Isaías 49 - Kashibo-Kakataibo Biblia

Nukën ꞌIbu uni an ka tirísa ꞌixun bëtsi bëtsi ëmanu ꞌikë unikama upí bana kuati upiti tsónun ꞌakinia

¹ Axa parúmpapa nasínu ꞌikë ëmakamanu ꞌikë unikaman ka upiokin sinánkin kuati ꞌikën, ꞌimainun ka bëtsi bëtsi ëma ꞌura ꞌikë anu ꞌikë unikamanribi ꞌëx kia kuati ꞌikën: Nukën ꞌIbun ka ꞌën titan ꞌë tuakëma pain ꞌikëbi ꞌë kaisakëxa; usa ꞌixun ka ꞌën titan puku ꞌukë mëu ꞌikëbi ꞌën anën ꞌë anëakëxa.

² An ka ꞌën kuëbí manë xëtokë kuënukë usaribi ꞌitánun ꞌimiakëxa, ꞌimikëx kana kuaisabi ꞌitánun banakën, ꞌimainun ka aín mëkënan unëkësa oxun bërúanan ꞌë ꞌakiankëxa, usakin ꞌakinkin ka axa ꞌakánanti ꞌunánkë unin ꞌakanankin bitëkënuxun aín pia nëaxun nankësa, usaribi okin Nukën ꞌIbun ꞌë bërúankëxa.

³ Usakin ꞌatankëxun ka ꞌë kakëxa: “Mitsux Israel uni ꞌaish kamina ꞌën unikama ꞌiti ꞌain, usa ꞌain ka mixmi ꞌën kushiñu ꞌikë ꞌunánkanti ꞌikën.”

⁴ ꞌËn kana sinánkë ꞌian: “Ñankáishi kana ñu binuxumabi tëmërai tëkin ꞌën kushi këñuin.” ꞌAínbi ka asérabi ꞌën ꞌakë ñukama ax Nukën ꞌIbunu ꞌikën, ꞌën biti ñukama ax ka kushi ꞌixun Diosan ꞌë ꞌinánkë ꞌiti ꞌikën.

⁵ ꞌËn ꞌIbu Diosan ka uisabi otima kushi ꞌinun ꞌë ꞌimiaxa, ꞌimikin ka ami sinani kushinun ꞌë ꞌimiaxa. An ka ꞌën titan puku ꞌukëmëu ꞌikëbi ꞌë aín uni ꞌinun ꞌimiakëxa, usa ꞌain ka Israel unikama Jacobnën rëbúnkikama a ꞌën amia sinanatëkënun ꞌiminun ꞌë kaisa,

⁶ ax ka ësai kia: ꞌËn uni ꞌixunmi min Jacobnën rëbúnki, Israel unikama axa ñuima ꞌiakama a aín ñakánubi utëkënun ꞌakinkë ax ka ꞌën iskëx sënë́nmara ꞌikën, ꞌën kana ꞌën tirísa ꞌixunmi bëtsi menu ꞌikë unikama bana ñuixuanan, uinu kara me kuainakëakëxa anubi kuankin bana ñuinun mi ꞌimiti ꞌain.

⁷ Nukën ꞌIbu an nu bitëkënkë, Israel unikaman Dios upíira ax ka ësai kia, ami sinánkima manukë ëmakama bëtsi ëmanu ꞌikë unikama ami nishkin timakë, unikama ax ꞌapu ꞌixun ñu mëëmia a unikama ñui ka ësai Dios kiaxa: “Uínsaran kara ꞌapukama ꞌimainun aín kushikama mi isia anun ka nirukianx rantipuruni mi tanain tsóbuti ꞌikën, ꞌëx Israel unikaman Dios upíira ꞌixun kana ꞌën mitsu kaisa ꞌixun ꞌëx kikë usabi okin ꞌati ꞌain.”

Dios amiribishi ka Jerusalén birutëkënti ꞌikë kia ñuikë bana

⁸ Ësai ka Nukën ꞌIbu kia: “Anun ꞌën mitsu nuibati nëtë ꞌikëbëtan kana nuibakin; mitsu kati ꞌain, anun mi ië́të nëtë ka uaxa, ësokin kakin kana mitsu ꞌakinti ꞌain. ꞌËn kana mi bërúankin ꞌakiankën, ꞌëx kia bana axa mitsunubi ꞌitiokinmi min unikama ꞌunánminun, ꞌianan anubi ꞌitiokin achúshi ñu ꞌën unikabëtan ꞌakën, ꞌimainun mitsun mekama axa mitsumi nishkë unikaman ꞌatimokan a bitëkënun,

⁹ anuxun kamina mitsun sipunu ꞌikë unikama kati ꞌain: ‘Bërí kamina sipuakë ꞌikantima ꞌain.’ ꞌImainun ka axa bëánkibukënu ꞌikëkama: Atuxribi nëtë xabá isnun ënkë ꞌiti ꞌikën. Kamabi baikama ꞌipitinua kamina pasto mëranan, anu uni ꞌikëma bashi akamanuabi mitsun vacakaman piti mërati ꞌain.

¹⁰ Usakin ꞌai kamina mitsun piti ñu ꞌitsaira ꞌianan a shimakin xëati ꞌumpax upíñu ꞌiti ꞌain, ꞌianan kamina barin xarokëxun tani masátima ꞌain, ꞌën kana nuibakin bërúain usa ꞌain, usa ꞌain kana ꞌumpax upíbu manámi ki chikíkë anu buánti ꞌain.

¹¹ ꞌIanan kana achúshi bai bashikama abi nëtanbiania anun kuanti ꞌaxunti ꞌain, ꞌianan kana baikama a sapan ꞌinun ꞌimiti ꞌain.”

¹² ¡Kamina iskanti ꞌain! Israel unikama mitsux kamina, ꞌurakëoxbi ukanti ꞌain: axa aín tsipúmiax uti axa amiax umainun ka amia bari kuabúkë amiaxribi uti ꞌikën, umainun ka Asuán kakë me amiaxribi aín patsan uti ꞌikën.

¹³ ¡Naíkamë ꞌëo! ¡ꞌImainun ka bashikaman kuëëni kushin kantakin upí tania! ¡Usai ka Nukën ꞌIbun aín unikama tëmërai masá nuitutiabi an nuibakin kuëënun ꞌimikëbë ꞌiti ꞌikën!

¹⁴ “Jerusalénnu tsókë unikama ax ka ësai kiakëxa: Nukën ꞌIbun ka nukama rakankëxa, nukaman Diosan ka nu manuakëxa.

¹⁵ ꞌAínbi kara ¿achúshi titan aín tuá ꞌibubi nuibakë ꞌixunbi ënti ꞌik? ꞌAisatankin ka xanun aín tuá manuti ꞌikën, ꞌaínbi kana ꞌën mitsu uínsaranbi manutima ꞌain.

¹⁶ Mitsux kamina ꞌënan ꞌain, usa ꞌikë kana ꞌën mëkënu mitsun anë ꞌakësa ꞌixun, anun mitsun ëma kënëara kënëkama a manukinma xënibua ꞌaínbi sinanin.

¹⁷ An mi amiribishi birutëkënti unikama ax ka bënëkuatsini ꞌaia, an mi rurupa unikama kuansamaira kiani ka ꞌishtuinra kuanxa; an min ëma ꞌatimokin masókama atux ka kuanxa.

¹⁸ Axa Jerusalénnu ꞌikë unikama mitsun kamina buinarakin amami amamia iskin, uisai kara ꞌura buánkan unikama minu uax timëaxa kixun isti ꞌain. ꞌËx Nukën ꞌIbu ꞌaish kana ꞌëxbi ësai kin, usa ꞌain ka a unikamax, Jerusalénnu tëñutimi tëñukësa ꞌianan, mëratiñu xanua anun mëníokakin ñukama aín naminu nankësa usaribi ꞌiti ꞌikën.

¹⁹ Min menu ꞌikë ëmax ka masókin rurupakë ꞌiakëxa; ꞌaínbi ka bërí min me unikama an ꞌaisamaira ꞌixun anu tsókin tsitsirukëx chamara ꞌiti ꞌikën. An mi ꞌatima okin rurupa unikama ax ka bërí ꞌura ꞌikën.

²⁰ Isa nëtë́axa kixunmi sinánkan mitsun bakë bëchikëkama atun ka min pabinubi kuamikin mitsu kati ꞌikën: Ënë ëmax ka chukúmara nukamanan ꞌikën; usa ꞌain kamina achúshi me nu bixunti ꞌain.

²¹ Usakian mi kakëx kamina min nuitu ꞌukëmëuishi sinani kiti ꞌain: ¿Uin kara nun bakë bëchikëkama ënë bëchinun nu ꞌamiakëx? Nux kananuna bakë bëchikëñuma ꞌiakën usa ꞌixun, kananuna bakë bëchitisa tankinbi bakë bëchiama ꞌain; usa ꞌain ka Jerusalénnu tsókë unikamax bëtsi menu uankë ꞌaish timakankin ënkë ꞌiakëxa, ¿uin kara bërúanxun kaniokëx? Anu ꞌikë unikaman ka Jerusalén ashira ëanxa, ¿uinuax kara atux uakëx?”

²² Ësai ka Nukën ꞌIbu kiaxa: “ꞌËn kana bëtsi menu ꞌikë unikama kati ꞌain; ꞌimainun kana bëtsi ëmanu tsókë unikama achúshi ꞌinánti ꞌain, usakin ꞌakin ka min ꞌini bëchikë xanukama papixun bëkësa ꞌinun bëti ꞌikën.

²³ ꞌApukaman ka kanioti atu biti ꞌikën, ꞌimainun ꞌapun xubunu ꞌikë xanu upíbu akamaxribi ka an tuá xukama bërúankë ꞌiti ꞌikën. Usakin ꞌai ka mitsu bëtánain ñanati ꞌikë ax mitsun kakësabi oi kananuna ꞌiti ꞌai kixun sinania ꞌikë ꞌiti ꞌikën. Usai ꞌikin ka ꞌëx kana Nukën ꞌIbu ꞌai kixun ꞌunánan, uix kara ꞌëmi katamëtia ax ka uínbi paránkëma ꞌiti ꞌikë kiax kiakëxa.”

²⁴ ¿An ꞌakánanti ꞌunánkë kushi uni ax kara ꞌakanankin bëtsi kupitanuma ꞌaxun bikë ñu a bikuantisa ꞌiti ꞌit? ¿Ñatankin ꞌatimaira sinanñu ꞌapun bikë ax kara anuax abáti ꞌit?

²⁵ Ësai ka Nukën ꞌIbu asérabi kiakëxa: “Kushi uni aka ꞌakanankian bikë ñukama a bëtsi unin bikuanti ꞌikën, ꞌianan ka ꞌapu ꞌatimaira sinánñu a bëtsi unin aín ñukama bikuanti ꞌikën. ꞌËn kana axa mitsubë nishanani kuëbikanankë uni a kamabëtan isti ꞌain; ꞌianan kana mitsun bakë bëchikëkama ië́miti ꞌain.

²⁶ ꞌËn kana an mi ꞌatima okë unikama aín namibia pinun ꞌamiti ꞌain, usakin ꞌamianan kana aín imibi xëatankëxa paë bata vino ꞌakë xëatankëx ꞌikësai paënun ꞌimiti ꞌain. Usakin ꞌaia ka unikaman ꞌëx aín ꞌIbu ꞌixun atu ië́mia kixun ꞌunánti ꞌikën, ꞌëx kana kushiira ꞌixun an Jacobnën rëbúnkikama ꞌakianan, tëmëraiabi chikian a ꞌai kiax ka Dios kiakëxa.”