Isaías 46 - Kashibo-Kakataibo Biblia

Nukën ꞌIbu ax ka Babilonianu ꞌikë dioskama usamaira ꞌikën

¹ Bel kakë dios ax kapumëmainun ka Nebo kakë axribi Babilonianuax menu pakëtia. Usa ꞌikë ka unínbia a rabinuxun ꞌakë ñukama a an ñu papikë ñuinakaman aín kaxunu nankë ꞌikë buania, usa ꞌaish ka ꞌiëira ñu ꞌikën axa atsankë ñuina kamanan.

² Usa ꞌaish ka dioskama kapumë kuaianx menu pakëti abi iëtisa ꞌaishbi ꞌima, usa ꞌain ka atuxi bëtsi menu kuanima.

³ Jacobnën rëbúnkikama mitsun kamina ꞌëx kia kuati ꞌain, mitsux kamina Israel unikama bërukë akamaribi ꞌain: ꞌËn kana mitsu bakëntisa ꞌikëmabi, ꞌën pëñanu ꞌaruxun ꞌakësokin bërúanxun bëakën,

⁴ usa ꞌain kana ꞌëx mitsúxmi kaniakëkëbëbi usabi ꞌiti ꞌain, ꞌianan kana uínsaran kaina mitsun bu ꞌuxua ꞌirukani usai ꞌiabi bërúankin mitsu ꞌakinti ꞌain. ꞌËn kana mitsu usakin ꞌakën, usa ꞌixun kana usakinbi bërúankin, ꞌën mitsu ië́miti ꞌain;

⁵ ¿Ui kaina mitsun ax ka ꞌësaribi ꞌikë kixun kati ꞌain? ¿Ui iskësa karana ꞌëx ꞌai kixun kaina mitsun sinánkanin?

⁶ Anu ka unikama ꞌaisamaira kuri aín ñusuti bianan manë uxua, bitankëxun anun ñu tupúnti ꞌakë anun tupunkë ꞌikën; usakin ꞌatankëxun ka an ñu unioti ꞌunánkë achúshi uni baritankëxun abi rantinpuruni tsóbuti ami ñanákian rabinun ꞌaxúnun ꞌinania.

⁷ Usakin ꞌakë ka unikaman ain tëxatan ꞌiabiankin uania; uantankëxun ka anu nanti ꞌakë anu nitsinia, nitsinkëx ka ubitima anubi nitsia. ꞌAínbi ka munuma banakin ꞌakinun kixun ñukákëxunbi ka uisakinbi kaima ꞌianan atúxa tëmëraiabi ië́mima.

⁸ ꞌUchañu unikama mitsun kamina sinánti ꞌain, mitsux kamina paránantima ꞌain upiokinshi kamina sinánkanti ꞌain;

⁹ usai ꞌikinma kamina bërámaira ꞌia ñukama a sinánkanti ꞌain. ꞌËx kana Dios ꞌain, usa ꞌain ka bëtsi ꞌaíma ꞌikën; Dios kana ꞌëx ꞌain, usa ꞌain ka ꞌëbëtan sënën bëtsi dios ꞌaíma ꞌikën.

¹⁰ ꞌËx kikë ënëx usai ka ñu ꞌinuxun ꞌaia ꞌëx kia ꞌikën; kianan kana axa ꞌiti ñuribi ñui bërámabi kiakën. Usa ꞌain kana ꞌëx kin: Usa ꞌain ka ꞌën sinánkë ñukama ax usaibi ꞌiti ꞌikën; ꞌën kana uisa ñu ꞌanux karana kia a kamabi ꞌati ꞌain.

¹¹ ꞌËn kana achúshi uni amiaxa bari urukë auküaxa, an ñuina bamakë pikë ñuina pëchiu ꞌurakëox ukë usaribi kuatsinia unun kuëan, a unin ka ꞌëx kikësa kinbi ꞌati ꞌikën. ꞌËx usakin ꞌakatsi kikësa okinbi kana ꞌati ꞌain, usakin kana sinan usa ꞌain kana usaibi ꞌinun ꞌimiti ꞌain.

¹² Kamina kuakanti ꞌain, bana kuakëma unikama, anun ꞌën mitsumi nishkë unikamanua mitsu chikíntisa basipain ꞌikë kixun kamina sinan kanin:

¹³ ꞌËn kana ꞌën ꞌati ñukama axa ꞌurama ꞌinun ꞌimiti ꞌain; usa ꞌain ka ꞌëx ië́mianankë ax ꞌuramara ꞌikën. ꞌËn kana Sión kakë ëmanu ꞌikë unikama ië́miti ꞌain, ꞌën kana Israel unikama ꞌë ꞌakësaribi okin uisakinbi kanunma ꞌimiti ꞌain.