun rabanan nëëti ax banati uibi ꞌaíma ꞌiti ꞌikën; usai ꞌikëbë ka axa ñukama ꞌinúkëbë uisa ñu kara inutia kiax ax ami sinánti uni ꞌaíma ꞌiti ꞌikën. ꞌImainun ka ënë menua chikinti ꞌikën, ꞌanan ꞌën aintsikama ꞌucha kupín bamatanun ꞌakánti ꞌikën.

⁹ ꞌAtankëxun ka uni ꞌatimakama anu maínkë a rapasu maianan, uni bana kuakëma anu maínkë, rapasu maínti ꞌiti ꞌikën, ꞌaínbi ka ax uínsarabi uni ꞌakëma ꞌianan këmëi banakëma ꞌiti ꞌikën.

¹⁰ Nukën ꞌIbun ka ꞌitsaira a tëmëramisa tankëxa. Usai ax unin ꞌucha kupí ñukë ꞌixun ka ꞌitsaira baritia xënibua, ꞌaínbi tsókin aín rëbúnkikama isti ꞌikën; usa ꞌixun ka Nukën ꞌIbu kakësabiokin an sinánkësa okin ꞌati ꞌikën.

¹¹ Usai pain ꞌitsaira tëmëratankëxun ka asérabi kana Diosan kakësabiokin ꞌan kixun ꞌunani kuëënti ꞌikën; usa ꞌain ka Nukën ꞌIbun ka upí ꞌixun ꞌitsaira uni ië́miti ꞌikën, ꞌianan ka unikama ꞌatima ñu ꞌai ꞌuchakë kupín ainansa ꞌain, anun tëmërati ꞌikën.

¹² Usa ꞌikë ka Diosan ñunuxa abi ꞌinamëa ꞌikë, anua uni chabu ꞌikë anu ꞌimia ꞌixun, anua uni kushiirabu kanantankëx ꞌikë anua atubë ꞌinun ꞌimiti ꞌikën, a ka unin axribi ka uni ꞌatima ꞌikë kixun unin sinánkëxa, usa ꞌixun ka kamabi unin ꞌucha ainansa ꞌikë papianan kamabi uni atun ꞌucha kupín ñukáxuankëxa.