Isaías 50 - Kashibo-Kakataibo Biblia

Nukën ꞌIbun ka kushiira ꞌixun an unio ñukama uisokin kara ꞌaisatania usokin ꞌati ꞌikë kikë bana

¹ Ësai ka Nukën ꞌIbu kia: “¡ꞌËn kana Israel unikama mitsun tita ꞌikëbi rakankë kixun kamina sinánkantima ꞌain, achúshi unin aín xanu ënkin rakankë usaribi okin, usokin ꞌanan karana mitsu ñu mëmikë uni ꞌakësokin ama ꞌain bëtsi uni ribinxun akësokin ꞌama ꞌain! Mitsux kamina mitsun ꞌuchakë kupín marukë ꞌiakën; Israel unikama mitsun titax ka timakin rakankësa ꞌiakëxa, mitsun kakëxunbi ꞌën bana kuaisama tankë kupín.

² ¿Uisa kupín karana ukin ꞌën uibi mërama ꞌain? ¿Uisa kupín kara kuënkëxunbi uínbi ꞌë káma ꞌik? ¿ꞌËx isana mitsu ꞌakinsama ꞌai kixun kaina sinánkankën? ¿ꞌËn isana mitsu chikintima ꞌai kixun kaina sinánkankën? ꞌËx usai ka ꞌiti ꞌikë kiax kikëbëshi ka parúmpapa ëskiti ꞌikën, ꞌimainun ka bakakamaxribi anu uni ꞌikëma mesa ꞌitánun aín ꞌumpax ꞌaíma ꞌiti ꞌikën; usai ꞌikëbë ka anu ꞌikë tsatsakama ꞌumpaxñuma ꞌain xanan bamai chë́kia.

³ ꞌËn kana naíkamëꞌ ëo uni ñukë ꞌain unix masánuituti chupan mapukësa ꞌitánun ꞌimiti ꞌain, usakin kana ꞌën ꞌimiti ꞌain.”

Nukën ꞌIbun uni ꞌitsaira tëmëraibi ami katamëti ñuikë bana

⁴ Nukën ꞌIbun ka ꞌë ñu ꞌunánmiaxa atsánkë unikama bana ñuixunkin kuëminun. ꞌIanan ka pëkarakëma ꞌain ꞌaínshi ꞌëa kakëxun munu aín bana kuanun ꞌë kaxa.

⁵ Nukën ꞌIbun ka aín bana upíokin kuanun ꞌë ꞌimiaxa, kana, ꞌaima kianan an kakëxun ain bana kuaisama tani ꞌiama ꞌain.

⁶ An ꞌë mëëkë unikaman mëëkëxun kana ꞌëa mëëtanun tanshiakën ꞌën kuëniribi të́kakëxun kana na ꞌatanun tanshiakën. ꞌImainun kana ꞌën bëmánanribi ꞌatimakin ñuikin bëtushu kakëxunbi ꞌën bëmánan ñuñai amo bësuakëama ꞌain.

⁷ Nukën ꞌIbu ax ka an ꞌë ꞌakinkë ꞌikën: usa ꞌain ka ꞌatimokin ꞌë ñuikë bana an ꞌë uisabi oima; usa ꞌain kana, ꞌëx achúshi mapara irusaribi ꞌaish anubi ꞌian, usa ꞌixun kana, ꞌëx usai ꞌikë anun kana katë́ti rabinkë ꞌitima ꞌai kixun ꞌunan.

⁸ ꞌË ꞌurama ka an ꞌë ꞌakinkin bërúankë ax ꞌikën: ¿Uix kara ꞌën isana usakin ñu ꞌa kiax ꞌëmi këmëi banati ꞌik? ¡Usa ꞌain ka uix kara ꞌëmi ꞌatimati banaia ax ka ëbëtan ꞌapunuxun bana mënioi kuanti ꞌikën! ¿Uin kara ꞌën isana ñu ꞌatima ꞌa kiax këmëishi ꞌëmi manánti sinanin? ¡Uin kara usakin sinania an ka ꞌutankëxun usakin kamina ñu ꞌa kixun ꞌë kati ꞌikën!

⁹ Nukën ꞌIbun ka ꞌë ꞌakinia; ¿uix kara ꞌën isana ꞌatima ñu ꞌa kixun ꞌë ꞌuchokatsi kiax ꞌëmi manánti ꞌik? Kamabi axa ꞌëmi nishkë unikamax ka këñuti ꞌikën, achúshi i bisan pikë usaíshi ꞌi nëtë́ti ꞌikën.