Isaías 52 - Kashibo-Kakataibo Biblia

Jerusalénnu ꞌikë unikama ka asábi uínbi ubíokëma ꞌiti ꞌikë Dios kikë bana

¹ Axa Jerusalénnu tsókë unikama mitsux kamina upíokin sinani kushikanti ꞌain, mitsux kamina Jerusalén upí kakë ëma anu tsotin, usa ꞌain kamina mitsun chupa upíirabu a pañukanti ꞌain, bëtsi menu ꞌikë unikama an Dios rabikëmakama ax ka amiribishi mitsunu atsíntëkëntima ꞌikën.

² Jerusalénnu ꞌikë unikama mitsux kamina niruti ꞌain, nirukin kamina me tákati ꞌain, mitsux mi rabinkë a ëni anua ꞌapukama tsókë anu tsókësa ꞌiti ꞌain. Jerusalénnu ꞌikë uni bënákama mitsux kamina unían bërí ka tëmëraima kixun mitsu istánun anuaxmi tëmërakankë anuax chikínkanti ꞌain.

³ Ësai ka Nukën ꞌibu kiaxa: ꞌËn kana achúshi kuríkirabi axa mitsumi nishkë unikaman, mitsu tëmëramikin ñu mëëminuxun buántanun biama ꞌain, usa ꞌain kana bërí achúshi kuríkirabi ꞌën mitsu chikínbëtsinkin bënuxun atu ꞌinántima ꞌain.

⁴ Ësairibi ka Dios kiaxa: “Bërámabi ka ꞌën unikama Egipto menu, kuan ꞌaish anu tsóakëxa bëtsi menu ꞌikë unikamasa ꞌaish, usai ꞌia ꞌikëbi ka Asirianu ꞌikë unikaman uisa ñu ꞌakëmabi tëmëramiakëxa.

⁵ Bërí ka ësai Dios kia, ¿uisa ñu karana isin? ꞌËn unikama ka uisa ñu ꞌatima ꞌakëmabi Babilonianu ꞌikë unikaman ain menu uanxa. An buánkë unikama ax atumi kuai kuënkëni kushin rabiakati ki, ꞌëmiribi nëtë́timaira kuëëreti kia.

⁶ ꞌAínbi ka anúan ꞌën unikaman ꞌëx kana Dios ꞌai kixun ꞌunánti nëtë ꞌinuxun ꞌaia, usa ꞌain ka ꞌë ꞌunánan ꞌëx kana Nukën ꞌIbu ꞌaish usai bana kixun ꞌunánti ꞌikën.”

⁷ ¡Upíira upíira ka axa bashikama tësapanën, upíira bana bëi aia iskë ax ꞌikën, an ka anun upiti tsóti bana bëia, an ka anúan aín unikama ië́ti bana bëi ukin Jerusalén ësokin kaia, “Min Dios ax ka ꞌapuira ꞌikën!”

⁸ ¡An bërúankë! Unikama mitsux kamina munuma banai kiti ꞌain, kimainun ka bëtsíxribi ñusmokin bëtsi ꞌatankëx anun kiti bana anun kiti ꞌikën, atun ka aín bërúnbi uisa kuatsini kara utëkëni Nukën ꞌIbu Jerusalénnu aia isti ꞌikën.

⁹ ¡Jerusalén na masókan anu tsókë, unikama mitsux kamina kana ñusmo kiax kuëënkanti ꞌain, Nukën ꞌIbun ka Jerusalénnu ꞌikë aín unikama nuibaxa, usakin ꞌakin ka aín unikama nuibakin chikíanxa! (Ënëx ka Jesucristo ñui kikë bana ꞌikën.)

¹⁰ Nukën ꞌIbun ka ax kushiira ꞌixun kamabi menu ꞌikë unikama aín kushi ismiaxa. Usa ꞌain ka kamabi menuxun unánti ꞌikën. Nukën ꞌIbu Dios an ka nu ië́miaxa kixun ꞌunánti ꞌikën.

¹¹ ¡Babilonia menu tsókë unikama mitsux anuax chikíkin kamina anua ꞌikë ñu ꞌatimakama a mëëtima ꞌain! ¡Anuxun atun dios rabikë xubunua buánxun nankan Diosan ñukama an buánti akamax ka upiti mëníokakë ꞌiti ꞌikën!

¹² ꞌaínbi ka anuax chikiti kuani bënëtishi abákiani chikítima ꞌikën, Nukën ꞌIbu Israel unikaman Dios, an ka atu kuania uisa ñubi inuaxma ꞌinun amami amamiukua bërúanti ꞌikën.

Tëmërakin ñusmotankëx ka Diosan uni upiti ꞌikë kixun ñuikë bana

¹³ ꞌËn uni akana an ꞌakë ñukamax ka upí ꞌiakëxa, ꞌikëbëtan ka axa aín kushiira ꞌi manámi ꞌinun ꞌimiti ꞌikën.

¹⁴ Usa ꞌain ka ꞌitsaira uni a isi ratúkanti ꞌikën, ain bëmánan bëtsianan ka aín nami, unin nami iskësa akamax unin nami iskësama bëtsikë ꞌiti ꞌikën. (Ënë banax ka hebreo banan usai kia.)

¹⁵ Usairibi ka kamabi menu ꞌikë unikama atúxribi ratuti ꞌikën; usai ꞌimainun ka ꞌapukamaxribi a isi uisa banarabi banatima ꞌikën, usai ꞌikin ka uinsaranbia unin ñuixuama ñu isti ꞌikën, ꞌimainun ka uinsaranbia kuama bana a kuati ꞌikën, kiax ka Dios kiakëxa.